Ko ha Leʻo Fakatokanga
Naʻá ku nofo mo ʻeku mātuʻá ʻi ha ngaahi ʻaho siʻi, ko ʻeku kiʻi mālōlō mai he naʻá ku puke. Ka kuo hokosia ʻe taimi ke u foki aí, ko ia, naʻá ku pōpoaki māvae ange leva peá u heka ʻi ha pasi ki Lengikesitā ʻi he uhouhonga ʻo ʻIngilaní. Naʻá ku sio pē ki he fakaholoholo ʻa e ngaahi falé pea mo e femoʻuekina ʻa e kakaí ʻi heʻenau moʻui fakaʻahó. Ko ha ʻaho laʻā lahi ʻeni ʻi he faʻahitaʻu māfana ʻo e 1976 pea naʻá ku fiefia mo mateuteu ke fai ha faʻahinga meʻa pē ʻe tuku mai. Naʻá ku hifo mei he pasí ʻo lue lalo ʻi ha maile nai ʻe taha ki he tauʻanga lēlué.
Naʻe feʻefiʻefihi ʻa e kau pāsesé ʻi ʻolunga he tauʻanga lēlué ʻi heʻenau tatali ki he lēlue ke ne ʻave kinautolu ki honau takitaha feituʻú. Naʻe faʻa fakaongo mai ha leʻo ʻi he meʻa fakaongo leʻo lahí ʻo fakahā mai ʻa e ʻū lēlué.
Fāifai pea aʻu mai ʻa e lēlue naʻá ku tali ki aí. Ka ʻi heʻeku kaka hake ki aí, kuo ongo mai kiate au ha ongo mātuʻaki makehe. Naʻá ku toe holomui leva, ʻo u ongoʻi mālohi ʻoku ʻikai totonu ke u heka he lēlué, ka ʻoku totonu ke u foki ʻi he pasí. Naʻá ku ʻosi fakatau haʻaku tikite foki ʻi he lēlué pea naʻe ʻikai ke feʻunga fēfē haʻaku paʻanga ki haʻaku tikite he pasí. Neongo ia, naʻe mālohi fau ʻa e ongo ko ʻení kiate au pea naʻe ʻikai ke u lava ʻo tukunoaʻi.
Naʻá ku kei foʻou pē ki he Siasí, ka naʻá ku ongoʻi ʻa e Laumālié ʻi he taimi naʻe papitaiso mo hilifakinima ai aú. Ko e taimi naʻe ʻai ai ke u heka ki he lēlué, naʻá ku ongoʻi ha kiʻi leʻo vanavanaiki naʻe pehē mai, “ʻOua!” Naʻá ku tuʻu fakalongomate ai ʻi ha vahaʻa taimi ke u fakapapauʻi pe te u toe ongoʻi pea naʻe toe pehē mai pē ʻa e leʻó. “ʻOua!”
Ko e taimi pē naʻá ku mavahe ai mei he tauʻanga lēlué, naʻá ku ongoʻi ha ongo māfana naʻá ne fakapapauʻi mai kiate au hono tonu ʻo ʻeku filí. Hili ʻeku aʻu atu ki he tauʻanga pasí, naʻe pau ke u toe tatali ai ʻo lōloaange ʻi ha houa ʻe taha ke maʻu ha pasi ke u foki ai ki Kōvenitulī. Kapau naʻá ku foki he lēlué, kuó u ʻosi aʻu—ko e anga ia ʻo ʻeku fakakaukaú. Ka ʻi he pasí, naʻá ku toki aʻu ki ʻapi kuo malu efiafi.
ʻI heʻeku fakamoʻui e televīsoné ki he ongoongó, naʻá ku ʻohovale ʻi he meʻa naʻá ku mamata ki aí. Ko e lēlue naʻe tonu ke u foki mai aí ne mafuli ʻi he tuʻakolo ʻo Nuniatoní! Ne tokolahi ha kakai ne lavelavea, pea ʻi ai mo ha niʻihi naʻe lavea lalahi.
Naʻá ku faʻa fononga maʻu pē ʻi he loki muʻomuʻa ʻo e lēlué, ʻo hoko atu pē ʻi he loki mīsini ʻo e lēlué—ko ha konga ʻeni naʻe maumau lahi ʻaupitó. Naʻá ku fakakaukau pe ko e hā naʻe mei hoko kiate au kapau naʻe ʻikai ke u fanongo ki he kihiʻi leʻo siʻi mo vanavanaikí. Naʻá ku toe fakakaukau foki ki he ngaahi hisitōlia fakafāmilí mo e ngāue fakatemipale kotoa naʻe ʻikai ke u mei lava ʻo fakahoko maʻa ʻeku ngaahi kui kuo pekiá ʻo kapau naʻá ku lavea lahi pe mate heni.
ʻOku ou fakamālō koeʻuhí ko e leʻo fakatokanga mo fakamahino ʻo e Laumālie Māʻoniʻoní. ʻOku ou ʻiloʻi kapau te tau talangofua ki he leʻo ʻo e Laumālié, he ʻikai ke tau hē.