Elder Jorge F. Zeballos

No te Hitu Ahuru

Hoê ahuru ma piti matahiti i muri mai i to Elder Jorge Fernando Zeballos fanau-raa-hia i te 19 no tiurai 1955, tae mai nei na misionare matamua o te Ekalesia i to’na oire i Ovalle, Tireni i te matahiti 1967.

Ua otefatefa to’na feruriraa i to’na iteraa i teie na misionare Marite e maha no te pae hiti‘a o te râ mai e i to ratou uiui-raa-hia e te ve‘a o te fenua iho. I to te mau misionare haamataraa i te tomo i roto i te mau pŭpŭ taoraraa popo i roto i te ‘ete [basket], ua pee o Jorge o tei here i teie nei tu‘aro i ta ratou mau ha‘utiraa ma te anaanatae. I te hoê taime, ua tomo oia i muri mai i te airaa maa a te mau raatira no te hi‘o i te mau tabula o ta ratou mau pŭpŭ. I to’na hitima‘ue, e « Elder » ana‘e to ratou mau i‘oa.

I to te hoê hoa haapiiraa faaiteraa ia Jorge e ua faafariuhia oia e to’na utuafare i roto i te ekalesia a te mau misionare, ua ui Jorge e e nehenehe atoa anei oia e haere mai. Ua haere faaroo noa mai oia no na ava‘e e hitu hou te mau misionare i ite ai e, aita â o Jorge i haapiihia’tura e aore râ, i bapetizohia. Na roto i te parau faati‘a a to’na na metua, Alberto Zeballos e Ines Zeballos, ua feruri oioi-roa-hia te reira.

I muri mai, i to’na haereraa i te fare haapiiraa tuatoru no Santa Maria i Valparaison, ua matau Jorge ia Carmen Gloria Valenzuela. « I to‘u ite matamuaraa ia’na, ua ite papû roa vau e e faaipoipo vau ia’na », o ta’na ïa i haamana‘o. « E mea huru ê roa no te mea, no farii noa maira vau i to‘u piiraa ei misionare, e ere ho‘i oia i te melo. « I roto noa tau rii hepetoma, ua farii oia i te mau haapiiraa misionare, e ua bapetizo oia ia’na hou to’na tereraa i roto i te misioni no Chile Concepción.

Ua papa‘i noa Jorge e o Carmen i roto i ta’na misioni, e ua haamatau i to’na ho‘iraa mai, e ua faaipoipohia i te 26 no tiunu 1982 i roto i te hiero no São Paulo i Paratira. E pae a raua mau tamarii.

E parau tu‘ite ta Elder Zeballos i roto i te ohipa tata‘iraa i te fare haapiiraa tuatoru no Santa Maria e te hoê parau ‘ai‘ihi tuatoru no te ohipa faatereraa i te fare haapiiraa tuatoru no Brigham Young. Hou to’na pii-raa-hia ei peresideni no te misioni no Chile Concepción i te matahiti 2005, e ti‘a faatere oia no te mau ohipa na te taiete taviriraa repo no Tireni. Ua tavini atoa Elder Zeballos o tei pii-apî-hia i roto i te pŭpŭ matamua no te Hitu Ahuru ei episekopo, ei peresideni tĭtĭ, ei ti‘a retioni ei Hitu Ahuru Area.