Lesona mai le Tusi a Mamona
Filifilia o le Saolotoga ma le Ola Faavavau
Sa amata a’u aoga faaiunivesite i se Iunivesite pe tusa ma le 100 maila (160 km) mai lo’u aiga. O se taimi fiafia mo tamaiti fou uma o le aoga. O le toatele, o le taimi muamua lea ua nonofo ese ai mai aiga, ma sa naunau e faaali lo latou saolotoga fou faatoa maua mai le vaaiga a matua.
Sa ou i ai i le au pasiketipolo a le Iunivesite, ma sa vave ona iloa o au o se tasi O Le Ekalesia a Iesu Keriso o le Au Paia o Aso e Gata Ai. I vaiaso muamua o le semesa, sa valaaulia au e se tasi o le matou ‘au, i se pati i le po o le Aso Toonai mo tamaiti aoga fou, e faia i le toafa i tua atu o le aai. Sa ou fesili pe i ai ni ava malosi i le pati, ma sa faatalitonuina au e leai. Sa ou lagona le faaletonu i lana tali ae sa tonu lava ia te au ou te alu pea. Sa fuafuaina e aunoa ma lo’u iloa se tamaitai ma te tafafao faamasani, ma sa faamautinoa mai e tutusa o ma tulaga faatauaina. Sa ta’u mai e la’u uo o le a matou faaaogaina lana taavale.
Sa fai si mamao o le mea na matou tietie atu i ai i lena po o le Aso Toonai agai i le toafa, ma tau atu ai i le pati. Sa ou matua le fiafia, o le inugapia o le gaoioiga autu lea, e ui lava o le matutua e faataga faaletulafono ai le inu i le setete o le tolu tausaga i luga atu o tausaga o le toatele o tamaiti aoga ta’i tausaga muamua. Sa le mafai ona faatali le tamaitai na faapea ma te tafafao faamasani, se’i inu faatasi ma le alii o le matou ‘au ma lana uo. Ina ua ou faaleo atu i ai lo’u le fiafia, sa latou fai mai ua tatau ona ou “faatagata matua ma tofo i mea e mafai ona fai i le olaga” ma o le a latou fesoasoani mai ia te au. Sa ou ta’u atu ia te i latou ou te lei inuina lava se ava malosi muamua, ma o le a ou le amataina foi i lena taimi. E lei pine ae latou tuua loa a’u ae faatasi atu i isi.
Sa ou nofonofo na o au, e ese mai le inuga ma talieega leotetele, leai se taavale ou te alu ai, ma sa ou mafaufau ai pe aisea ua ou faaaafia ai fua lava au i lenei faaletonu. I se taimi mulimuli ane i lena po, sa ou vaaia se laina o moli o taavale o agai atu i le toafa i le pati. Sa si’o e taavale le vaega, ona amata ai lea ona feemoemoa’i moli i luga, e pei o se faailoilo, ma sa ou iloa ai o taavale a leoleo. Sa taumafai le toatele o le au aooga e taufetuli i le toafa, ae sa vave ona pu’eina. Sa ou nofo ai lava i le mea na ou i ai, ma le fememea’i i le mea ua tupu.
Sa amata e leoleo ona siaki faamaoniga e iloa ai tausaga o le au aooga, ma fai suesuega o le manava a i latou e i lalo ifo o le matutua e tatau ona inupia ai, ina ia iloa ai pe sa inu. Ina ua oo mai ia te au, sa ou ta’u atu i se alii taitai leoleo ou te lei inupia i lena po, ma ou te le inu lava. Sa ata aamu o ia ia te au, ae ina ua ou ta’u atu ma le mausali e mafai ona ia talitonu ia te au, sa suia ona foliga. Sa ia fai mai e le tau su’eina au, ma sa ia faatonuina loa au ou te aveina le taavale a le alii o la’u ‘au i le Iunivesite. Sa molia i latou e lei oo i tausaga e mafai ai ona inuava ma faatonuina i latou e totogi a latou sala. O nisi na faafalepuipui.
O Se Savali Patino
E ui i lea, sa ou alu e aunoa ma se moliaga e leoleo, ma sa ou taunuu i le fale pe tusa o le 3:00 i le taeao o le Aso Sa. O le sauniga Perisitua a le matou uarota e amata i le 7:00 i le taeao. Sa tatagi la’u uati i le 6:45 i le taeao. Sa ou tago tape ma toe taoto, ma lo’u mafaufau mo ni nai minute mo mafuaaga uma ou te le alu ai i le sauniga i lena taeao. Peitai i le faaleagaga, sa le mafai ona ou mapu. Sa ou tu i luga, fai o’u ofu lotu, ma savali loa i le falelotu, ma sa ou taunuu i le 10 minute talu ona amata le sauniga.
