Savali a Faiaoga Asiasi

O Le Aiga o le Totonugalemu o le Fuafuaga a Lå Foafoa

Suesue, filifili ma aoao atu ma le agaga tatalo ia mau ma faamatalaga e fetaui ma tulaga o loo manaomia e uso o loo e asia. Molimau atu e uiga i le aoaoga faavae. Valaaulia i latou o loo e aoaoina e faasoa mai mea ua latou lagona ma aoaoina.

Aisea ua Totonugalemu ai le Aiga i le Fuafuaga a le Tama Faalelagi?

Elder Robert D. Hales o le Korama a Aposetolo e Toasefululua: “O le mataupu e uiga i le aiga e amataina mai i ni matua faalelagi. O lo tatou faanaunauga aupito maualuga o le avea lea faapei o i la’ua… .

“Mai lava i lona amataga, sa faavaeina ai e le Atua le aiga ma faia ia faavavau. Sa faamauina Atamu ma Eva i se faaipoipoga mo le taimi nei ma le faavavau atoa… .

“O le toefuataiina mai o nei ki ma le pule o le Perisitua ua maua ai le avanoa mo tagata uma o e agavaa, e maua faamanuiaga o aiga e faavavau… . Ua faamatala manino mai e le Alii le folafolaga ma mea e manaomia i lenei fuaiupu paia:

“‘O lenei foi, e moni ou te fai atu ia te oe, afai e faaipoipo le tane i lana ava i la’u upu, o la’u tulafono lea, ma i le feagaiga fou faavavau, ma faamaufaailogaina ai ia i laua e le Agaga Paia o le folafolaga, e le ua faauuina, ua ou tofia i lenei mana ma ki o lenei perisitua; ma o le a fai atu ai ia te i laua—O le a oo mai lava oulua i le uluai toetutu; afai foi e mavae le uluai toetutu pito mai; o le a mautofi foi i nofoalii ma malo, o itumalo sili, ma pulega, ma malo le faalagolago, o le loloto ma le maualuluga uma—ona tusia ai lea i le Tusi o le Ola a le Tamai Mamoe … o le a faatumauina atoatoa foi pe a o ese atu i laua mai le lalolagi; e ui atu foi i laua i tala ane o agelu, ma atua, ua faatuina i lea mea e oo i lo laua faaeaga ma le mamalu i mea uma, e pei ona faamaufaailogaina i luga o o laua ulu, o le mamalu lea o le atoatoa ma le fanafanau pea lava e faavavau faavavau lava” (MFF 132:19)… .

“… Pe a faagaoioia aiga e pei ona fuafuaina ai e le Atua, o vafealoai e maua iina o ni vafealoai e sili ona taua i le olaga i la le tino. O le fuafuaga a le Tama, ia faaauauina e faavavau le alofa ma le mafutaga faaleaiga” (“O Le Aiga e Faavavau,“Liahona, Ian. 1997, 75–76).

O Le a Se Mea e Mafai ona Ou Faia Ona ua Ou Iloa o le Aiga o le Totonugalemu o le Fuafuaga o le Faaolataga?

Elder Henry B. Eyring o le Korama a Aposetolo e Toasefululua: “O le aiga o le iunite faavae … i lo tatou faamoemoe mo le ola e faavavau. E amata ona tatou faia i o tatou aiga, o le iunite laitiiti, o mea o le a faaaoga i le Ekalesia ma malo ua tatou ola ai i lenei lalolagi, ma o mea ia tatou te ola ai i aiga o le a fusia ai faatasi i tatou e faavavau i feagaiga ma le faamaoni. E mafai ona tatou amata nei ‘ona faalauiloa atu na fua faatatau ua fuafuaina ina ia faatumauina ma faamalosia le aiga.’ Ou te tatalo o le a tatou faia, Ou te tatalo o le a outou ole atu, ‘Tama, e mafai faapefea ona ou sauniuni?’ Ta’u atu ia te ia lou naunau i mea ua ia finagalo e aumai ia te oe. O le a e mauaina tali, ma afai e te faatinoina, ou te folafola atu ia te oe le fesoasoani mai o mana o le lagi” (“O Le Aiga,” Liahona, Oke. 1998, 23).

Margaret S. Lifferth, fesoasoani muamua i le au peresitene aoao o le Peraimeri: “O le lalolagi i nei ona po, o le a le gata ina manaomia e fanau se tina ma se tama faamaoni, ae o le a latou manaomia i tatou taitoatasi e puipuia, aoao, ma alolofa ia te i latou… . O le usitai o le tagata ma faataitaiga, i soo se vaega o o tatou olaga, o le lesona taua lava lena o le talalelei mo le fanau. O le mea lea, suesue, ia iloa ma faaaoga le talalelei” (“Faauta o a Outou Fanau,” Liahona, Nov. 2006, 74–75).