Elder D. Todd Christofferson

No te Pŭpŭ no te Tino Ahuru Ma Piti Aposetolo

Te vai ra te hoê mea o ta outou e haapii mai ô mai i te hoê taata, « o te parau ïa a Elder David Todd Christofferson, o tei pii-apî-hia e o tei paturuhia ei melo no te Pŭpŭ no te Tino Ahuru Ma Piti Aposetolo. « Aita e taata o ta‘u i farerei – i rapae e aore râ, i roto i te Ekalesia – e aita a‘u e ohipa e haapii mai ia riro vau ei taata maitai a‘e ».

Te haapiiraa mai i te mau mea maitai a‘e o te pûpûhia mai e vetahi ê o te hoê ïa mea o ta Elder Christofferson i rave i roto i to’na oraraa taato‘a, haamata na ni‘a mai i to’na na metua.

Fanauhia ia Paul Vickery Christofferson e ia Jeanne Swenson Christofferson i te 24 no Tenuare 1945 ua paari mai Elder Christofferson i Pleasnat Grove e i Lindon i Utaha i te Mau Hau Amui no Marite. Ua parau oia e, e mea oaoa na’na e na to’na na teina e maha te hoê tamarii-rii-raa o tei riro ei « here » e ei « ora maitai ».

« E oraraa paruruhia, e te oaoa to to matou utuafare », o ta’na ïa e haamana‘o nei. « Ua faaite papa e o mama ia matou nahea ia ora mai te au i te hoho‘a o te evanelia ».

I te haamataraa o te haapiiraa i te fare haapiiraa tuarua, ua faanuu Elder Christofferson e to’na utuafare i Somerset i New Jersey, i te Mau Hau Amui no Marite. I reira ua matau oia i te mau vahi apî, te mau taata apî e te tahi mau ohipa apî.

« E mea au na‘u te mau faahoaraa e te mau auraa e te mau taata o te mau vahi atoa e i te mau huru faaroo atoa », o ta’na ïa i parau. « E mea papû roa te mau faahoaraa ».

I muri mai i ta’na haapii- raa tuarua, ua haere Elder Christofferson i te fare haapiiraa tuatoru no Brigham Young hoê matahiti hou oia a rave ai i ta’na misioni rave tamau i te fenua Ra-Parata. I reira, ua parau oia e, ua haapii oia mai roto mai i « na peresideni taa-ê-roa e piti », te Peresideni Ronald V. Stone no na ava‘e matamua o ta’na misioni e te Peresideni Richard G. Scott (o Elder Scott i teie mahana, e melo no te Pŭpŭ no te Tino Ahuru Ma Piti Aposetolo) no te toe o ta’na misioni.

Te haamana‘o nei o Elder Christofferson no Elder Scott: « Ua haapii matou ia haapaari ia matou iho mai ia’na atoa ra. E mea tamau oia i te hi‘o ti‘a i ni‘a i te mau rave‘a teitei a‘e ia nehenehe ia tupu hau atu â e ia rave faaoti atu â. Na roto i te reira, ua haamata matou i te hi‘o i te hi‘oraa teitei atu â no matou iho nei, te ohipa, e te mea o ta matou e nehenehe e rave faaoti ».

I to’na ho‘iraa mai na te fenua Ra-Parata mai, ua ho‘i faahou Elder Christofferson i BYU, i reira oia i haapii ai i te reo Peretane e ua faaô i roto i te faatereraa o te mau piahi e i te mau pŭpŭ tu‘aro o te fare haapiiraa iho. Ua farerei atoa oia i reira e ua faaipoipo i ta’na vahine o Katherine (Kathy) Thelma Jacob ; ua faaipoipohia raua i te hopea no ta raua matahiti haapiiraa i te 28 no Me 1968 i roto i te Hiero no Roto Miti. I teie mahana e pae a raua mau tamarii e e va‘u mau mootua.

Ua faahanahanahia o Elder Christofferson i BYU i te parau tu‘ite tuarua nui i te matahiti 1969 e ua haere atu i te fare haapiiraa tuatoru no Duke i te haapiiraa i te ture. I to’na faahanahana-raa-hia i te matahiti 1972, ua tarahuhia oia ei terefie na te Haava John J. Sirica, te taviniraa i te taime no te haavaraa o te ohipa no Watergate.

