Hoê buka e te hoê fafauraa
Te pure nei au ia faaohipa noa â tatou i te Buka a Moromona: Te Tahi Faahou Ite no Iesu Mesia no te faaite i te poro‘i o te evanelia i te mau utuafare e i te mau hoa.
E au mau taea‘e e e au mau tuahine here, e ohipa faufaa mau i te amuiraa’tu ia outou no te paturu i te Peresideni Thomas S. Monson, i to’na na tauturu i roto i te Peresideniraa Matamua, e i Te Tino Ahuru Ma Piti Aposetolo ei mau peropheta, ei mau hi‘o, e ei mau heheu parau. Te faaite papû nei au no te mau peropheta « e parau atu ratou mai te au i ta ratou e ûrûhia ra e te Varua Maitai.
« E te mau mea atoa ta ratou e parau ra ia ûrûhia ra e te Varua Maitai e riro ïa ei parau mo‘a e riro ïa te hinaaro o te Fatu,… e te mana hoi o te Atua e tae noa’tu i te ora » (PH&PF 68:3-4).
Ei mau melo no Te Ekalesia a Iesu Mesia i te Feia Mo‘a i te Mau Mahana Hopea Nei, te fana‘o nei tatou i te faufaa e te haamaitairaa no te ora mai tei parauhia i roto i te mau papa‘iraa mo‘a tei paturuhia e teie mau peropheta, mai te au i te faaururaa a te Bibilia, a te Buka a Moromona, a te Parau Haapiiraa e te Mau Parau Fafau, e a te Buka Poe Tao‘a Rahi. Ua papa‘i te peropheta Nephi e, « No te mea ua au to‘u varua i te parau mo‘a i te papa‘ihia ra, e te feruri nei to‘u aau i te reira, e te papa‘i nei hoi i te reira ei haapiiraa e ei faufaa no to‘u mau tamarii » (2 Nephi 4:15). E hopoi mai te mau papa‘iraa mo‘a ia tatou, te Buka a Moromona ihoa râ, ia ti‘aturi i te Atua e ia « au ia’na na roto i te taraehara a te Mesia, i to’na ra Tamaiti fanau tahi » (Iakoba 4:11).
Tau rii ava‘e i ma‘iri a‘e nei, ua faaite atu maua to‘u hoa i te tahi mau buka no te papa‘iraa mo‘a i te hoê hoa rave ohipa melo-ore no te Ekalesia. Ma te ite e na te reira e taui i te huru o to’na oraraa – e to maua nei – ua rave maua i te taime no te papa‘i i to’na io‘a i ni‘a i teie mau buka tata‘itahi. E ua horo‘a’tu i teie mau papa‘iraa mo‘a ia’na, ua ite maua i to’na oto rahi e te aau tae no ta maua nei tao‘a aroha. Rave rahi minuti to’na hi‘ohi‘oraa i teie mau buka ma te parau ore, te oroororaa i to’na rima i ni‘a i te tapo‘i e te hurihuriraa i te mau api parau.
No te iteraa e, e taime faufaa teie, ua tauturu maua ia’na ia haere i te api upoo parau o te Buka a Moromona e ua faaite e, te Buka a Moromona o te tahi faahou ïa ite e aore râ, e ite no Iesu Mesia. Ui maira i te uiraa o ta te mau melo e ui e o ta te mau misionare e hinaaro e faaroo: « No te aha tatou e hinaaro ai i te tahi atu mau ite no Iesu Mesia, taa ê atu i te Bibilia ? » Hou a pahono oioi atu ai, ui atu ra maua ia’na e, no te aha oia i feruri ai e e mea faufaa te reira. Mai te mea ra e, ua hau atu ta’na pahonoraa i te faauruhia i ta’na nei uiraa. Parau maira oia e, no te rau o te mau faaiteraa a te Bibilia e a te mau haapiiraa, te hinaaro nei tatou i te tahi poro‘i haamaramaramaraa, te tahi ohipa o te tauturu ia tatou ia maramarama maitai i te Bibilia. I ta’na hi‘oraa, ua matara te opani no maua ia faaite i to maua mau mana‘o e to maua iteraa papû no te Bibilia e no te Buka a Moromona.
