I teie mahana
E ua horo‘ahia ia tatou te ora i Teie Mahana ia titau tatou i te tamaraa a te Taraehara, ia ora tatou e amuri noa’tu i pihai iho i te Atua.
A toru hepetoma i ma‘iri a‘e nei, ua taahi atu vau i roto i Nanahi ra. I teie taime, te ite faahou nei au i Teie Mahana. E te hinaaro nei au i te a‘o atu no Teie Mahana.
Na te faaueraa a te Ekalesia i ta‘ita‘i ia‘u na ropu i te mau atearaa aano o te moana Patitifa e tae atu i te fenua Anami. No‘u nei, ua hau atu teie nei tere na ni‘a‘e i te hoê moana. Ua riro râ te reira ei faaho‘iraa i muri no te tau. Hau atu e 40 matahiti i teie nei, ua tavini na vau i ni‘a i te mau tahua tama‘i no taua fenua ra ei raatira faa‘ehau. Ua ho‘i faahou mai te mau haamana‘oraa no taua fenua ra i roto i to‘u feruriraa i muri mai i teie rahiraa matahiti, e to’na mau taata e to‘u mau hoa o te nuu o ta‘u i tavini atoa na. Ua papa‘i Iakobo i te hoê taime e: « Ua mo‘e ê noa’tu hoi to matou ora nei mai te taoto ra e moe » (Iakobo 6:26). Oia’toa ïa no‘u nei. E i teie nei te ho‘i mai nei au i ta‘u mau haamana‘oraa i teie nei vahi i ta‘u i haamana‘o na ua piri i te afa o te tenetere. Ia oti ta‘u nei faaueraa, ua faaoti au i te haere e mata‘ita‘i i taua mau tahua aroraa ra. Ma te apeehia mai e ta‘u vahine, ua rave au i te hoê pererinaraa.
Aita roa vau i papû eaha râ te mea o ta‘u e ite atu i muri mai i teie rahiraa matahiti. Te mea râ o ta‘u i ite, aita ïa e matara ia faataa. Teie râ, e mau taata tei haamauiuihia e te tama‘i. Ua ite au i te hoê nunaa apî, tei î i te ora. Aita vau i ite noa‘e i te mau tahua aroraa tei vavahihia e te mau tupita o te tama‘i maori râ, te mau aua matie nehenehe e te hau. Oia’toa te tupu o te aru e mea apî ïa. Ua mana‘o vau i te ite i Nanahi ra area te mea o ta‘u i ite ra o Teie ïa Mahana e te fafauraa o te hoê Ananahi hinuhinu. Ua faahaamana‘ohia vau e « ia tapae noa mai te oto i te ahiahi, e riro râ i te oaoa i te po‘ipo‘i » (Salamo 30:5).
Ia hahaere faahou vau na ni‘a i te tahua aroraa e ia haere faahou na te e‘a o te aru e faaroo vau i roto i to‘u feruriraa te ta‘i o te mau matini pupuhi, te ta‘i o te mau ofa‘i auri e te maniania o te mau pupuhi na‘ina‘i. E ite faahou vau i te mau hoho‘a mata-rii-apî o te mau hoa tei « penihia o tei pûpû i to ratou ora ei tapa‘o no to ratou itoito » (Abraham Lincoln, a‘oraa i Gettysburg). E ua mana‘o vau i te hoê hoa i te hoê mahana taa ê te hoê mahana rii noa 3 no Eperera 1966. Te Sabati hou te Pata [amaa] te taime no te Pata – fatata 42 matahiti i ma‘iri i teie nei mahana.
Tau rii ava‘e matou i te fenua Anami. E raatira tapa‘o piti ïa vau i te reira taime, i te arata‘iraa i na pŭpŭ pupuhi e toru ra. E tei roto roa matou i te hoê tama‘i teiaha. I taua aahiata ua tae matou i roto i te fenua o te enemi. Ua tono oioi roa’tu matou 10 taata hi‘ohi‘o. Hoê o ratou o te Taratini Arthur Morris ïa. Ua pepe rave rahi mau fa‘ehau i roto i te aroraa pupuhi, oia’toa te Taratini Morris, tei puta to’na ‘i‘o. Ua ho‘i mai vetahi mau fa‘ehau ma te haamarirau mai i roto i to matou reni.
Ua niuniu matou na roto i te ratio i te hoê manureva tautau ia tiihia mai teie feia pepe. Ua hurihia ratou i roto i te manureva e ua ru atu vau i te Taratini Morris ia tomo atoa. Ua pato‘i mai oia. Ua faaue ‘u‘ana faahou atu vau ia’na. E ua pato‘i faahou mai oia. E ua ta toru faahou to‘u aniraa ia’na. E ua pato‘i faahou mai oia ». E inaha parau atura vau ia’na e, « Taratini Morris, a tomo i roto i teie manureva ».
Hi‘o maira oia ia‘u mai te mea ra e te taparu mai nei to’na na mata, ua parau mai oia « e to‘u raatira e » e ua vai teie mau parau i roto i to‘u nei feruriraa e amuri noa’tu: « Eita ratou e haapohe i te hoê manu paari mai ia‘u nei ».
