Ko e Mana ʻo Hoku Hisitōlia Fakafāmilí
“Ko ʻeni, naʻe leaʻaki ʻe ʻĀtama ʻa e kikité ni, ʻi hono ueʻi ia ʻe he Laumālie Māʻoniʻoní, pea naʻe tauhi ha tohihohoko ʻo e fānau ʻa e ʻOtuá” (Mōsese 6:8).
Naʻe ngāue ʻeku tangataʻeikí ʻi ha hisitōlia fakafāmili lahi. Naʻá ku manako ke fanongo fekauʻaki mo ʻeku ngaahi kui ne hoko ko ha kau paioniá, ngaahi kui ne tau ʻi he Tau Fakalotofonua ʻa ʻAmeliká pea mo ha ngaahi kui naʻe hoko ko ha ngaahi tuʻi mo ha kau naite ʻi ʻIulope.
Ne ʻeke mai ʻe he Tangataʻeikí ʻi ha ʻaho ʻe taha, “Te ke fie ʻalu mo au ki he Laipeli Hisitōlia Fakafāmilí he Tokonakí?”
“ʻIo!” Naʻe ʻikai ke u faʻa tatali ke u sio tonu ʻi he ngaahi hingoa fakatuʻí ʻi homau mape tohihohokó.
Ne ma aʻu atu ki Sōleki Siti pea ne ma fiefia ʻi he laʻā ʻo e pongipongi ko ʻeni ʻo e faʻahitaʻu māfaná ʻi heʻema luelue atu ki he laipelí. Naʻe fakaʻau ke u toe vēkeveke ange ʻi heʻema ofi atu ki aí. Naʻe ʻi loto ʻi he fuʻu fale lahi ko ʻení ʻa e ngaahi hingoa mo e ngaahi talanoa ʻo hoku fāmilí—ko ha kau paionia, kau sōtia, kau naite pea mo e meʻa kotoa pē.
ʻI heʻema ʻi lotó pē, ne toho mai ʻe he tangataʻeikí ha ongo sea ki muʻa ʻi ha komipiuta. Naʻá ma tangatu leva, pea kamata ke ne fakaava ʻa e maʻuʻanga fakamatala he komipiutá, ke fakahinohino mai ʻa e fehokotakiʻanga homau fāmilí mo e laine haʻa tuʻí.
“Mani.” Naá ne kiʻi mata hohaʻa. Fāifai peá ne pehē mai, “ʻOku faingataʻa ke u maʻu ia he ʻahó ni.”
Naʻá ku mātuʻaki loto mamahi. Ne ma fakamoleki ʻa e toenga ʻo e pongipongi ko ʻení ʻi he kumi ʻi ha ngaahi tohi naʻe ʻi ai e ngaahi talanoa ʻo ʻeku ngaahi kui paioniá. Naʻá ku saiʻia foki ai, ka naʻá ku kei fie ʻilo pē ki heʻeku ngaahi kui kehé.
Ne pehē mai leva ʻa e Tangataʻeikí, “ʻOua te ke tokanga ki ai. Ta toki foki mai he uike ka haʻú.”
Ne vave ʻene ʻosi atu ʻa e uiké pea ʻikai hano taimi kuó u toe tangutu mo e Tangataʻeikí ʻi muʻa he komipiutá ʻi he Laipeli Hisitōlia Fakafāmilí. ʻI he taimi ko ʻení, ne pehē mai ai ʻa e Tangataʻeikí, “ʻIo! Kuó u maʻu.”
Naʻe ʻalu hifo ai ʻi he ngaahi hingoa kotoa ʻo e ngaahi tuʻi mo e ngaahi kuini ʻo ʻIulopé naʻe tuʻu ʻi hoku hisitōlia fakafāmilí! Naʻe lahi fau ʻa e ngaahi hingoá mo e ngaahi ʻahó pea ʻe lau ʻaho ia ke fakahū kotoa ki he lekooti fakakomipiuta homau hisitōlia fakafāmilí. Ne u pehē ange heni, “Kuo pau ke ta toe foki mai ke maʻu kotoa ʻa e ngaahi fakamatala ʻoku tau fie maʻú.”
Ne fakahilehila mai ha fefine naʻe ngāue ʻi ha komipiuta naʻe ofi mai, ʻo fakatokangaʻi ʻa e meʻa naʻá ma faí. Naʻá ne pehē mai leva ia, “ʻOku ou fehokotaki mo e laine ko ʻená. Kuo lauʻaho ʻeku ngāue heni ke maʻu e fakamatala fekauʻaki mo e ngaahi kui ko ʻená.” Naʻe lau momeniti pē ʻene hiki ʻene fakamatalá ki heʻema foʻi tisí peá ne ʻoange ia ki he Tangataʻeikí.
Naʻá ku fakakaukau lahi ʻi heʻema luelue mai ki he kaá. “ʻOku pau pē ʻoku fie maʻu moʻoni ʻe he Tamai Hēvaní ke ma maʻu ʻema ngaahi kuí, ʻokú ke tui ki ai Tangataʻeiki?”
Naʻe malimali pē. “ʻOku ou tui ʻokú ke moʻoni. Kapau naʻá ta maʻu ʻa e ngaahi kui naʻá ta kumi he uike kuo ʻosí, naʻe ʻikai ke ta mei feʻiloaki mo hotau kaumeʻa foʻou ko ʻení he ʻahó ni. Pea kapau naʻe ʻikai ke ta feʻiloaki mo ia, naʻe ʻikai ke ta mei lava ʻo ʻilo vave ʻeta ngaahi kui tokolahi ko ʻení.”
Naʻá ku ʻilo naʻe tokoni ʻa e Tamai Hēvaní ke ma maʻu e hisitōlia fakafāmili ʻo ha taʻu ʻe meimei 1,000 ʻi he pongipongi pē ko ʻení ʻe taha. ʻOku ʻofa tatau pē ki heʻetau ngaahi kuí ʻo hangē ko ʻEne ʻofa ʻiate kitautolú. Naʻe fie maʻu ke ma tokoni kiate kinautolu ʻo hangē ko ʻEne tokoni mai kiate kimaua—ʻi hono maʻu honau ngaahi hingoá, ʻilo ki heʻenau moʻuí pea mo hono fakapapauʻi ne fakahoko honau ngāue fakatemipalé. Te u feʻiloaki mo kinautolu ʻi ha ʻaho pea ʻe lava ke mau hoko ko ha fāmili taʻengata.