Elder L. Whitney Clayton

No te Peresideniraa no te Hitu Ahuru

Ua paari mai i roto i te hoê utuafare herehia, e piti na ohipa faufaa i tupu i roto i te oraraa o Elder Lyndon Whitney Clayton o tei faatupu i te taa-ê-raa, o ta’na ïa i parau. Hoê, o te taviniraa ïa ei misionare i te fenua Peru. Te piti, te faaipoiporaa ïa i ta’na vahine ia Kathy Ann Kipp, i te 3 no atete 1973 i roto i te hiero no Roto Miti. E na metua raua no na tamarii e hitu.

« E huri te mau parau ho‘ata a ta maua mau tamarii e to ratou Mama e Papa i roto i te hoê pureraa pae auahi na te utuafare », o te parau ïa a elder Clayton. « E tatararaa iti papû roa‘e teie ». E mea here na te utuafare Clayton ia parahi e ia aparau i te mau tumu parau rau ; e mea au atoa na ratou ia himene amui.

Ua fanauhia Elder Clayton i Roto Miti i Utaha, i te Mau Hau Amui no Marite i te 24 no fepuare 1950 ia L. Whitney Clayton Tamaiti e ia Elizabeth Touchstone Clayton. Ua paari mai oia i Whittier, Kalifonia, i te Mau Hau Amui no Marite, e ua roa‘a ta’na parau tu‘ite tuarua nui i roto i te ohipa no te haapa‘oraa faufaa i te fare haapiiraa tuatoru no Utaha e i te parau tu‘ite i te pae no te ture i te fare haapiiraa tuatoru no Pacifita i Kalifonia.

I te matahiti 1970 ua piihia oia ia tavini i roto i te misioni no Andes i te fenua Peru. I reira to’na haapiiraa i te here i te mau papa‘iraa mo‘a. « Hoê o te mau oaoa rahi o to‘u oraraa, o te hoê ïa hora maniania-ore no te tai‘o i te mau papa‘iraa mo‘a », o ta’na ïa i parau. « E ite au i te tamahanahanaraa rahi e te hau e i te arata‘iraa i reira ».

Ua tavini na Elder Clayton ei peresideni amaa, ei episekopo, ei tauturu no te peresideni misioni e ei Hitu Ahuru Area. Ua riro te taviniraa i roto i te hoê paroita reo Paniola i Santa Ana i Kalifonia, « ei haamaitairaa rahi mau », o ta’na ïa i parau. « Ua faarahi te reira i to‘u nei paari ia ite e te feia o te haapa‘o i te mau faaueraa e feia oaoa ïa ».

Ua ite atoa oia i taua mea ra a tere haere ai oia ei melo no te pŭpŭ matamua no te Hitu Ahuru. « Noa’tu e, eaha te vahi e nohohia e te mau taata i roto i teie nei ao, e haamaitai mai ihoa te Fatu ia ratou mai te mea e haapa‘o ratou i te mau faaueraa », o ta’na ïa i parau. « Te feia o te tu‘u i to ratou ti‘aturi i roto Ia’na, e ite ïa e ua haafaufaahia to ratou oraraa e Ana i te mau mea’toa ».