Inaha, te popou nei ta‘u varua i te mau mea o te Fatu
Ia popou tatou i te mau mea a te Fatu… « e faateitei » te reira i to tatou aau e e faatupu ho‘i i te « oaoa ».
I roto i te Buka a Moromona, e mea pinepine Nephi i te faahiti i te parau popou. Ua popou oia i « te mau mea o te Fatu », i roto i te mau papa‘iraa mo‘a, e i roto i te « faanahoraa rahi e te mure ore » a to tatou Metua i te Ao ra (A hi‘o 2 Nephi 4:15-16, 11:2-8). Te mea faufaa roa’tu, ua haamana‘o pinepine Nephi i te tumu o to’na popou i roto i to’na ‘ati, te taviniraa no te faateitei e no te faahi‘o ti‘a i to’na varua i te mau haamaitairaa mure ore.
O tatou atoa, e mea ti‘a ia popou tatou i te mau mea a te Fatu no te mea « e faateitei » te reira i to tatou aau e e faatupu ho‘i i te « oaoa » (2 Nephi 11:8). Te hinaaro nei au e faahiti atu i te tahi mau mea o ta‘u i popou.
Te popou nei au i roto i to tatou Faaora, o Iesu Mesia. Mai ia Nephi, « te oaoa nei hoi au i to‘u ra Iesu » (2 Nephi 33:6), i roto i Ta’na ohipa maere e te faaoraraa i ni‘a i te fenua nei. Ua horo‘a mai Oia i te maramarama e i te ti‘aturi e ua horo‘a mai ia tatou te Varua Maitai no te arata‘i atu â e no te tamahanahana i ni‘a i te e‘a e ti‘a ia haere. E mea na roto noa Ia’na tatou e nehenehe ai e ho‘i i to tatou Metua. « E tae mai te ora i te tamarii a te taata nei, i roto ana‘e râ, e na roto ana‘e ho‘i i te i‘oa o te Mesia » (Mosia 3:17).
Te popou nei au i te evanelia a Iesu Mesia tei faaho‘i-faahou-hia mai tei patuhia i ni‘a i te niu o te mau aposetolo e o te mau peropheta i ti‘a’i ia‘u ia tavini na roto i te rave‘a haamaitaihia. Te faaite papû nei au e e peropheta te peresideni Thomas S. Monson na te Fatu i teie mahana i ni‘a i te fenua nei. Te popou nei au i te mea e, ua riro mau oia ei tavini mai te Mesia te huru no te taata tata‘itahi, te opereraa i te tamahanahana e i te here i te mau taata tata‘itahi atoa.
Te popou nei au i roto i te mau taviri o te autahu‘araa e i roto i te mau hiero e itehia i te fenua nei i nehenehe ai tatou tata‘itahi ia fana‘o i te mau oro‘a mure ore e i te mau fafauraa. Te tahi o to‘u mau mahana tiretiera apî o te mau faaipoiporaa hiero o ta‘u iho mau tamarii, e te faatereraa to‘u papa i teie oro‘a mo‘a.
Te popou nei au i roto i te puai o te feia apî a mata‘ita‘i ai au ia ratou ia faaî i te mau hiero no te raveraa i te mau oro‘a bapetizoraa no te feia tei pohe. Ua here au i to ratou mâ i te haapa‘oraa i te mau ture teitei o te arata‘i i te hiero e i ta ratou faaineineraa no te mau misionare faaroo e ia riro ei mau metua vahine e ei mau metua tane parau-ti‘a.
Te popou nei au i te mea e e tamahine au na te Metua i te Ao ra o tei here ia‘u. Ua haapii au no ni‘a i to‘u hiro‘a hanahana i to‘u vai apî-roa-raa i pihai iho i to‘u mama. Aita i maoro a‘e nei, ua ite au i ta‘u mootua iti e toru matahiti i te haapiiraa i to’na iho huru i piha’i iho i to’na mama. Ua haere Eliza e ta‘oto ma te oto. Aita roa oia e nâ maori râ, ia faati‘a to’na mama i ta’na aamu au roa e te parau mau no ni‘a i te hoê pô taa ê a muhumuhu ai te Metua i te Ao ra i roto i te aau o to’na mama e e varua taa ê mau o Eliza e e misioni taa ê ta’na i muri nei.