Ua vai noa teie nei hoho‘a i roto i to‘u feruriraa mai te hoê hoho‘a tama‘i ra te huru: te haamarariraa o te aru ; te ru o te ooto o te taviriraa o te manureva tautau ; te hi‘o tia‘i o te pairati ia‘u ; haamata ihora to‘u hoa i te faaea i pihai iho i to’na mau taata. Tuu atura vau. Nana atura vau i te manureva tautau ia ora faahou ratou Ananahi. Hou te toparaa o taua mahana ra, to‘u hoa Taratini Arthur Cyrus Morris tarava pohe atura i te fenua, haapohehia e te ofa‘i pupuhi a te enemi. Ua ta‘i anoano noa ta’na parau i roto i to‘u nei feruriraa « eita ratou e haapohe, eita ratou e haapohe, eita ratou e haaphoe.
Tona auraa ra, ua hape mau oia. E mea mure noa te tahuti nei. Hoê noa mafatu e tupa‘i, hoê noa hutiraa aho e faataa ê i teie nei ao i te tahi. I te hoê taime e taata itoito to‘u hoa, e taata ora ; i muri mai râ, ua reva to’na varua tahuti ore, ma te vaiiho mai i te tino tahuti te hoê tapu araea ora ore. Ua riro te pohe ei paruru e mea na roto atu tatou tata‘itahi i te haere, e mai te Taratini Arthur Morris, aita roa te hoê o tatou i ite ahea râ te reira e tupu mai ai. I te mau tamataraa atoa o ta tatou i ite, penei a‘e o teie paha te hoê mana‘o ara ore no ni‘a i te tahuti e vai e amuri noa’tu, e i to’na parau haapapû e e nehenehe tatou e vaiiho e tae atu i te mahana no ananahi te imiraa e i te pûpûraa i te faaoreraa hara, o ta te evanelia a Iesu Mesia i haapii mai e, tei rotopu i te tahuti nei te mau opuaraa niu.
Ua haapii Amuleka i teie nei parau mau hohonu i roto i te Buka a Moromona:
« Inaha ho‘i, tei teie oraraa te taime ia faaineine te taata ia farerei i te Atua ; oia ïa, o te mahana ïa, te mahana o teie nei oraraa, ia rave te taata i ta ratou ohipa.
« … No reira te a‘o atu nei au ia outou e, eiaha outou e faaroaroa i te mahana o ta outou tatarahapa e tae roa i te hopea…
« … No te mea e mana â to taua vaura, tei roto i to outou tino i te mahana e pohe ai outou ra, i ni‘a i to outou tino i taua ao mure ore ra » (Alama 34:32-34 ; e faahauraa apitihia).
Aue ïa faataaraa puai o ta Amuleka i faaohipa – « te mahana o teie oraraa ! » Teie ta te Aposetolo Iakobo i parau: « Outou hoi o tei ore i ite i te mau mea e tupu ananahi. Eaha hoi to outou orara nei ? e au auahi ïa, no vaivai a‘e e maoro iti a‘era, mou atu ai » (Iakobo 4:14). E te huru o te taata ia haere ê atu oia i teie nei oraraa o te huru taata ïa i tomo atu i tera ra ao. Haamauruuru, no te mea o ta totou i rave i teie Mahana.
Mai te mea ua hape mau te Taratini Morris, ua ti‘a atoa ïa oia ! E feia tahuti ore tatou, no te mea ua upootia te Taraehara a te Mesia ni‘a i te pohe, i na pae e piti te tino e te varua. E ua horo‘ahia ia tatou te ora i Teie Mahana ia titau tatou i te tamaraa a te Taraehara, ia ora tatou e amuri noa’tu i pihai iho i te Atua. E ere teie nei oraraa i te taime no te imiraa noa e i te haapu‘eraa e taime atoa râ no te horo‘araa e no te tauiraa. Ua riro te tahuti nei ei tahua aroraa i reira te parau-ti‘a e te aroha e farerei ai. E farerei râ raua ei na enemi no te faahauraa na roto i te Taraehara a Iesu Mesia no te feia atoa o te faaohipa ma te paari i Teie Mahana.
Te toe ra, no outou e no‘u nei ïa ia imi e ia pûpû amui i taua tatarahaparaa ra – e ia tatarahapa e ia horo‘a amui i te aroha ia vetahi ê – ia nehenehe tatou ia haere na te uputa o ta te Faaora i iriti, ia haere na te uputa mai teie atu oraraa i roto i te faateiteiraa. Teie Mahana te mahana ïa no te faaoreraa i ta vetahi ê ra mau “hapa,» haapapûhia i te iteraa e e faaore mai te Fatu i ta tatou. Mai ta Luka i papa‘i, « e aroha atoa hoi outou mai to outou Metua e aroha maira » (Luka 6:36 ; faahauraa apitihia). E nehenehe te maitai roa e faateahia ia tatou i ô nei tera râ, e mea ti‘a ia tatou ia aroha. E i te hopea ra, te tatarahapa e te faaoreraa tei roto ïa i te mau titauraa matamua a te Atua no tatou.
Ia hope ta’u ho’iraa i muri i roto i te tau, ua hi‘o-haaati-haere au i ni‘a i taua mau tahua aroraa hau ra no Teie Mahana e ua ite au i to ratou mau fafauraa ruperupe o Ananahi. Ua mana‘o vau i to‘u mau hoa, te Taratini Arthur Cyrus Morris. Ua mana‘o vau i te Sabati hou te Pata no mutaa ihora. Ua putapu roa vau i te aroha i te te Faaora no te po‘ipo‘i o te Pata o tei horo‘a mai i te ora ia tatou, o tei pou mai i raro a‘e i te mau mea atoa ra i te faatupuraa ia ti‘a tatou i ni‘a a‘e i te mau mea’toa – Ananahi, mai te mea e haru tatou i teie Mahana. Na roto i te i‘oa o Iesu Mesia, amene.