Ua haamata maua na roto i te faa-ite i to maua ite hohonu no te mau parau haapiiraa e te mau haapiiraa a te Bibilia, te Faufaa Apî ihoa ra. Na roto i te tai‘oraa rave rahi o te mau parau ta te Faaora i haapii a poro ai Oia i te evanelia i te fenua nei, ua haapuai e ua tauturu te reira ia tatou ia ite Ia’na, e ua haapii mai e e nehenehe tatou e riro mai Ia’na ra te huru. Ua parau faahou atu maua ia’na e, mai te Bibilia, ua faaite atoa te Buka a Moromona e, ua here te Atua i Ta’na mau tamarii atoa e ua horo‘a mai i te hoê rave‘a ia ho‘i faahou e ia ora i pihai iho Ia’na ra. I muri mai, ua hapii maua e rave rahi mau faaiteraa a te Buka a Moromona, to’na aamu e tae noa’tu i to’na tumu hanahana. Te hinaaro nei au e faaite atu i te tahi o te mau mea o ta matou i aparau.
Hoê buka e te hoê fafauraa
Ua faaite maua a tahi roa e, te Buka a Moromona o te hoê ia buka e te hoê fafauraa. Taa-ê-noa’tu i to’na aamu faufaa, e buka teie no te mau papa‘iraa mo‘a e mea ti‘a ia fariihia e ia tai‘ohia na roto i te faaururaa a te Varua Maitai. Te feia atoa e tai‘o e e feruri hohonu i te mau haapiiraa ua horo‘ahia ia ratou te hoê fafauraa te itehia i roto i te pene hopea a Moroni (a hi‘o Moroni 10:3-4) e i te omuaraa atoa o te Buka a Moromona, i reira tatou e tai‘o ai e: « Te ani manihini nei matou i te mau tane atoa [e i te mau vahine] no te ao atoa nei ia tai‘o i te Buka a Moromona, ia feruri hohonu i roto i to ratou aau i te poro‘i e vai ra i roto e ia ani atu i te Atua, te Metua Mure Ore, na roto i te i‘oa o te Mesia, e e parau mau anei teie buka. Te feia e na reira e e ani ma te faaroo e farii ratou, na roto i te mana o te Varua Maitai, i te iteraa papû e e parau mau e e mea mo‘a te reira ». Ua aparau matou rave rahi minuti i muri mai no ni‘a i te pure e e mea nahea te Varua Maitai ia paraparau i to tatou aau e ia faaite papû mai e e parau mau te Buka a Moromona.
Hoê buka e te hoê opuaraa
I muri iho, ua faaite maua e, te Buka a Moromona o te hoê ïa buka e te hoê opuaraa. Mai roto atu i te upoo parau e tai‘o tatou e te Buka a Moromona ua « papa‘ihia ïa na roto i te faaue » e « na roto i te varua tohu e te heheuraa parau » ia « heheuhia râ na roto i te horo‘a e te mana o te Atua » no te haapapû ia tatou tata‘itahi e « o Iesu o te Mesia, te Atua Mure Ore ». I roto i te hoê tu‘uraa reo no teie opuaraa, ua parau Nephi, hoê o te mau taata papa‘i i te Buka a Moromona e, « O te î hoi o to‘u nei hinaaro, ia titau atu vau i te taata ia haere mai i te Atua o Aberahama, e te Atua o Isaaka, e te Atua na Iakoba, e ora‘i » (1 Nephi 6:4)
Hoê buka e haapii nei i te faanahoraa rahi no te oaoa
Taa ê atu i te reira, ua faaite maua e, te Buka a Moromona o te hoê ïa buka e haapii nei i te « faanahoraa rahi o te oaoa » (Alama 42:8 ; a hi‘o atoa i te mau irava 5, 13, 31 ; 2 Nephi 9). Ia faahohonu atu â i te iteraa, te haapii nei te Buka a Moromona i te tumu no te oraraa, nohea mai tatou i te haereraa mai, e eaha te tupu ia pohe tatou. Te haapii nei tatou i te faaroo ia Iesu Mesia e Ta’na tusia taraehara, te tatarahapa, te faufaa o te bapetizoraa na roto i te utuhiraa, e te horo‘araa e te mana o te Varua Maitai. Na roto i te haapiiraa e i te fariiraa i te mau parau haapiiraa a te Buka a Moromona, e upooti‘a tatou « i te ti‘a-maite-raa, e te here o te Atua e te taata atoa », e te hoê hinaaro ia « tapea hoi e tae noa‘tu i te hopea ra », e ia roa‘a ia tatou te « ora mure ore » (2 Nephi 31:20).