E popou rahi to‘u i roto i ta‘u ohipa ei vahine atu‘atu, i ti‘a ai ia‘u ia faaite i to‘u ihotumu hohonu ei vahine. Ua faahoruhoru tamau te reira ia‘u ia anaanatae teie vahine, teie tamahine apî e tae noa’tu i teie tamahine iti i te hoê mana‘o e i te paari i roto i te atu‘aturaa. E ere te reira i te ohipa matamua noa a te hoê metua vahine, e tuhaa atoa râ te reira no to tatou ihotaata e « ta tatou titauraa no te oraraa na mua a‘e, no teie nei oraraa, e no a muri atu ». (« Te Utuafare: E Poro‘i i to te Ao Nei », Liahona, Atopa 2004, 49.) Te atu‘aturaa o te haapiiraa ïa, te faaitoitoraa i te faarahiraa, te haapapû i te tupuraa, te faaamuraa e te atu‘aturaa. O vai o te ore e himene i te oaoa ia horo‘ahia mai teie nei ohipa haamaitaihia ?
Ua faaohipa te mau papa‘iraa mo‘a i te parau haapii e piti taime, e i roto i teie nei na tumu e piti te parau ra no te hopoi‘a a na metua no te faaamuraa i ta ratou mau tamarii i roto i te « paari e te a‘o a te Atua ra » (Ephesia 6:4 ; Enosa 1:1).
Ua a‘o atoa te peresideni Hinckley e, ia riro te mau tane e te mau vahine ei na haapii. Teie ta’na i parau: « Eaha ïa te huru nehenehe mai te mea e… e riro te sotaiete o ta tatou e ora nei mai te mea e hi‘o te metua tane… e te metua vahine tata‘itahi i ni‘a i ta ratou mau tamarii… ei mau tao‘a horo‘a no ô mai i te Atua o te ra‘i ra… e ia faaamu ia ratou na roto i te here mau e i te paari e i te a‘o a te Fatu » (« These, Our Little Ones », Liahona, Titema 2007, 9).
E mea oaoa na‘u te utuafare. Aita i maoro a‘e nei ua oaoa vau i te fanauraa o te hoê mootua apî i roto i te hoê utuafare tei ite e, e hopoi‘a hanahana na te mau metua i te faaamuraa i ta ratou mau tamarii i roto i te here e te parau ti‘a. Te vai ra tera maere i roto i te mau taea‘e paari no ni‘a i te taeraa mai to ratou tuahine teina i roto i teie nei ao. Ta ratou haapiiraa matamua no ni‘a i teie tumu parau mo‘a, na te mau metua here ïa i haapii ia ratou i roto i te hoê utuafare mo‘a, i roto i te huru tiretiera o te apee mai i te fanauraa o te hoê varua apî i roto i te tahuti nei, e i roto i te faanahonahoraa mure ore a to tatou Metua. I te tahi a‘e pae, ia ho‘i mai ta maua mootua tamahine na te fare haapiiraa mai i te mahana i muri mai, ua faaite maira oia e, ua apo mai oia i taua mahana ra i roto i te piha haapiiraa « hoê parau rahi apî oia ho‘i te maferaraa ». Ua pe‘ape‘a vau i te mea e, i roto i to ratou matahiti apî roa, e no te paruru hoi ia ratou, ua haamata te mau tamarii i te ite i te pae ino o te tumu parau ta ratou i aparau ma te nehenehe i te pô na mua’tu. Ua oaoa vau i te oaoa aitâ i itehia a‘e nei e au, no te hoê utuafare tei niuhia i ni‘a i te mau haapiiraa a Iesu Mesia.
Ua haapii Iakobo e ua oaoa te Fatu i roto i te « vahine tai‘ata-ore » (Iakobo 2:28). Te popou nei au i roto i te tai‘ata-ore e i te mâ o te mau tane e o te mau vahine. Ua ta‘i te Fatu i To’na iteraa e ua ofatihia te ture no te viivii-ore e ua tahitohitohia te peu mâ i te mau vahi atoa o teie nei ao ino. Ua horo‘a te Fatu na Ta’na mau tamarii te hoê oaoa na roto i te rahi mau, te hoê autaea‘eraa here, mai ta ta‘u mau mootua e haapii nei. Te popou nei au i roto i te parau poro‘i i to te ao nei no ni‘a i te utuafare o tei faaara mai e, « te taata atoa o te ofati i te mau fafauraa no te viivii-ore, o te hamani ino i to ratou hoa faaipoipo e aore râ, i ta ratou mau tamarii e aore râ ho‘i o te ore e faaoti i ta ratou mau hopoi‘a utuafare, ia tae i te hoê mahana e ti‘a mau â ratou i mua i te aro o te Atua ia haavahia ».
