Ua paturu e rave rahi milioni taata i te mau Feia Faatere Apî no te Ekalesia i roto i te Amuiraa Hanahana

Ua amui te mau melo no te Ekalesia i te ao atoa nei i roto i te mau fare pureraa e i roto i to ratou iho mau utuafare na roto i te rave‘a pe‘e‘utari, te afata teata, te ratio e aore râ, i ni‘a i te tahua Itenati no te paturu i roto i teie amuiraa hanahana te peresideni apî e te Peresideniraa Matamua no Te Ekalesia a Iesu Mesia i te Feia Mo‘a i te Mau Mahana Hopea Nei i te 5 no Eperera 2008.

Ua faaitehia i te 4 ra no fepuare 2008 te Peresideni Thomas S. Monson e to’na na tauturu i roto i te Peresideniraa Matamua, te Peresideni Henry B. Eyring e te Peresideni Dieter F. Uchtdorf, i muri mai i te poheraa o te Peresideni Gordon B. Hinckley i te 27 no tenuare nei. Tera râ, i roto i te 178 o te Amuiraa Rahi Matahiti a te Ekalesia tei faatupuhia i te 5 e i te 6 no eperera 2008 nei, ua riro ïa ei rave‘a na te mau melo o te Ekalesia ei amuiraa ia paturu i to ratou mau feia faatere apî.

Ua paturu-atoa-hia te mau melo no te Pŭpŭ no te Tino Ahuru Ma Piti Aposetolo i roto i te amuiraa mo‘a i roto i teie nei Pû Amuiraa i Roto Miti nei. Ua paturuhia o Elder D. Todd Christofferson ei melo apî i roto i teie nei pŭpŭ. Ua paturu atoa te mau melo i te mau Hui Mana Faatere Rahi e i te mau feia faatere no te mau pŭpŭ tauturu o te Ekalesia.

Ua piihia Elder L. Whitney Clayton no te pŭpŭ matamua no te Hitu Ahuru no te mono i te parahiraa tei vaiihohia mai i roto i te Peresideniraa o te Hitu Ahuru e Elder Christofferson.

Ua paturuhia hoê ahuru ma pae tane ei mau melo apî no te Pŭpŭ matamua e no te Pŭpŭ piti no te Hitu Ahuru, oia’toa te patururaa o te peresideniraa rahi o te Feia Apî Tamahine. (A hi‘o i te haamaramaramaraa o te haapotoraa aamu.) E piti na melo no te Pŭpŭ piti no te Hitu Ahuru o Elder Craig C. Christensen e o William R. Walker tei paturuhia no te pŭpŭ matamua no te Hitu Ahuru. Ei faahauraa, ua piihia 38 mau Hitu Ahuru Area apî no te tavini i roto i to ratou iho mau area o te Ekalesia. (A hi‘o i te mau api 4-7 no te tabula i‘oa o te feia o tei piihia e o tei haamauruuruhia i roto i te amuiraa rahi.)

O te Peresideni Monson ïa te Peresideni matamua o te Ekalesia i paturuhia i roto i te hoê amuiraa mo‘a tei faatupuhia i roto i te Pû Amuiraa. Mai te au i te parau a Elder Marlin K. Jensen no te Hitu Ahuru, taata aamu parau e e papa‘i parau atoa, ua paturuhia te Peropheta Iosepha Semita e to’na peresideniraa i roto i te hoê amuiraa mo‘a i roto i te hiero no Kirtland i te 27 no mati 1836. Brigham Young e to’na peresideniraa ua paturuhia ïa i te 27 no titema 1847 i roto i te Fare Putuputuraa no Kanesville i Council Bluffs, Iowa. E haamata mai na te Peresideni John Taylor i te 10 no atopa 1880 ra, ua paturuhia te mau peresideni atoa e tae roa mai i te Peresideni Monson, i roto i te hoê amuiraa mo‘a i roto i te Fare Menemene no Roto Miti.

« I te matamua ra, titauhia te mau melo no te Ekalesia ia haere e paturu i roto i te mau amuiraa mo‘a o te Fare Menemene », teie ta Elder Jensen i parau, « i teie mahana, e putuputu te mau amuiraa i te ao atoa nei no te faaroo na roto i te haapurororaa a te rave‘a pe‘e‘utari, e na te mau peresideniraa titi e hi‘opoa i te patururaa a te mau amuiraa. Haamata i te matahiti 1945, ua anihia i te mau melo o te Ekalesia e faaroo ra i te mau ohiparaa o te amuiraa i roto i to ratou iho mau utuafare, ia paturu i te peresideni apî i te mau vahi tei reira ratou ».

Ua papa‘i te Faufaa Tahito i te mau haapiiraa a te Fatu i to Iseraela, ia faatupu i te mau amuiraa mo‘a i te oro‘a no te pata a te Ati Iuda (a hi‘o Exodo 23:14-17 ; Deuteronomi 16:8, 18) i te oro‘a no te patiaraa ti‘ahapa e i te tahi atu â mau oro‘a (a hi‘o Levitiko 23:33-36 ; Nehemia 8:18).

« No te mau melo o te Ekalesia, e ere te patururaa i te mau feia faatere o te Ekalesia i te hoê ohipa rave-faufaa-ore-hia », o te parau ïa a Elder Jensen. « Te patururaa i roto i te hoê amuiraa mo‘a, e faaiteraa te reira i te hoê hinaaro rahi i te pûpû tamau i te faaroo, te mau pure e te patururaa i te Peresideni apî o te Ekalesia ».

Ua haapapû Elder Jensen e, e ere noa i roto i te amuiraa mo‘a te mau melo e anihia’i ia paturu i te mau feia faatere o te Ekalesia. Te hoê patururaa na roto i te ma‘itiraa ua faarirohia ïa ei tuhaa no te mau amuiraa rahi, te mau amuiraa titi e te mau amuiraa a te paroita e aore râ, a te amaa.

« A paturu tamau ai te mau melo i te faatereraa a te Ekalesia, e rave‘a atoa te reira no ratou ia faa‘apî i te mau fafauraa o ta ratou i rave i roto i teie amuiraa mo‘a », o te parau ïa a Elder Jensen.

Ua hau i te 100.000 taata o tei haere i te mau tuhaa pureraa i roto i te Pû Amuiraa, e hau atu i te mau milioni feia o tei mata‘ita‘i e aore râ, o tei faaroo na roto i te afata teata, ratio, rave‘a pe‘e‘utari, e i te mau haapurororaa a te tahua Itenati.

Ua iritihia te mau tuhaa pureraa o te amuiraa rahi o Eperera e ua haapurorohia i roto e 92 e hau atu mau reo, hau atu i tei haapurorohia i roto i te mau amuiraa rahi i ma‘iri a‘e nei.

E roaa te mau parau, te faarooraa e te mau pehe video o te amuiraa i ni‘a i te tahua LDS.org.