Kei Ui pē ke Tokoni
Neongo naʻe fakaʻatā fakalelei pē au mei he ngāue fakafaifekau taimi kakató, ka naʻá ku kei lava pē ke tokoni ʻi ha founga ʻaonga.
ʻI heʻeku kei siʻí pea toe fatutangata angé, naʻá ku teuteu ke hoko ko ha faifekau malanga taimi kakato maʻá e Siasí. Pea hangē ko e faleʻi mai ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻá ku fie hoko ko ha faifekau moʻoni, ʻo ʻikai ko ha ʻalu pē ʻo ngāue fakafaifekau. Ka ʻi heʻeku ngaahi palopalema fakafaitoʻó, ne fakahā mai ai ʻe he Potungāue ʻo e Ngāue Fakafaifekaú kiate au he ʻikai lelei kiate au ke u fehangahangai mo e mafatukituki ʻo e ngāue fakafaifekau taimi kakató. Naʻe mei faingofua pē ke u loto mamahi, he naʻá ku ʻosi teuteu ke tokoni ki hoku Fakamoʻuí pea naʻá ku ʻosi mateuteu ke tali Hono finangalo kiate aú.
Ko Hoku Faingamālié
ʻOku ui ʻa e meʻa naʻe hoko kiate aú ko hano fakaʻatā fakalāngilangiʻi. ʻOku ʻuhinga ia, kuo ʻosi meaʻi ʻe he kau taki ʻo e Siasí ʻeku moʻui tāú mo ʻeku fie ngāué, ka ʻoku nau poupouʻi au ke u tokoni ʻi ha ngaahi toe founga kehe. Pea hangē ko ha tokolahi ʻoku ʻikai ke nau lava ʻo ngāue fakafaifekau taimi kakató, naʻá ku ongoʻi naʻe ueʻi au ke u fai ha meʻa lahi ange kae ʻoua ʻe “hoko atu ʻeku moʻuí ʻataʻatā pē.” Naʻá ku fie ngāue pea ko e meʻa ia naʻá ku faí—ko ha faifekau ngāue fakalotofonua ʻo e Siasí. Naʻá ku maʻu ha founga, ʻi he tokoni ʻeku pīsopé mo e palesiteni fakasiteikí, ke u tokoni ai ki he ʻEikí, ka u kei nofo pē ʻi ʻapi.
Naʻe ʻi ai ha fie maʻu ʻi he Potungāue Nāunau Tokoni ʻa e Siasí (Audiovisual Department) pea koeʻuhí ko ʻeku nofo ofi ki he Fale ʻo e ʻUluʻi ʻŌfisi ʻo e Siasí ʻi Sōleki Sití, te u lava ke tokoni. Naʻe fakahoko mai ʻe heʻeku palesiteni fakasiteikí ʻa e uiuiʻí mo ne vaheʻi au pea fokotuʻutuʻu foki mo ha ngaahi tuʻutuʻuni pau kiate au ʻi he lolotonga ʻo e taʻu ʻo ʻeku ngāué. Neongo naʻe hangē naʻe ngali fefeka kiate au ʻa e ngaahi tuʻutuʻuní, ka naʻá ku ʻiloʻi naʻe tāpuakiʻi au ʻi he taimi naʻá ku muimui ai kiate kinautolú. Neongo ʻoku kehe ʻa e ngaahi tuʻutuʻuni ki he kau faifekau ngāue tokoni kehé mo honau kau palesiteni fakasiteikí, ka ko e ngaahi tuʻutuʻuni ʻeni naʻá ku fai ki aí:
-
Tauhi ʻa e taimi-tēpile fakaʻahó: ʻā ʻi he taimi 6:30 pongipongí; ako ʻa e folofolá mo e Malangaʻi ʻEku Ongoongoleleí ʻi ha houa ʻe ua he ʻaho kotoa pē; fakamālohisino he miniti ʻe 30 he ʻaho kotoa pē; mohe he taimi 10:30 efiafí.
-
Muimui ʻi he founga teuteu ʻa e Siasí.
-
Fanongo pē ki he ngaahi fasi kalāsikí pe fasi ʻa e Siasí.
-
Fakangatangata ʻa e komipiutá ki he ʻī-meilí pē; fakangatangata mo e mata televīsoné; ʻikai ngofua ʻa e vaʻinga he vitioó.
-
Toki kau pē ʻi ha ngaahi ʻekitivitī fakakulupu–ʻikai ngofua ʻa e teití.
-
ʻInitaviu fakamāhina mo ʻeku pīsopé.
ʻI he taimi ʻe niʻihi, ʻoku ou ʻi lalo fonua ai ʻo totolo ʻi ha lalo fale ʻi ha feituʻu ʻafu ʻoku tikilī ʻe 100- hono velá (38ºC) ʻo takai uaea ʻi he ʻahó kakato, naʻá ku fakatokangaʻi naʻá ku faʻa fifili pe ʻoku kaunga fēfē ʻeni ki hono fakahoko ʻo e moʻui taʻe-faʻamate mo e moʻui taʻengata ʻa e tangatá (vakai, Mōsese 1:39). ʻOku ou hoko moʻoni nai ko ha konga ʻo e timi ʻoku nau fakamafola ʻa e ongoongoleleí ki he funga ʻo māmaní? Naʻá ku ʻiloʻi ʻoku pehē ʻe he tohi Mōsaia 2:17 ko e taimi ʻoku tau ʻi he tauhi ai ʻo hotau kāingá ʻoku tau ʻi he tauhi ai pē ʻo hotau ʻOtuá, ka naʻe kiʻi fuofuoloa peá u toki tui ʻoku moʻoni.