Te popou nei au i roto i te mau hi‘oraa maitata‘i o te feia i roto i te mau papa‘iraa mo‘a o tei ora na roto i te faaroo, i te omuaraa mau o to ratou oraraa i ni‘a i te Fenua nei. E te mau taime atoa a haere ai au e o Aberahama e o Isaaka na te puromu o te Mou‘a o Moria, e ta‘i au, ma to‘u ite e aita Aberahama i ite e te vaira teie melahi e teie mamoe i roto i te puaihere i te hoperaa o te mahana. Tei ropu tatou tata‘itahi i te puromu o te fenua nei, e aita tatou i ite i te hopearaa o to tatou iho mau aamu. Area râ, tatou atoa mai ia Aberahama, e haamaitaihia tatou i te mau semeio.
Te popou nei au i roto i te mau aroha e i te mau semeio a te Fatu (hi‘o « Bless Our Fast, We Pray », Hymns #138). Ua ite au e e parau mau To’na aroha faaherehere rahi e Ta’na mau semeio rarahi e aore ra, iti. E tae mai te reira na roto i Ta’na rave‘a e i To’na taime mau. I te tahi mau taime, eita e tae mai e tae roa’tu ua rae‘ahia ia tatou to tatou faito. Ua rave te mau pĭpĭ a Iesu i te ohipa rahi i ni‘a i te Miti no Galilea i te hoê-noa-raa i taua ru‘i ra i te mata‘i na mua maira hou Iesu i tae mai ai no te tauturu ia ratou. Aita Oia i tae vave mai e tae noa’tu i te « maha o te araraa o te ru‘i », oia hoi, i te aahiata. Area râ, ua haere mai Oia (hi‘o Mareko 6:45-51). To‘u iteraa papû oia ïa, e tae mai te semeio noa’tu i te tahi taime e tae mai i te maha o te araraa o te ru‘i ra.
I teie nei taime, te faaohipa nei au i to‘u faaroo e i ta‘u mau pure i te tia‘iraa i te mau semeio no te feia tei herehia e o tei roohia i te ma‘i, tei rohirohi i te pae emotionare, e o tei hahi ê i te pae varua. Te popou nei au i roto i te here o te Fatu no Ta’na mau tamarii tata‘itahi e i roto i To’na paari i te faati‘araa ia tatou tata‘itahi ia pee i to tatou mau iteraa rau i te tahuti nei.
E inaha, te popou nei au, hau atu i ta‘u e nehenehe e parau, i te here mure ore e i te tauturu tamau a ta‘u tane faaipoipo e i te mau pure e i te mau patururaa a ta‘u mau tamarii e mau metua i roto i teie mau matahiti taviniraa ei peresideni rahi no te Feia Apî Tamahine.
« Inaha, te popou nei ta‘u varua i te mau mea o te Fatu » (2 Nephi 4:16) – Ta’na mau ture, To’na ora, To’na here. Te popouraa i roto Ia’ na o te iteraa ïa i To’na rima i roto i to tatou oraraa. Ta tatou ohipa i roto i te evanelia, o te raveraa ïa i te mea maitai e i te hereraa e te popouraa i te mea maitai. Ia popou tatou i te taviniraa Ia’na, e popou atoa ïa to tatou Metua i te Ao ra i te haamaitai ia tatou. « O Vau o te Fatu… e mea au na‘u te faatura ia ratou o te tavini mai ia‘u mai te parau-ti‘a e te parau mau hoi e tae noa’tu i te hopea » (PH&PF 76:5). Te hinaaro nei au ia vai parau-ti‘a noa i To’na aroha. « Ua here au i te Fatu ; e te popou nei to‘u varua i roto Ia’na », (« I Love the Lord », Jackman Music Corporation), na roto i te i‘oa o Iesu Mesia, amene.