O Loo Ofo Atu Pea e le Ekalesia Fesoasoani i e na Aafia i Lologa ma Mafuie

E ui ua mavae mala, mou atu le lulu o mafuie ma faaifo le vai, o loo faaauau pea le faamatuu atu e le Ekalesia o fesoasoani i tagata lotu ma uo a le Ekalesia i Initonesia, Peru ma Aferika.

O le faatupeina e ala i foai alofa mai tagata o le Ekalesia, i le agaga aufaatasi i galuega alofa ma faavae mautu, ua mafai ai e le Ekalesia ona tali vave atu i vaega aafia i mala faanatura. I le faamatuu atu o mea tau tu mama mo le soifua sologa lelei, meaai, tapoleni, palanikeke, ma isi mea aoga, ua faaauau ai pea e le Ekalesia ana foai ma fesoasoani mo e ua afaina.

Initonesia

O loo faaauau pea ona avatu o fesoasoani e le Ekalesia i e na aafia i le malosi o le mafuie lea na lulu i Sumatra i le afiafi o le aso 12 Setema 2007. Na faatamaia e le mafuie le 30,000 o fale o aiga ma fale tetele i le eria o Bengkulu, i le itu i saute o Sumatra.

Na saogalemu faifeautalai uma ina ua mavae le mafuie, ma e leai se tasi o le 25 tagata lotu o loo nonofo i lea vaega na aafia o afaina. O nuu na sili ona afaina o Laise, Argamakmur, ma Mukomuko. I lalo o le taitaiga a le Au Peresitene o le Eria i Asia, na amata ai e Fesoasoani Alofa a le Ekalesia ona auina atu fesoasoani i le taimi lava na maea ai le mafuie. Sa auina atu foi se vaega o tagata volenitia e iloilo le tulaga sa aafia, ma sa latou tuuina atu se fesoasoani vave e ala i le faasoasoaina o suauu e kuka ai meaai, araisa ma isi meaai, molimatagi ma tapoleni.

O le aufaigaluega i Fesoasoani Alofa a le Ekalesia na taunuu i Bengkulu, Laise, ma Argamakmur i le lua aso talu ona mavae le mafuie, na molimauina le tele o le faatafunaga, ma le tele o tagata ua nonofo i fafo mai o latou fale ua faatamaia, i lalo o tapoleni ua tatau mo lo latou puipuiga mai le la ma matagi. O isi tagatanuu e ui sa lei faaleagaina o latou fale, ua nonofo foi i fafo o o latou fale ona o le fefefe ne’i faaauau pea ona lulu mafuie.

Ina ua mavae le tolu o aso talu ona uma le mafuie, na toe foi atu ai vaega fesoasoani o le Ekalesia i Laise ma Argamakmur ma le tele o meaai mo le 500 o aiga. Sa faasoa atu foi meaai i ni isi nuu na latou uia.

Na auina atu foi e Fesoasoani Alofa a le Ekalesia ni taavale tetele e tutumu i araisa ma isi meaai, i Muhammadiya, o se faalapotopotoga o tagatanuu Musalemi e 29 miliona tagata, o se faaopoopoga tele i se faalapotopotoga tumaoti o tagata Kerisiano, o loo auina atu fesoasoani i le aai o Bengkulu.

Na faaleagaina le falemai a le malo i Argamakmur, ma sa manaomia ai le aufaigaluega ia aveesea tagata mamai mo se vaitaimi le tumau, ma avatu i se faleie tele a le fitafita, sa faatuina i tafaala i le nofoaga e paka ai taavale, i fafo atu o le falemai ua faaleagaina.

Sii mai i le Church News, 6 Oketopa, 2007.

Aferika

O lologa matautia na faasopolia ai le 17 o atunuu o Aferika, na tuua ai le faitau selau afe o tagata ua leai ni mea e nonofo ai. O timuga mamafa ia Setema na lavea ai Iukana, Itiopia, ma sa sili ona mamafa i Sutana. E silia ma le 250 tagata na maliliu, ma le faitau afe o fale o aiga na faatamaia.

O le Ekalesia o se tasi o muai fesoasoani na taunuu, ma oloa na faatoafilemu ai Kana, e ala i taga araisa, suka, meaai tuuapa pei o apa pi, apa sana, fagu suauu mo kuka, fala moe, solo taele ma fasimoli, na uta i taavale i Akara, tusa o le 30 itula le mamao e malaga ai.

O Agnes Chigabatia Asangalisa, sui minisita o le Upper East Region i Kana, sa faafesootaia faifeau faamisiona i galuega fesoasoani, o Elder Bruce ma Sister Ardis Knudsen mo se feosoasoani.

