Ann M. Dibb

Tauturu piti i roto i te peresideniraa rahi no te Feia Apî Tamahine

I to’na ui-raa-hia e, eaha te mau iteraa rau maitai a‘e o tei faaineine ia’na ia piihia ei tauturu piti i roto i te peresideniraa rahi o te Feia Apî Tamahine, ua pahono Ann Monson Dibb na roto i te hoê mata ataata e te hoê ata maitai e, « te riroraa ei Metua-Vahine ! E te riroraa ei tamahine ! » Teie atoa o ta’na i parau, « e te faaohiparaa i te mau haapiiraa a te Faaora i roto i to‘u oraraa ».

Fanauhia i Roto Miti i Utaha, i te Mau Hau Amui no Marite i te 30 no tiunu 1954 ia Thomas S. Monson e ia Frances J. Monson, ua haapii mai te tuahine Dibb na roto i to’na mau iteraa rau maitai roa e, « te mana‘o mai nei te Metua i te Ao ra i te mau mea o ta‘u e hinaaro nei » area râ, « titauhia tatou ia ti‘aturi i roto i te Fatu e i roto i To’na taime ».

Te ti‘aturi nei oia e, e faaohipa te feia apî tamahine i teie irava here-roa-hia e a’na Maseli 3:5-7: « E ti‘aturi ia Iehova ma to aau atoa ra ; eiaha râ e ti‘aturi i to oe ihora haapa‘o. eiaha e haamo‘e ia’na i to oe atoa ra mau haere‘a ; e na’na e faaite ia oe i to oe ra mau haere‘a ».

A haere ai oia i te fare haapiiraa tuatoru no Brigham Young, i reira oia i farerei ai i ta’na tane, o Roger Dibb o ta’na i faaipoipo i roto i te hiero no Roto Miti i te 5 no mati 1974. E na metua raua no na tamarii e maha. Ua faahi‘o te tuahine Dibb i to’na puai i ni‘a i te atu‘aturaa i to’na utuafare. Tera râ, i te paari-rii-raa mai o ta’na mau tamarii, e i to’na mana‘oraa e, ua tano paha te taime i teie nei, haamata ihora oia i te rave i te tahi mau haapiiraa i te matahiti hoê, e ua faahanahanahia i te hoê parau tu‘ite no te haapiiraa matamua.

Ua tavini na te tuahine Dibb i roto e rave rahi mau piiraa i roto i te Ekalesia i roto i te mau pŭpŭ tauturu. Ua tavini na oia i roto i te tomiteraa rahi no te Feia Apî Tamahine hou to’na pii-raa-hia i roto i te peresideniraa rahi no te Feia Apî Tamahine.

Te ti‘aturi nei oia e, ia maitai ana‘e oe i te taato‘araa o te mau taata, e ia ite paato‘a i te Varua na roto i te mau haapiiraa o to tatou mau feia faatere. « Ua haapii mai au e, ei tamahine apî, e nehenehe ta outou e tape‘a i te mau iteraa papû o te mau peropheta a tutava’i outou i te imi i to outou iho iteraa papû », o ta’na ïa i parau. « E roa‘a ia tatou tata‘itahi te reira mai te mea e iriti tatou i to tatou aau e a hinaaro atu ai ia haapiihia e te Varua ».