O La’u Vavega o Talafaasolopito o Aiga
“Ma o le valoaga lenei na tautala i ai Atamu a o uunaia o ia e le Agaga Paia, ma sa tausia se tala tuufaasolo o le gafa o le fanau a le Atua” (Mose 6:8).
Na fai e lo’u tama le tele o galuega o talafaasolopito o aiga. Sa ou fiafia tele e faalogologo e uiga i ou augatama o e na avea ma paionia, o augatama na tau i le Taua mo le Tutoatasi o Amerika, ma augatama na avea ma tupu ma alii sili i Europa.
“E te manao ta te o i le Faletusi o Talafaasolopito o Aiga i le Aso Toonai?” o le fesili lea a Tama i se tasi aso.
“Ua lelei!” Sa le mafai ona tatali lou fia vaai mo au lava i igoa tautupu i luga o le matou siata o faasologa o gafa.
Na ma taunuu atu i le Aai o Sate Leki ma fiafia i le susulu o le la i le taeao o le taumafanafana a o ma savavali atu i le faletusi. O le latalata lava ona ma taunuu o le atili foi lena o le tele o lo’u fiafia. O iina, i totonu o lena fale tele na i ai igoa ma tala o lo’u lava aiga—paionia, fitafita, alii sili, ma mea uma.
Ina ua ma taunuu i totonu, na toso mai e Tama ni nofoa se lua i luma o se komepiuta. Na ma saofafai i lalo, ma amata loa ona suesue solo i polokalama e faaali mai ia te au le vaega e sosoo ai lo matou aiga ma se laina tautupu.
“Ummm.” Na faanunumi lona muaulu. “E foliga mai ua ou le mauaina i lenei aso,” na iu ina ia fai mai ai.
Na matuai ou le fiafia lava. Na ma faaaluina le taimi atoa na totoe o le taeao e tilotilo ai i tusi na i ai tala i ou augatama paionia. Sa ou fiafia foi i lena, ae na ou manao lava e aoao e uiga i isi ou augatama.
“Aua le popole,” o le tala lea a Tama. “O le a ta toe o mai i le faaiuga o le vaiaso a sau.”
Na vave lava ona uma le vaiaso, ma e le’i umi ae ma toe saofafai foi ma Tama i luma o se komepiuta i le Faletusi o Talafaasolopito o Aiga. O le taimi la lenei, na fai mai Tama, “A! Ua maua.”
Na vaai faasolosolo o ia i igoa o tupu ma tupu tamaitai mai Europa atoa na faamaumauina iina i lo’u talafaasolopito! Ua tele naua le mau igoa ma aso o le a tele ni aso e tuu uma ai i totonu o le polokalama o le talafaasolopito o le tatou aiga. “O lona uiga e tatau ona ta o mai soo ina ia maua ai faamatalaga o loo tatou manaomia,” o la’u tala lea.
Na falō mai se tamaitai sa galue i le komepiuta na sosoo ma i maua ma iloa mai le mea na ma faia. “Ou te tau foi i le laina lena,” na ia fai mai ai. “Sa ou galue iinei i aso uma lava e aumai faamatalaga e uiga i na augatama.” I ni nai minute, na ia kopiina ai ana faamatalaga uma lava i luga o se tisiketi ma tuu mai ia Tama.
A o ma savavali atu i le taavale, sa ou mafaufau loloto lava. “Masalo na matuai finagalo lava le Tama Faalelagi ia ta maua o tatou augatama, a ea, Tama?”
Sa ataata o ia. “Ou te manatu e sa’o oe. Ana ta maua ia augatama na ta sueina i le vaiaso ua te’a, semanu tatou te le feiloai ma le ta uo foi ananei. Ma ana ta le feiloai ia te ia, semanu ta te le vave maua le toatele o o tatou augatama.”
Na ou iloaina sa fesoasoani le Tama Faalelagi ia i maua i le mauaina o le toetoe lava 1,000 tausaga o galuega o talafaasolopito o aiga i se taeao se tasi. E alofa o Ia i o matou augatama e pei lava o Lona alofa ia i matou. Na tatau ona matou fesoasoani atu ia i latou e pei lava ona Ia fesoasoani mai ia i matou—e ala i le mauaina o o latou igoa, aoao e uiga i o latou olaga, ma le mautinoa ua uma ona fai o latou galuega faalemalumalusa. Se aso, o le a ou feiloai ai ia i latou, ma mafai ona avea i matou o se aiga e faavavau.