Te mau peu tumu parau-ti‘a
E riro anei te mau peu tumu o ta tatou e hamani nei no to tatou mau utuafare ei mea ohie no ta tatou mau tamarii ia pee i te mau peropheta ora ?
E maoro noa’tu to‘u haamana‘oraa, e tape‘a to‘u papa i te hoê tape‘a rima ofa‘i uteute i to’na rima aui. E ua horo‘ahia i to‘u tu‘ane ra. Te mana‘o nei au e e riro te reira mai te hoê peu tumu i roto i to‘u utuafare – te hoê faufaa ai‘a e hee mai tera u‘i e tera u‘i. E riro ïa ei peu tumu maitai, e te mau haamana‘oraa i amuihia i te reira.
Te vai nei ta tatou tata‘itahi mau peu tumu i roto i to tatou mau utuafare. Vetahi, e faufaa materia noa. Vetahi râ, e mau auraa hohonu ïa. Te mau peu tumu faufaa roa o te mau peu tumu ïa i tuati i te huru o to tatou oraraa, e e vai ïa te reira e a muri noa’tu mai te mea e, ua faauruhia e ua hamanihia te oraraa o ta tatou mau tamarii. I roto i te Buka a Moromona, e tai‘o tatou no ni‘a i te mau Ati Lamana o tei faaahoahohia e te mau peu tumu o to ratou ra mau metua. Ua parau te Arii Beniamina e, e feia teie aita roa’tu i ite noa‘e i te mau parau tumu o te evanelia: « e aita atoa ho‘i ratou e faaroo i te reira ia haapiihia’tu, no te mea te tamau ra ratou i te mau parau tutuu hape i tuuhia mai e to ratou ra mau metua » (Mosia 1:5).
Eaha te huru o ta tatou mau peu tumu ? Vetahi, no ô mai ïa i te mau metua e i teie nei, te hee nei te reira i ŏ i ta tatou mau tamarii. O te reira anei ta tatou e hinaaro no ratou ? Ua niuhia anei te reira i ni‘a i te mau ohipa parau-ti‘a e te faaroo ? E mau mea materia ana‘e anei e aore râ, no te mure ore anei ? Te faatupu ra anei tatou i te mau peu tumu parau-ti‘a e aore râ, e farii noa anei tatou i te mau mea e tupu i roto i to tatou oraraa. Ua hamanihia anei ta tatou mau peu tumu ei pahonoraa i te mau poro‘i a to te ao nei e aore râ, e mea faaûruhia anei te reira e te reo iti ha‘iha‘i o te Varua ? E riro anei te mau peu tumu o ta tatou e hamani nei no to tatou mau utuafare ei mea ohie no ta tatou mau tamarii ia pee i te mau peropheta ora e aore râ, e riro anei te reira ei fifi no ratou ?
Nahea tatou ia faaoti e, eaha ïa te huru o ta tatou mau peu tumu ? Ua horo‘a mai te mau papa‘iraa mo‘a i te hoê faanahoraa rahi. I roto i te buka a Mosia 5:15 te na ô ra e, « no reira i hinaaro ai au ia tamau maite outou ma te aueue-ore, ia rahi â te rave i te ohipa maitata‘i ».
E mea au na‘u teie parau no te mea, ua ite tatou e ua faatumuhia te mau peu tumu e rave rahi mau matahiti i ma‘iri a‘e nei e ua tapiti-noa-hia’i teie mau ohipa na ni‘a e na ni‘a iho. No te mea e mea aueue-ore e aita tatou e taui-haere-noa i te raveraa i te mau mea maitata‘i, e riro ïa ta tatou mau peu tumu i te faatumuhia i ni‘a i te parau-ti‘a. No reira te vaira ta‘u uiraa. Nahea tatou e ite ai i te maitai hau atu â, i te mea maitai a‘e ? Teie faahou â te hoê irava no te haamaramarama ia tatou e itehia ïa i roto i te 3 Nephi 6:14. Te faaite ra no te feia « o tei faafariuhia mai na i te faaroo mau ; aita roa’tu ïa ratou e faaru‘e i te reira, e feia mau papû hoi ratou, e te aueue-ore, e te au roa to ratou mana‘o i te haapa‘o itoito i te mau faaue a te Fatu ra ».
