NGAAHI FAKAKAUKAU KI HE EFIAFI FAKAFĀMILI ʻI ʻAPÍ
ʻE lava ke fakaʻaongaʻi ʻa e ngaahi fokotuʻu ko ʻeni ki hono akoʻí ʻi he loki kalasí pea pehē ʻi he ʻapí. Te ke lava pē ke filioʻi ʻa e ngaahi fakakaukaú ni ki ho fāmilí pe ki hoʻo kalasí.
“Ko ha Fili ʻi ha Kihiʻi Momeniti Pē,” p. 8: Fakamatalaʻi ʻe lava pē ke ʻuhinga ʻa e feilaulaú ko hano tukuange ʻo ha faʻahinga meʻa lelei ke maʻu ha meʻa ʻoku toe lelei angé. Fakamatalaʻi ange “ʻi he taimi ʻoku tau feilaulau aí, ʻoku tau maʻu ʻa e ngaahi tāpuaki ʻo e langí” (Ngaahi Himi, fika 16). Lau ʻa e talanoa ʻo Hiukó; pea fakamatalaʻi ʻa e ngaahi tāpuaki naʻá ne maʻu tuʻunga heʻene feilaulaú.
“Fili ʻa e Tauʻatāiná mo e Moʻui Taʻengatá,” p. 26: Hili hono fakamatalaʻi ange ʻa e meʻa naʻe foua ʻe ʻEletā Kuleiki A. Kātoní, kole ki he kau mēmipa ʻo e fāmilí ke nau fili ha tefito (hangē ko e akó, meʻa fakapaʻangá, meʻatokoní), pea fakaafeʻi kinautolu ke nau hiki ha ngaahi sīpinga ʻo e fili lelei ʻi he tafaʻaki ko iá ʻa ia te ne ʻomi ha tauʻatāina ʻoku lahi angé. ʻOange ha faingamālie ke nau fakamatalaʻi ai ʻenau ngaahi sīpingá. Fakamamafaʻi ange ʻoku tau tauʻatāina ke fili ʻetau tōʻongá ka ʻoku ʻikai ko hono ngaahi nunuʻá.
“Moʻui ʻi ha Tuʻunga Moʻui ʻoku Potupotu tataú,” p. 38: ʻOange ki ha taha ʻo e fāmilí ha fokotuʻunga ʻo ha ngaahi meʻa lalahi ke ne toʻo. Hili haʻo tuku ke kiʻi fefaʻuhi ʻa e tokotahá ni ʻi haʻane feinga ke palanisí, ʻoange ki he tokotahá ni ha tangai pe kato ke faʻo ai ʻa e ʻū meʻá. Fakafehoanaki ʻa e ʻū meá ki hotau ngaahi fatongiá pea mo e tangaí ki heʻetau ngaahi kavenga mafasiá ʻoku tuku atu ki he ʻEikí. Fevahevaheʻaki ʻa e ngaahi fakakaukau mei he konga “Fakahinohino ʻa e Laumālié,” pea aleaʻi ʻa e founga te tau lava ʻo maʻu ai ha palanisi ʻo ka tau tuku ke tokoni mai ʻa e ʻEikí.
“Ko e Mana ʻo Hoku Hisitōlia Fakafāmilí,” p. K6: Ngaohi fakafāmili ha kiʻi fakaneifua (hangē ko e kūkisí) ʻa ia ʻe kiʻi fuofuoloa hono ngaohí. Lau leʻo lahi ʻa e talanoa ko ʻení, pea fakamamafaʻi ʻa e konga fekauʻaki mo e fiemaʻu ke tatali ke maʻu ʻa e hingoa ʻo e ngaahi kuí. ʻOku faitatau fēfē ʻa e fakakaukaú ni mo e tatali ki he kiʻi fakaneifuá? Palani ha taimi ke mou ō ai ki ha laipeli hisitōlia fakafāmili ke kamata pe hoko atu ʻenau fakatotolo ki honau hisitōlia fakafāmilí.
“Hangē ko Nīfaí,” p. K12: Hili hoʻo toe fai ʻa e talanoa ʻo Taniā, fakamatalaʻi ʻa e meʻa naʻe fai ʻe Nīfai ʻi he mavahe hono fāmilí mei honau fonua tupuʻá. (vakai, 1 Nīfai 2:16). Ko e hā ha ngaahi meʻa kuo hoko ʻi hoʻo moʻuí te ke lava ʻo fakaʻaongaʻi ki ai ʻa e sīpinga ʻa Nīfaí?