A o ou savali atu i le falelotu, sa te’i lo’u loto ina ua ou vaaia le muliulu o lo’u tama. Na sau e asiasi mai ia te au, e aunoa ma le logoina mai. Sa ou savali atu ma ou nofo ifo i ona tafatafa. Sa tilotilo mai ia te au ma soisoi. Ona tago lea oomi lo’u tulivae, ma punou mai ma musumusu mai se savali e le mafai e upu ona faamatala lona uiga: “Sa ou iloa lava ou te maua mai oe i i, atalii.” O le taimi foi lea, na musumusu mai ai e le Tama Faalelagi lea lava savali i lo’u agaga. E le mafai ona ou faamatalaina lelei le alofa ma le olioli sa ou lagonaina i lena taimi.
I ni nai masina mulimuli ane, sa ou alu i la’u misiona. Na mavae ni nai masina, ona ou mauaina lea o le tala ua maliu faafuasei lo’u tama. Peitai, o le savali na ou mauaina mai ia te ia ma auala mai ia te ia i lena Aso Sa, e le’i aluese lava ma a’u.
Saolotoga e Filifili ai le Saolotoga po o le Saisaitia
O lenei aafiaga ua maua ai se faataitaiga o le upumoni faavavau lea na ta’u atu e Liae i ona atalii i aso ua leva: “Ina ua togiolaina [le fanauga a tagata] ai le pau, ua saoloto ai i latou e faavavau, o loo iloa le lelei ai le leaga; e filifili mo i latou lava, a e le galueaiina… . Ua saoloto foi i latou e filifili le saolotoga ma le ola faavavau talu le Puluvaga sili o tagata uma, pe filifili le faatoilaloina ma le oti, e tusa ma le faatoilaloina ma le mana o le tiapolo” (2 Nifae 2:26–27).
O le fuafuaga o le fiafia a lo tatou Tama, e aofia ai le faaaoga o le saolotoga e filifili ai, ae ona o se tulaga foi e manaomia, e aofia ai le tali atu mo oe lava ma le faamasinoga. O le alii o la’u ‘au ma isi sa i ai i le pati, sa saoloto i latou e filifili la latou amio, peitai, e lei saoloto i latou e filifili ia taunuuga o la latou amio. O nisi o i latou na momoe i le po i le falepuipui. O isi na amataina ni olaga o amioga ua le mataofiofia, lea ua oo ai lava ina faapologaina i latou i le taimi nei.
O le avega mamafatu tatou te aumaia i o tatou lava luga a o sailia le saolotoga e ala i filifiliga le lelei, o se meaula uigā. Na manatu Kaino ua saoloto o ia ina ua uma ona fasioti lona uso, ae na iu ina fetuuina o ia ma malaia ai ona o le mea sa ia faia (tagai Mose 5:32–39). Sa ta’ua e Peteru na taa’iga faatiapolo o “puna o vai i latou e le o i ai se vai” o ē folafola mai le saolotoga ae o la e avea i latou ma pologa a le amioleaga. “Aua pe a toilalo se tasi i se tasi, ua nofo pologa o ia ia te ia” (2 Peteru 2:17, 19). E ui i lea, na faailoa mai foi e Peteru le ala moni o le saolotoga i lona faapea mai, “Ua silafia e le Alii se mea e laveai mai ai i e amioatua ai le faaosoosoga”, aua tatou te sosola ese mai “mea leaga a le lalolagi ina ua iloa lelei o le Alii o le Faaola lea o Iesu Keriso” (2 Peteru 2:9, 20).
Sa valaaulia i tatou e Samuelu le sa Lamana ina ia tatou manatua “ua tuu faitalia [i tatou]; aua faauta foi, ua foaiina mai [ia i tatou] e le Atua le malamalama ma ua tuusaunoaina [i tatou]… . Ua tuuina mai foi e ia [ia i tatou] ina [ia tatou] filifili le ola po o le oti” (Helamana 14:30–31).
Ina ua faia e se tasi o la’u au se mea sese i le gaoioiga a le au, sa ou lagonaina se le mautonu faaleagaga na faapea ona ou le usitaia. Ina ua ou iloaina o loo taumafai le agaga e lapata’ia au, sa sili atu ona ou ita ia te au lava nai lo lo’u ita i le alii o la’u au. Peitai, o lo’u faaesea o a’u lava ia mai le vaega, na ou maua ai se mafanafana faaleagaga ma mulimuli mai ai le manuia faaletino ina ua faatagaina au e leoleo ou te foi i le fale.
E ui i lea, o le faamanuiaga silisili o le saolotoga na oo mai, ina ua oo i le taeao po o le Aso Sa, i totonu o lo’u potu i le aoga, sa ou filifili ai i le mea e tatau ona ou i ai, ma lo’u le iloaina muamua le ‘oa sa faatalitali mai ai iina mo au. O na aafiaga, faatasi ai ma le galuega a le Agaga, na faaōliōli mai ai le saolotoga e o faatasi ma faamanuiaga o le ola faavavau.
Ou te molimau atu o le filifilia o le saolotoga ma le ola faavavau, e maua ai le fiafia silisili e mafai ona tatou iloa.