E o vai to‘u taata tupu ?
Te faaite atu nei matou i to matou mauruuru hohonu i te mau mau feia atoa… tei riro ei mau taata maitai no Samaria no teie nei tau.
Iaorana i teie nei aru‘i. I teie nei pô, te mau irava o te papa‘iraa mo‘a « o outou i na reira i te hoê taea‘e iti ha‘iha‘i roa i roto i ta‘u mau taea‘e nei, ua na reira mai ïa outou ia‘u » (Mataio 25:40), e « a haamana‘o i roto i te mau mea atoa i te feia veve e tei ere hoi » (PH&PF 52:40), e tei faatupu i te hoê auraa taa ê a hi‘opo‘a’i tatou i te maramarama o te ohipa totauturu i te mau matahiti i ma‘iri.
Aita i maoro a‘e nei, ua faatupuhia te hoê apooraa no ni‘a i te ohipa totauturu e te Tomite Rahi no te Ohipa Totauturu a te Ekalesia. O te peresideni Gordon B. Hinckley ïa te peresideni no te tomite, i to’na mauruuru rahi no te aau horo‘a o te mau melo e te feia e ere i ta tatou faaroo o tei faatupu i teie nei mau tautururaa. Na ni‘a i te i‘oa o te Tomite Rahi no te Ohipa Totauturu, te faaite atu nei matou i to matou mauruuru hohonu i te mau mau feia atoa, te mau utuafare, te mau pŭpŭ autahu‘araa e te Sotaiete Tauturu e te mau pŭpŭ Feia Apî Tamahine tei riro ei mau taata maitai no Samaria no teie nei tau.
I te matahiti 2007, ua pahono te Ekalesia i te: aueueraa fenua puai i roto i na fenua e 5, ati auahi rahi i roto e 6 fenua ; te poia e te ‘o‘e i roto i na fenua 18 ; e te pape pu‘e e te mau vero rahi i roto i na fenua 34. Ua pahono atu te Ekalesia e to’na mau melo i te 170 rahiraa ati rarahi – fatata e tupu te hoê ati i roto i te piti mahana atoa i roto i te matahiti. Ua riro mau ei matahiti ohipa roa tei î i te mau rave‘a e rave rahi no te taviniraa.
Taa ê noa’tu i te pahonoraa i te mau ati ta te natura i faatupu, rave rahi tauasini mau ohipa i ravehia no te ‘ea o te huiraatira i roto i te matahiti. I te matahiti i ma‘iri a‘enei, ua hau atu i te 1 milioni taata tei fana‘o i te mau opuaraa no te tamâraa i te pape tei amohia e te Ekalesia i roto i na fenua e 25. Hau atu i te 60.500 taata tei farii i te mau pereoo tura‘i i roto i na 60 hau. I te omuaraa o teie nei matahiti ua amui atu maua te tuahine Burton, e te Peresideniraa Area no Amerika Apatoa i Apatoerau, i te vahine faaipoipo a te peresideni no te fenua Colombia i roto i te hoê oro‘a pûpûraaraa i te mau pereoo tura‘i. Ua tahe noa te roimata, a faaite ai te feia tei farii e te feia haapa‘o i to ratou tapamauruuru. I roto i na 11 fenua, hau atu i te 54.000 taata te oaoa nei i to ratou mata tei haamaitaihia e te mau taote. Hau atu i te 16.500 tuati ma‘i i roto e 23 fenua tei haapiipiihia i roto i te tuhaa faaoraoraraa i te mau aiû fanau apî ; e i muri iho e haapii atu ïa ratou i te tahi atu mau tuati ma‘i e rave rahi. Na roto i te hoê titauraa no te arai i te ma‘i puupuu, e 2.8 milioni tamarii e feia apî i roto i na fenua 10 tei farii i te patia arai. Fatata e 4 milioni feia vêvê i roto i na fenua e 85.
