Faamatalaga

Faasoaina atu o le Liahona

Ou te faitau lava i taimi uma i le Liahona aua e tele mea ou te aoaoina ai, e pei o galuega faalemalumalusa, valaauga o le Ekalesia, ma le auala e alofa ai i le Atua. E faamaluluina lo’u loto i mea ou te faitauina. E tele mea ou te faitauina, ma e atili ai le manino o ou mafaufauga. Sa ou lagona le faagaeetia i savali mai ia Peresitene Gordon B. Hinckley. Ou te faasoaina atu le mekasini i tagata fou ma tagata le toaaga o le Ekalesia. E faamalosia ai i latou, o le taimi nei, ua okaina ai ni a latou lava kopi.

Josephine A. Manzon, Filipaina

O Le Meaalofa Sili e Mafai Ona Tuuina Atu e se Uo

Ou te fiafia tele i le mekasini. Ou te naunau lava ina ia oo mai aua ou te faasoaina atu ai le Savali a Faiaoga Asiasi i uso e le mauaina le mekasini. Ia te au lava ia, o le meaalofa sili lea e mafai ona tuuina atu e se uo.

Isabel Medina Méndez, Puerto Rico

Tusiga mo Tagata o le Ekalesia ma Tagata Le Lolotu

O mea e i totonu o le Liahona e faigofie moni lava ma e ese le manaia i le faitau. O le vaega e sili ona ou fiafia i ai o savali mai le Au Peresitene Sili; ua faamanuiaina au i taimi uma i ia savali. E tumu i taimi uma i fautuaga faaleagaga mo i tatou uma o fanau a le Tama Faalelagi—o se punavai e puna pea o aoaoga faalelagi mo i latou uma e mafai ona faitau i ai.

Ana Encarnacion, Dominican Republic

Toefaitauina o le Liahona

O le Liahona o se faamanuiaga ma se soa. Ua ou toe faitauina le lomiga o Setema 2003, ma ou toe fiafia ai foi i le “Ua le Taulau le Faamoemoe.” Sa ou faitauina a o ou sauni mo la’u misiona ma toefaitauina ina ua uma la’u misiona. Na ou maua moni ai se aafiaga ese ma matagofie.

E i ai taimi pe a ou lagona ua tele naua mea e manaomia mai ia te au. Ina ua ou toefaitauina le tusiga, na faamanatu mai ia te au e faaauau ona ou avea faapei o Keriso. Atonu e le o taimi uma e talafeauga ai le olaga, ae o lenei ua sili atu lo’u naunau e tuuina atu le mea sili ou te mafaia.

Georgia Pahulaya, Filipaina

Matamataina o le Konafesi Aoao

O le taimi muamua lava na ou matamata ai i le konafesi aoao i le satelite, na matua faagaeetia ai lava au. Ou te lagona le faafetai tele i se perofeta soifua ma isi Pulega Aoao. A o tatou faalogologo atu ia latou molimau e uiga i le Faaola ma lo tatou Tama Faalelagi, ma faalogo atu o latou saunoa mai faatasi ma musumusuga ma le mana mai luga, e faafouina ai i tatou uma faaleagaga. Ina ua uma ona ou matamata i le konafesi e ala i le satelite, na ou maua le malosi faaopoopo e fetaomi atu ai pea i luma ma ua ou faatalitali atu ma le naunautai i le isi konafesi aoao e sosoo ai. O le konafesi i totonu o mekasini o se faamafanafanaga tele foi, ae maise lava ia i latou e le maua le avanoa e maimoaina ai.

Felipe Urbina, Costa Rica