« E mea anaanatae roa teie ohipa matamua i muri mai i te haapiiraa », o te parau ïa a Elder Christofferson. « Ua ite au i te tahi mau mea maitai roa e i te tahi mau ohipa ino atoa i roto i te toro‘a. Area râ, ua faaite teie nei mau iteraa rau ia‘u i te huru o te ohipa e au i te ture ia rave, e na te reira i horo‘a ia‘u te ti‘aturiraa e te faaururaa ».

Ua rave noa Elder Christofferson i teie ti‘araa e au i te ture i roto i te hoê taiete no te ture e i muri mai ei taata auvaha no te mau fare moni e no te tahi mau taiete, i te pae hitia‘a o te râ no te Mau Hau Amui no Marite. O ta’na i ana‘anatae maitai no na matahiti e piti, ua parau Elder Christofferson e, « te amuiraa i te mau taata maitai o te hahaereraa ïa i roto i te oraraa e i te mau faaroo atoa. Ua ite au e, e mea rahi te mau taata o te hinaaro nei i te tauturu ia vetahi ê e ua pûpû ia ratou iho i te raveraa i te mea e tupu ».

I te matahiti 1993, ua piihia Elder Christofferson no te tavini ei melo no te pŭpŭ matamua no te Hitu Ahuru, te hoê tau o ta’na i faahoho‘a mai « te hoê haapiipiiraa ». Ua hopoi to’na piiraa ia’na i te pae apato‘erau no Amerika no te area apato‘a e i te area apato‘a no Mehiko.

Te haamana‘o papû nei Elder Christofferson i te mau uiuiraa a te ve‘a i te tau a faanahonahohia’i te hoê titi taa ê no Mehiko. « Hoê o te mau taata o ta matou i uiui e taata iti haehaa roa ïa, e ere i te taata rahi roa. E aparauraa maitai ta matou, e ua abrazo [tauahi] au ia’na. I muri mai i to teie taata haere-raa-atu i rapae parau atura i te peresideni titi, ‘La autoriddad me abrazó.’ [Ua tauahi te hui mana ia‘u.’] E ua na ni‘a noa ta’na parau. Na teie iteraa i haapii ia‘u ia mauruuru i te mau mea iti o ta te mau taata e rave. Ua haapii atoa te reira ia‘u e, e nehenehe outou e tamau noa i te rave i te tahi mea no te tauturu ia vetahi ia ite i te faufaa ei tamaroa e aore râ, ei tamahine na te Atua.

« E nehenehe mau outou e haapii i te hoê mea maitai na roto i te mau farereiraa e na roto i te faahoaraa », o ta’na ïa i parau. « E mea papû e te na reira atoa ra tatou no vetahi ê ».

I te matahiti 1998, ua piihia Elder Christofferson ei melo no te Peresideniraa no te Hitu Ahuru, e ua tavini i reira e tae noa’tu i to’na pii-raa-hia i roto i te Pŭpŭ no te Tino Ahuru Ma Piti Aposetolo. Ua parau oia e, i to’na farii matamua raa i teie pi‘iraa apî mai ô mai i te Peresideni Thomas S. Monson, e au e « aita e ti‘a ia rave ».

« E au teie hopoi‘a i te mea tairoiro ia hi‘o vau. Tera râ, e mau turu papû to‘u a rave ai au i te ohipa i roto i te Pŭpŭ no te Hitu Ahuru e i pihai iho i te mau melo no te Pŭpŭ no te Tino Ahuru Ma Piti Aposetolo a 15 matahiti i teie nei. Ua haapapû-faahou-hia vau i te iteraa e ua paturu tamau noa mai te Fatu ia‘u. I roto i te mau fifi, i roto i te mau monoraa, i roto i to‘u mau hinaaro atoa, e rae‘ahia Oia na roto i te pure. Te ti‘aturi nei au Ia’na e aita roa vau i haavarehia. Oia mau, te vai noa ra Tamau fafau. Ua ite au e, e horo‘a mai Oia i te tauturu o ta‘u e hinaaro i ô nei ».