I te ava‘e atete ua haapohe te hoê aueueraa fenua puai e 520 taata e ua vavahi hau atu i te 58.000 fare i te tuhaa apatoa no Perou. Na roto i te here e te atuaturaa, ua horo‘a na tĭtĭ e 29 no Lima, Perou i te tautururaa matamua i te paroita i roto i te tuhaa fenua tei vavahihia.
Ma te tautururaa a te mau misionare faahiahia, ua faanahohia te hoê opuaraa no te tauturu i te mau taata ia patu faahou i to ratou mau fare e mau oraraa e te monoraa rave rahi mau fare haapiiraa. E 400 fare tei patuhia i te pae hopea e na te mau taata, te mau hoa e te utuafare i rave i te rahiraa o te ohipa. Ua ravehia te hi‘opo‘araa, te faanahonahoraa e te haapiipiiraa i raro a‘e i te arata‘iraa a Elder e te tuahine Alan Layton.
I te hopea no te matahiti ua tupu te ano‘iraa o te mata‘i ve‘ave‘a e te mata‘i teitei i te mau ati auahi i te tuhaa fenua apatoa no Kalifonia. Ua ti‘avaru teie mau auahi hau atu i te hoê milioni taata i to ratou ra mau fare. E 1.500 fare tei haamouhia. No te tauturu, ua horo‘a te Ekalesia i te mau pute no te tamâraa ; te mau ahu ta‘oto ; te mau pute no te ‘ea ; e te maa. Hau atu i te 5.000 Rima Tauturu Momoni e te mau misionare no te tamâraa, te tunuraa i te maa, te tamahanahanaraa e te atuaturaa i te feia i roto i te ati.
Te na ô ra te hoê haamauruururaa e: « A faatae atu i te hoê mauruuru rahi i te Feia Mo‘a atoa tei ohipa i roto i to‘u nei vahi nohoraa. Ua tamau noa te mau Momoni i ŏ nei e te maa, te tauahiraa, te mau pure e te tautururaa i te tata‘i e i te tamâ i te mau aua. Ua itoito ratou i ta ratou faaotiraa no te haamaitai i to‘u nei vahi nohoraa, no te faaoraraa i te mau aa, e te tata‘iraa i te mau fare i te mau aivi no San Diego ».1
Teie ta te hoê peresideni tĭtĭ i parau a feruri ai oia i te ohipa tei tupu: « Te hoê o te mau opuaraa o te tamâraa ïa na pihai iho i te Fare Pureraa a te ekalesia Bapetizo… Ua faataa matou e 25 feia apî… ua parau te mau Bapetizo e e faaineine rahi mai ratou i te firifiri e te taofe na matou. Ua parau atu matou ia ratou e e avaava te taofe e nehenehe râ ta matou feia apî e amu i te rahiraa firifiri o ta ratou e nehenehe e horo‘a ! »2
Ua faatupu te ua rahi i te pape pu‘e i te mau tuhaa fenua i ropu e i te pae tooa o te râ no te Fenua Marite, Oregon e Washington. Ua tae mai te mau taata na roto i to ratou iho hinaaro ma afa‘i mai i te mau tauihaa no roto mai i te fare toa a te episekopo.
I te taime a horo‘a’i te mau ti‘a no te Ekalesia i Findlay, Ohio, i te hoê ô i te pŭpŭ no te Tatauro Ura no te oire, ua ite te tahi vahine mata‘ita‘i ia ratou i roto i to ratou piriaro rearea ‘E mau Rima Tauturu Momoni’. Ua haere tia’tu oia e ua afa‘i ihora i ni‘a ta’na niuniu pata hoho‘a e te hoho‘a o na Rima Tauturu e maha e ua tuo a‘era, « no faaora noa iho nei ratou i to‘u nei fare ! »3 E ua tauahi oia i te mau taata atoa o ta’na i ite.
