Naʻá ku Fie maʻu ha Tāpuaki
ʻI Fēpueli 2005, naʻá ku fakaʻosiʻosi ai ʻeku ako kateti he ngāue fakakautaú ʻi he vaotā momoko ʻo ʻAlapamá. Naʻa mau fakamoleki ha ngaahi ʻaho mo ha ngaahi pō ʻi hono fakaleleiʻi ha fanga kiʻi founga ngāue fakakautau ʻi ha feituʻu mokoʻīʻī. ʻI ha efiafi ʻe taha, ne u ʻuheina ai mo hoku kaungā ʻōfisá ʻi ha ʻuha lōvai momoko peá u feinga lahi ke fokotuʻu hamau nofoʻanga ke mau mālōlō ai ʻi he pō ko ʻení.
Naʻá ku ongoʻi taʻe fiemālie ʻaupito. Naʻe matengūngū hoku nimá mo hoku vaʻé ʻi he momokó pea naʻe langa ia ʻi he kihiʻi ngaue kotoa pē. Naʻá ku pīponu mei hoku ʻulú ki hoku ʻuluʻuluvaʻé. Naʻe tetetete ʻa e kupu kotoa ʻo hoku sinó. Ko e meʻa naʻe toe kovi angé, he naʻá ku manavasiʻi naʻa kuo maʻu au ʻe he niumōniá, he kuo tuʻo lahi ʻeku puke ai ʻi he kuo hilí.
Naʻe haʻu ki heʻeku fakakaukaú ke u fakafisi, ka naʻá ku manatuʻi ha sīpinga ʻa e kau paionia toho sālioté naʻe ʻikai ke nau foʻi neongo ʻa e hulutuʻa ʻo e faingataʻá. Naʻá ku fakapapau leva te u ako ke ʻosi. Kuo fuʻu lahi ʻeku feilaulau mo hoku fāmilí pea heʻikai ke u toe holomui mei heʻeku taumuʻa ke u hoko ko ha ʻōfisá. Naʻá ku lotu leva ki he Tamai Hēvaní ke maʻu ha ivi ke u kei hoko atu.
Naʻe ʻikai ke u teitei mohe ʻi he pō ko iá, pea ʻi he ʻaho hono hokó naʻá ku ʻi ha tuʻunga naʻe toe kovi ange. Naʻá ku ongosia. Naʻe ʻikai tokoni ʻa e laulau houa ʻemau fakamālohisino ʻi he momokó ke fakanonga ʻeku felāngākí pea mo ʻeku talé. Ne fakatokangaʻi ʻe ha taha ʻo e kau faiakó ʻa e tuʻunga naʻá ku ʻi aí peá ne tuʻutuʻuni ke u hū ʻi ha houa ʻe ua ki he tēniti fakamāfaná.
Lolotonga ʻeku tuʻu taʻe sū ʻi he loto pelepelá ʻo tautau hoku vala vikú, naʻá ku fakaʻamu ki ha faingāue mei he lakanga fakataulaʻeikí. Fakafokifā pē kuo ngatupe ʻa e laʻi lā ʻo e matapā ʻo e tēnití pea hū mai ha ongo ʻōfisa kateti ʻe toko ua. Naʻá ku kamata leva ke pōtalanoa mo ha taha ʻo kinaua, ko Sikoti Laniteli. Fakafokifā pē kuo afe ʻema talanoá ki he fefolauʻaki fakavahaʻa puleʻangá. Ne tala mai ai ʻe Sikoti naʻá ne nofo ʻi ha taʻu ʻe ua ʻi he ʻOtu Filipainé ki muʻa pea toki kau mai ki he sōtiá. Naʻe fakahā mai ʻe he Laumālié he momeniti pē ko iá ko Sikotí ko ha taha ʻosi ngāue fakafaifekau.
Naʻá ku ʻeke ange leva, “Ko e hā naʻá ke fai aí?”
Naʻá ne tali mai, “ʻOi, ko ha kiʻi meʻa faka-Siasi pē.”
Peá u ʻeke ange leva, “Ko ha mēmipa koe ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní?”
Naʻá ne tali mai, “ʻIo, ko e mēmipa au.”
Naʻá ku talaange leva, “Pea mo au foki.”
ʻI heʻema lulululú, naʻá ku kole ange kia Sikoti pe ʻe lava ke faingāue mai kiate au. Naʻá ne tali loto fiefia peá u tūʻulutui leva he pelepelá. Naʻá ne tāpuakiʻi au pea naʻe fakamoʻui au he taimi pē ko iá! Naʻe foki mai hoku iví pea ʻosi mo ʻeku talé. Ne mole atu ʻeku puké. Ne fakakakato leva ʻeku akó pea ʻosi mei ai ha māhina ʻe taha, kuo fokotuʻu au ko ha ʻōfisa.
ʻOku ʻafioʻi moʻoni ʻe he Tamai Hēvaní ʻa kitautolu fakafoʻituitui pea te Ne tāpuakiʻi kitautolu ʻi Heʻene founga pē ʻAʻaná, ʻi heʻetau tui kiate Iá. Te Ne hiki hake kitautolu ʻi hotau ngaahi taimi faingataʻaʻia tahá.
Naʻe mole ʻa e moʻui ʻa Sikoti Lanitelí lolotonga ʻene ngāue fakakautau ʻi ʻAfikānisitaní ʻi he ʻaho 25 ʻo Nōvema 2006. Naʻe ʻikai ke u maheni lelei mo ia, ka naʻe uesia lahi au ʻe heʻene maté. Naʻe fekauʻi mai ia ʻe he Tamai Hēvaní kiate au ʻi ha taimi pelepelengesi ʻo ʻeku moʻuí. He ʻikai toe ngalo ia ʻiate au pea te u manatuʻi maʻu pē ʻa e tāpuaki mahuʻinga naʻá ne fai kiate au ʻi heʻene hoko ko ha taha maʻu lakanga fakataulaʻeiki moʻui tāú.