Hoê buka o te faaite papû nei e o Iesu te Mesia
Hau atu i te faufaa, ua faaite maua e, te Buka a Moromona o te hoê ïa buka o te faaite papû nei e o Iesu te Mesia, te Faaora o te ao nei. Ua faaite papû rave rahi mau peropheta o te Buka a Moromona e na Iesu Mesia i Hamani i te fenua nei (a hi‘o Mosia 3:8), te Faaora o te mau taata atoa (a hi‘o Helamana 5:9-12), te Tamaiti Fanau Tahi a te Metua (a hi‘o 1 Nephi 11:18-21 ; Iakoba 4:11). Ua ite maitai teie mau peropheta no te Buka a Moromona Ia’na, mai ia Aberahama e mai ia Mose o tei farii e o tei haapii i Ta’na evanelia mure ore. A tai‘o ai e a haapii ai tatou i ta ratou mau parau, e roa‘a ia tatou te hoê iteraa papû i te here faito ore o te Faaora, To’na oraraa e To’na hi‘oraa parau-ti‘a, e te mau haamaitairaa o Ta’na tusia taraehara rahi.
Hoê buka tei haapapû maitai i te misioni tohu a Iosepha Semita
I muri mai, ua faaite papû atu maua e te Buka a Moromona o te hoê ia faaiteraa mau e ua ma‘iti-mau-hia o Iosepha Semita e te rima o te Fatu no te faati‘a-faahou i te Ekalesia a Iesu Mesia i te fenua nei i roto i teie mau mahana hopea nei. Mai tei faaitehia i te omuaraa o te Buka a Moromona, « Te feia e roa‘a ia ratou [te] iteraa papû hanahana no ô mai i te Varua Maitai [te hanahana o te Buka a Moromona] e ite atoa ratou na roto i te reira atoa mana e, o Iesu Mesia o te Faaora o to te ao nei, e o Iosepha Semita to’na heheu parau e to’na peropheta i te mau mahana hopea nei e Te Ekalesia a Iesu Mesia i te Feia Mo‘a i te Mau Mahana Hopea Nei o te basileia ïa o te Fatu tei faati‘a-faahou-hia i ni‘a i te fenua nei ».
I te taime a haere ai o Samuel Smith e poro haere i te evanelia e te tahi mau buka no te nene‘iraa matamua, ua haamaitai te Buka a Moromona i te oraraa o na milioni taata i roto i te ao nei. Te pure nei au ia faaohipa noa â tatou i te Buka a Moromona: Te Tahi Faahou Ite no Iesu Mesia no te faaite i te poro‘i o te evanelia i te mau utuafare e i te mau hoa. Mai te mea e na reira tatou, mai ta maua i na reira i to maua hoa, e rave rahi e pahono mai ma te ana‘anatae ia ite hau atu no ni‘a i te oraraa o te misioni a te Faaora e i Ta’na faanahoraa rahi no te oaoa no tatou tata‘itahi.
Te faaite nei au i to‘u iteraa papû hanahana e e parau mau te Buka a Moromona. E buka teie o tei faatupu i te hoê tauiraa puai i roto i to‘u oraraa. Ua ite au te ora nei te Atua. O Iesu te Mesia. Ua faaho‘ihia mai Ta’na evanelia i te fenua nei. Te Peresideni Thomas S. Monson o Ta’na ïa peropheta e te afa‘ifa‘i parau ora no teie tau. Te Varua o ta‘u e farii a tai‘o ai au i te mau mahana atoa, a feruri hohonu ai e a pure ai au no te Buka a Moromona ua haapuai te reira i to‘u iteraa e to‘u iteraa-papû no teie mau mea, e ua haapapû mai ia‘u e parau mau te reira. Te horo‘a haehaa atu nei au i teie iteraa papû e to‘u iteraa mau ia outou, na roto i te io‘a o Iesu Mesia, amene.