Naʻá ku ʻilo ai ʻoku hangē pē ia ha ngāue fakafaifekau malangá, ʻoku ʻikai ko koe ʻoku ʻuhinga ki ai ʻa e ngāue fakafaifekau tokoní. ʻOku ʻuhinga ia ke te feinga ke fai ʻa e meʻa ʻoku fie maʻu ʻe he ʻEikí ke faí. ʻI he lolotonga ʻo ʻeku ngāué, naʻá ku tokoni ʻi hono fokotuʻu mo toʻo ʻo e ngaahi māmá, tokangaʻi ʻo e meʻa fakaongoleá ʻi ha ngaahi fakatahaʻanga pea mo feʻaveaki ʻa e ngaahi nāunaú. Ko ha ngāue lahi mo ʻuli pea he ʻikai ke u ʻaiʻainoaʻia ʻa e konifelenisi lahí. Ko hono moʻoní, ko ʻeku mamata he taimí ni ki ha fakamafolá, ʻoku felāngaaki hoku sinó kotoa koeʻuhí he ʻoku ou ʻilo ʻa e lahi ʻo e ngāue ʻoku fakahokó.
ʻOku fekauʻaki ia mo e Ngāué
ʻI he lolotonga ʻo ʻeku ngāue fakafaifekau tokoni ki he Siasí, naʻá ku ʻilo ai hono mahuʻinga ʻo e ʻi ai he taimi totonú, fatongiá, fakahoko totonu ʻo e ngāué pea mo hono fai hoku lelei tahá. Neongo naʻe feinga ʻeku ongomātuʻá ke akoʻi mai ʻa e ngaahi meʻá ni, naʻe ʻikai mahino ia kiate au kae ʻoua kuó u mamata tonu ki hono hanga ʻe he maumauʻi ʻo e taimí mo e iví, ʻo uesia fakahangatonu e ngāue ʻa e kakai kehé. Naʻe faingofua ke u tokanga taha pē ki heʻeku fiefiá ki muʻa peá u toki ngāue fakafaifekaú. Ka ʻi hoʻo kamata pē ke ngāue fakafaifekaú, te ke fakatokangaʻi he ʻikai fakalata ke te hoko ko ha hoa ʻo ha taha ʻoku ʻikai ke ne ʻiloʻi ʻa e founga ngāué. Ko e ako ke ngāué, ko ha konga ia ʻo e teuteu ke tokoní.
Ko e Hā mo ha Meʻa Kehe Ne u Ako
Naʻá ku ako foki ke u fakahoungaʻi ʻa kinautolu ʻoku ngāue ʻi tuʻa ʻo ʻikai ʻiloʻí. Naʻá ku mamata ki he lahi ʻo e ngāue ʻa e kau taki ʻo e Siasí ʻo ʻikai ke nau tohoakiʻi ha tokanga kiate kinautolu pe ʻamanaki ki ha faʻahinga lelei ʻe fai ange. Naʻá ku mamata ki ha kakai kehe naʻa nau ngāue, naʻe lahi ange ʻenau palopalemá ʻiate au, ʻo akoʻi ai au ta ʻe lava ʻa e taha kotoa pē ʻo tokoni ʻi ha faʻahinga founga.
Naʻá ku fakatokangaʻi ai ta naʻe tāpuekina ʻaki au ha ivi mo ha mālohi pea te u lava ʻi he ngāue mālohí ke fai ha meʻa lahi ange ʻi he ngaahi meʻa naʻá ku lolotonga fakahokó. Naʻá ku fakatokangaʻi ko e taimi ʻoku ou fakaʻapaʻapaʻi ai ʻa e kakaí, ʻoku ou fiefia ange. ʻOku faingofua pē ke te taʻe tokaʻi e kakaí ka te lava ʻo feinga ke te ongoʻi lelei ange fekauʻaki mo kita. Ka ʻoku fakatou fengāueʻaki ʻa e fakaʻapaʻapá, pea ko kinautolu ʻoku nau fakafofongaʻi ʻa Sīsū Kalaisí kuo pau ke nau anga fakaʻapaʻapa.
Neongo ia, ko e meʻa mahuʻinga taha naʻá ku akó, ʻe tokoni atu ʻa e ʻEikí ʻi hoʻo fakahoko ʻa e ngaahi meʻa ʻoku faingataʻá. Naʻe faingataʻa ke te nofo pē ʻi ʻapi, faingataʻa ke te fai ha fanga kiʻi ngāue iiki, faingataʻa ke taʻe tuku taha mai kiate kita ʻa e tokangá, faingataʻa ke te tauhi ʻa e ngaahi tuʻutuʻuni ʻo e ngāue fakafaifekaú pea faingataʻa ke u fanongo ki hono tala mai ʻe he kakaí ʻoku ʻikai ko haʻaku ngāue fakafaifekau “moʻoni” ʻeni. Ka naʻe tokoniʻi au ʻe he ʻEikí. ʻOku ou ʻiloʻi te Ne tokoniʻi koe ʻi hono fakahoko ʻo e ngaahi meʻa ke ke fiefia aí, ke ke ongoʻi fiemālie ange ai fekauʻaki mo koe, tupulaki pea hoko ai ko ha taha lelei ange. Tūʻulutui, punou ho ʻulú peá ke faitotonu pē ʻiate koe ʻi hoʻo lotú. Hili iá peá ke teuteu ke ke ngāue ʻi ha feituʻu pē pea ʻi ha taimi pē ʻe ui ai koé.