‘Oku Fakamo‘oni ‘a e Makasini ‘o Mā‘asi 2008 ki he Kakai Kotoa Pē ‘o Fekau‘aki mo e Fakamo‘uí

ʻE fakatefito ʻataʻatā pē ʻa e Liahona mo e Ensign ʻo Māʻasi 2008 ʻi he ʻEiki ko Sīsū Kalaisí. ʻOku faʻufaʻu ʻa e ngaahi fakamatala kātoa aí ke tokoni ki hono fakatupulaki ʻo e tui mo e ʻofa ʻa e kāingalotú ki he Fakamoʻuí, ʻo tatau pē kiate kinautolu ʻoku mālohí mo māmālohí. ʻE ʻaonga foki ʻa e makasini ko ʻení ki hono akoʻi ʻo kinautolu ʻoku ʻikai kau ki he Siasí ʻo fekauʻaki mo ʻetau tui kiate Iá.

Naʻe pehē ʻe ʻEletā Sei E. Sieniseni, ko e ʻētita ʻo e ngaahi makasini ʻa e Siasí, “ʻOku mau falala ʻe toe ofi ange ha kakai tokolahi ki hotau Fakamoʻuí ʻi haʻanau lau ʻa e pulusinga ko ʻeni ʻo e ngaahi makasini ʻa e Siasí, pea toe lahi ange foki mo e ngaahi tāpuaki ʻo ʻEne Fakaleleí te nau maʻu aí.”

ʻE hā ʻi he makasini ko ʻení ha ngaahi fakamatala hangē ko ʻení:

Ko ha vakai fakalūkufua ki he ngaahi akonaki ʻa e Siasí fekauʻaki mo e Fakamoʻuí ʻi hano fai ʻe Palesiteni Kōtoni B. Hingikelī.
Ngaahi fakamatala maʻá e kakai lalahí, toʻu tupú mo e fānaú ʻi hano fai ʻe Palesiteni Henelī B. ʻAealingi, Tokoni Ua ʻi he Kau Palesitenisī ʻUluakí; Palesiteni Poiti K. Peeka, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá; ʻEletā Lāsolo M. Nalesoni pea mo ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá; ʻEletā D. Tooti Kulisitofasoni ʻo e Kau Palesitenisī ʻo e Kau Fitungofulú; pea mo ha niʻihi kehe pē ʻo fekauʻaki mo Sīsū Kalaisi, ʻa hono ʻuhinga ʻoku fie maʻu ai ʻa e tui kiate Iá, ʻa e founga ʻoku faitāpuekina ai e ngaahi moʻuí ʻe Heʻene Fakaleleí, ʻa e founga ke tau haʻu ai kiate Iá, pea mo hono ʻuhinga ʻo e hoko ko ha fakamoʻoni ʻo e Fakamoʻuí.
Ko ha ngaahi tāvalivali ʻoku nau fakatātaaʻi ʻa e “Ko e Kalaisi Moʻuí: Ko e Fakamoʻoni ʻa e Kau ʻAposetoló.”
Ngaahi fakamoʻoni mo e ngaahi meʻa naʻe aʻusia ʻi he tupulaki ʻo e tui ki he ʻEikí mo hono maʻu ʻo e mālohi ʻo ʻEne Fakaleleí.

ʻE lava ke fakaʻaongaʻi ʻa e pulusinga ko ‘ení ʻe he kau faiako ʻaʻahí mo e kau faiako fakaʻapí, kau faifekau fakauooti pe fakakoló, kau taki ʻo e lakanga fakataulaʻeikí mo e ngaahi houalotú ʻi ha founga ʻe tokoni ke nau vahevahe atu ai ʻenau ngaahi fakamoʻoní mo honau kaungāʻapí mo e kaungāmeʻá.

ʻE ʻoatu ha ngaahi tatau lahi ange maʻá e ʻiuniti takitaha. ‘Oku totonu ke talanoa ‘a e kāingalotu ko ia ʻoku nau ʻiloʻi ha kakai ʻe ʻaonga kiate kinautolu ha tatau ʻo e makasiní ki ha mēmipa ʻo e kau pīsopelikí pe kau palesitenisī fakakoló ke maʻu atu ha toe ngaahi tatau lahi ange ʻo e makasiní. ʻE lava ke maʻu atu mo ha ngaahi tatau foki mei he ngaahi senitā tufakiʻanga nāunaú.