O le tele o fale o aiga i le nuu e fauina mai le palapala, lea na faatamaiaina i tafega, ua tuua ai le lata i le 300,000 tagata ua leai ni mea e nonofo ai. O ni isi ua nonofo mo se taimi le tumau, i faleaoga, nofoaga tutotonu o nuu, falesa po o fale o le malo. Na faaleagaina fuata ma faatoaga. Ua le maua fafie mo le afi, ua leai foi ni vai mama. Sa faaleagaina auala i nuu ma ua faaaoga e le toatele na o vaaalo.

Sa faapopoleina taitai i le ono tulai mai o se faamai, ona o le aafia o vainu i le eria atoa.

“O le vaaiga i le tele o le faatafunaga sa faigata ona talitonuina,” na saunoa ai Benonita Bismarck, faauluuluga o le faatinoga o fesoasoani a le Koluse Mumu i Kana. I totonu o le Itulagi i Luga i Sasae lava ia, e 30,000 eka (12,220 heta) o eleele mo faatoaga na soloia ma faatamaia, tusa ma faamaumauga a le malo.

“O tulaga e soifua ai tagata ua matua faatamaia ma ua masalomia le ono tulai mai o se oge tele i le eria,” o le tala lea a Nana Akrasi-Sarpong, pule o le va i fafo o le Matagaluega o le Lotoifale.

O le minisita lagolago o le itulagi na talia foai o oloa mai ia Clarence Kofi o le Uarota Lua o Madina, Siteki a Akara Kana Adenta.

Sii mai i le Church News, 6 Oketopa, 2007.

Peru

I le lima vaiaso talu ona faatamaia e se mafuie malosi ia Pisco, Peru, ia Aokuso 2007, na faaauau ai ona auina atu e le Ekalesia ni fesoasoani faaolatotoga ma mea manaomia i eria sa aafia, e ala i le soosoo tauau atu i ni isi o faalapotopotoga.

I le faatusatusaga e tusa o le 70 pasene o le aai o Pisco na faaleagaina, ae sa tumau pea ona luluina le eria mo ni nai aso. E leai ni fale mo faatasiga a le Ekalesia na faatafunaina, ae tele na aafia. E faitau selau tagata na maliliu i lea mafuie.

O Elder Russell M. Nelson o le Korama a Aposetolo e Toasefululua na asia le malo na faatamaia ae lei atoa le lua vaiaso talu le mafuie, ma sa faalototele atu i tagata Peru, o le a faaauau pea ona fesoasoani atu le Ekalesia e ala i foai o mea manaomia.

“O le a matou i ai iina,” o lana tala lea. O tagata lotu ma taitai sa latou tatalo mo Peru, ma o fesoasoani mo tagata o le Ekalesia o le a oo atu pea, tusa lava pe ua maea pe ua vaivai taumafaiga na muamua.

O taumafaiga soofaatasi a le Ekalesia, Gossner Foods, DHL International, ma le ASTAR Air Cargo, 40,000 pauna (18,000 KK) o mea tau soifua sologa lelei, palanikeke, ato o meaaoga ma susu—o se susu ua faia fapitoa ia fetaui ma fesuisuiaiga o le tau ma ua teupepaina ina ia le manaomia ai ona tuu i se aisa sei vagana ua tatala—sa auina atu i Pisco.

I lalo o le taitaiga a le au peresitene o le Eria a Amerika i Saute i Sisifo, e fa falelotu sa faaaoga mo se taimi le tumau e tagata o le Ekalesia ma auaiga ma tuaoi. I le galulue faatasi ai ma le Ofisa o le Puipuiga Lautele a Peru, na saunia ai e tagata o le Ekaelsia le 10,000 o palanikeke ma isi faaoloaga mo taimi faafuasei e pei o—faleie ma isi mea manaomia vave mo tolauapiga.

O Rick Foster, o le sooupu o Fesoasoani tau Uelefea, mo le Ekalesia, na faafetaia le agalelei o DHL ma le ASTAR Air Cargo i le fesoasoani mo le fela’ua’iga, ma le Gossner Foods na saunia susu. O Pilar Nores de Garcia, o le Masiofo o Peru na saunoa, o le susu o se tasi o mea sa sili ona manaomia.

Sa saunoa Brother Foster, o fesoasoani mo tagata o se vaega o muai fesoasoani autu a le Ekalesia, ma sa faaalia lona agaga faafetai ona o le i ai o nisi o loo naunau e galulue faapaaga ma le Ekalesia “mo le manuia o isi o loo manaomia le fesoasoani.”