Ua afaihi‘atu te maa i roto i te hoê fare vairaa maa no taua oire ra. I to te maa tae-raa’tu, ua itehia te maere rahi i ni‘a i te hoho‘a mata o te taata faatere e ua na ô a‘era oia, « nahea outou i ite ai ? No horo‘a noa iho nei i ta‘u faraoa hopea e ua opua vau i te ponao i te mau opani. Mea nahea outou i ite ai ? »
I roto i te rave-amui-raa i te ohipa e te Faanahoraa no te Ea a te Ao nei no te arai i te ma‘i puupuu tei haapohe fatata hoê milioni tamarii i te matahiti, hau atu i te 54.000 melo no te Ekalesia tei tauturu i te faanahonahoraa i to ratou taime. Ua papate hoê melo no te Ekalesia i Nigeria e: « Ua pii au i ta matou ohipa ia faaora i te taata hara ore.’ Ua haere matou i tera e tera fare e i tera fare oire e tera fare oire. Ua parau mai te hoê vahine paari rii ia matou e ua pohe ta’na na tamarii e toru i te ma‘i puupuu. No to’na faati‘araa i to’na aamu na roto i te mărû e te here ua ta‘i paatoa te taata i roto i te fare, e o vau atoa. « Ua hi‘o to matou taata hi‘opo‘a e, « te mau mea o ta outou e rave no outou iho e mo‘e ïa ia ho‘i atu outou, area te mau mea ta outou e rave no vetahi ê e vai mai ïa ei faufaa ‘ai‘a na outou ».4
Tamau noa â ta matou mau tautooraa no te tauturu i te feia tei roohia i te ati miti faaî no te matahiti 2004 i Indonesia e Asia apatoa. Au roaahia te moni no te patu e 902 fare, e e 3 fare rururaa no te huiraatira, e 24 faanahoraa opereraa pape no te oire, 15 fare haapiiraa e 3 fare utuuturaa ma‘i. Ua parau te hoê faatere faaroo no te oire: « Ua oaoa e ua haamaitaihia te mau melo no te oire no te Fare Rururaa no te huiraatira… E vahi teie i reira matou e nehenehe ai e pure… e e haapii i te mau tamarii… e haamauruuru i te [te Ekalesia] no te paturaa i teie nei pû no to matou nei huiraatira… E pure ïa matou i te Atua ia horo‘a i te [Ekalesia] te mau haamaitairaa e te manuïaraa i te mau mahana i muri nei. Mauruuru ».5
I Etiopia, ua tauturuhia te mau oire ia roaa te pape inu. Ua ô te Ekalesia i te mau apoo pape e ua patu i te mau tura pape. Ua faaineine te mau oire i te hoê tomite no te pape e ua ô haere i te mau apoo e hinaarohia no te faatoro i te mau auri pape mai te mau tura pape mai e tae atu i te oire tata‘itahi. I te tahi mau taime e rae‘ahia hau atu i te 5 kilometera te atea.
Ua fifi te tahi mau oire i te ‘aroraa ia tape‘a maite ta ratou mau fafauraa no te ôraa i te mau apoo faatororaa auri pape. E mea paari e e mea maro ho‘i te repo e ua î i te ofa‘i o tei haafifi roa hoi i te heruraa. I roto i te hoê o taua mau oire ra, te vaira te hoê fare haapiiraa 1.500 piahi o tei opani i ta’na fare haapiiraa no te hoê tau e ua amui atu te mau piahi no te ‘eru i te toe‘a o te mau tuhaa. A rave noa’i ratou i te ohipa, ua amui mai vetahi atoa mau taata o te oire. I te pae hopea ua roaahia ia ratou hoê maile apoo tei ôhia.
Mauruuru no to outou aroha, to outou maitai e to outou aau horo‘a. E nehenehe ia tatou paato‘a ia haamama i te hopoi‘a a te mau taata tupu, e ia faaitoito e ia tauturu i tei mauiui, ia iriti i ta tatou pute moni no te tauturu i te feia veve, e ia toro atu i to tatou mau rima tauturu. Te faaite papû nei au i te atuaraa o te Fatu ra o Iesu Mesia e Ta’na evanelia e te pure nei au e ia tamau noa tatou i te oaoa i te mau haamaitairaa no te riroraa ei mau pĭpĭ mau a imi maite ai tatou ia vetahi ê. Na roto i te i‘oa o Iesu Mesia, amene.