Lototoʻa ke Fai ha Fehuʻi
ʻI he faʻahitaʻu māfana ʻo e 1994, naʻá ku kiʻi mālōlō ai mei ha akoʻanga ʻi Taipei ʻi Taiuani, ke foki ki hoku kolo tupuʻanga ko Miao-lií ʻo mālōlō ki ai. Lolotonga ʻeku ʻi ʻapí, naʻá ku ngāue ʻi ha fale matalaʻiʻakau. ʻOku houngaʻia moʻoni hoku lotó ʻi heʻeku manatu ki he meʻa naʻe hoko aí.
Lolotonga ʻeku fuʻifuʻi ʻa e fanga kiʻi ʻakaú ʻi ha ʻaho ʻe taha, ne afe mai ha tangata ʻi ha sea ʻoku fakamīsini ke vakai ki he ngaahi matalaʻi ʻakaú. Naʻe mā ke ne tali ʻeku fakaafeʻi ke afe mai ki he loto falekoloá, ka naʻe ʻi ai ha meʻa fekauʻaki mo ia naʻe kei ongo mālohi ki heʻeku fakakaukaú. Ne tuʻo lahi haʻaku toe fetaulaki mo ia ki mui ange ʻi he hala puleʻangá peá ma faʻa fekamoʻaki pē mo femalimaliʻaki.
Lolotonga haʻaku tangutu ʻi ha falekai ʻi ha ʻaho ʻafu ʻe taha ʻo kai ʻaisi poloka, kuo tātaaʻi mai ʻe ha taha hoku umá. Ko e tangata ʻeni ʻi he sea teketeké. Naʻe ʻosi teuteu lelei pea fofonga malimali mai. Naʻe ʻikai toe ufi ʻene ʻeke mai hoku hingoá mo ʻeku fika telefoní pea toki ʻalu leva.
Hili ha ngaahi ʻaho siʻi mei ai, kuo telefoni mai ʻo fakaafeʻi au ki ha maʻu-meʻatokoni efiafi ʻa ha Siasi. Ne fakalotolahiʻi au ʻe haku kaungāmeʻa ka naʻá ku fakatoupīkoi, pea faifai pē peá u ʻalu. Naʻe ifo ʻa e meʻatokoní pea ne u ongoʻi lata ʻi hono talitali au ʻe he kāingalotú talu pē mei he momeniti naʻá ku hū atu aí. Ne toe ʻeke mai ʻe ha taha kehe ki mui ange ʻi he efiafi ko ʻení, ʻa hoku tuʻasilá mo ʻeku fika telefoni ʻi Taipeí peá ne ʻave ʻa e fakamatala ko iá ki he kau faifekau aí. Ko e kamataʻanga ia ʻo ʻeku fehokotaki taʻengata mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe papitaiso mo hilifakinima au ʻi he faʻahitaʻu fakatōlau ʻo e 1994 peá u ngāue fakafaifekau taimi kakato ʻi he 1997. Hili ha taʻu ʻe ua mei heʻeku foki maí, kuó u mali mo ha taha ʻosi ngāue fakafaifekau pea kamata leva ai homa fāmilí.
Naʻe hoko kotoa ʻa e ngaahi tāpuakí ni koeʻuhí he naʻe maʻu ʻe ha mēmipa ʻo e Siasí ha lotolahi ke ne fai ha fehuʻi. ʻI he taimi ko iá, ko ha taha ia naʻe ʻikai fai ha maheni mo ia, ka naʻe faifai pē peá ne tokoniʻi au ki he ongoongolelei ʻo e Fakamoʻuí. ʻOkú ne fakamanatu kiate au ʻa e potufolofola ko ia naʻá ku iku maʻu ʻi he Tohi ʻa Molomoná: “ʻOku ʻikai haʻaku taumuʻa kehe ki heʻeku fakahā atu ʻení, ka koeʻuhí pē ko e lelei taʻengata ʻa homou laumālié” (2 Nīfai 2:30).