Ua ite tatou e, ia faafariuhia tatou i roto i te « faaroo mau » ei reira ïa te mana no te faaea eta‘eta raa e te aueue-ore e tupu ai no te haapa‘oraa i te mau faaueraa. Teie faafariuraa o te hoê ïa ti‘aturiraa papû i roto ia Iesu Mesia ei Faaora no tatou. Ua itehia teie iteraa papû i roto i te Buka a Moromona, oia te tahi atu ite no Iesu Mesia. E haere apipiti oia e te Bibilia i te faaiteraa i te hanahana e i te misioni a Iesu Mesia oia’toa te iteraa papû no te Metua Ora i te Ra‘i ra. Ua papa‘i te mau peropheta tata‘itahi i teie na buka mo‘a e ua horo‘a i to’na iho iteraa papû no teie mau mea, oia’toa te mau haapiiraa no ni‘a e nahea tatou ia ora i to tatou mau oraraa ia nehenehe ia roaa te Taraehara e ia imi i te hau o te taata iho e te oaoa.
Te vaira te hoê rave‘a no te faafariu i te taata iho. E tae mai te reira na roto i te faaiteraa a te Varua a tai‘o ai tatou i te mau papa‘iraa mo‘a o tei faaite papû ia Iesu Mesia. E tae mai te reira a pure e a haapae ai tatou. E tae mai te reira mai te mea te vaira to tatou hiaai hohonu i te ite i te parau-mau. Titauhia tatou ia iriti noa i to tatou itoito i te imiraa i te parau mau, eiaha râ no te faaite noa i ta tatou mau ohipa na roto i te imiraa i te mau hape i roto i te mau papa‘iraa mo‘a e i te mau haapiiraa a te mau peropheta e aore râ, a te Ekalesia iho. E mea ti‘a ia faafariu i ta tatou tautoora i te faarooraa i te auaharaa a te Varua i ta te ao nei. E mea ti‘a ia iriti tatou i to tatou aau e i to tatou feruriraa, e ia farii te hinaaro o te Fatu, e mai te mea e ti‘a, ia taui i to tatou oraraa. E tae mai to tatou iho faafariuraa ia haamata tatou i te oraraa mai ta te Fatu e hinaaro ia tatou ia ora – ma te tape‘a eta‘eta e te aueue-ore i te haapa‘oraa i te mau faaueraa, eiaha noa te mau faaueraa o ta tatou e hinaaro. E parauhia te reira e faanahoraa no te tamâraa, a faaitoito ai tatou i te mau mahana atoa ia maitai roa’tu i to nanahi ra. No reira, e riro ta tatou mau peu tumu ei mau peu tumu parau-ti‘a.
E ani au ia tatou paato‘a ia feruri no te hoê taime iti i te mau peu tumu i roto i to tatou mau oraraa e nahea te reira i te haaputapu i to tatou mau utuafare. Ta tatou mau peu tumu no te faaturaraa i te mahana Sabati, te pureraa utuafare, te tai‘oraa a te utuafare i te papa‘iraa mo‘a, te taviniraa e te faaoaoaraa i roto i te Ekalesia, oia’toa te mau hoho‘a no te faatura e no te haavare-ore i roto i te utuafare, e riro te reira ei faufaa rahi i ni‘a i ta tatou mau tamarii e i to ratou ananahi. Mai te mea ua niuhia ta tatou hopoi‘a metua i ni‘a i te mau haapiiraa o te mau papa‘iraa mo‘a e i ni‘a i te mau peropheta o te mau mahana hopea nei, eita tatou e hahi ê. Mai te mea te vai ra te mau tamataraa, e hi‘o matamua roa to tatou aau i te mau arata‘i a to tatou Metua i te Ao ra, e ti‘a ïa tatou i te hoê vahi papû. Mai te mea ua ite ta tatou mau tamarii ihea roa tatou i te ti‘araa, e e ti‘a tamau tatou i te pae o te Fatu, ua ite ïa tatou e teihea râ tatou i te ti‘araa.
I teie nei, te ohipa faufaa roa o te raveraa ïa ma te tauiui ore i teie mau mea. Eita tatou e maitai roa, eita atoa to tatou mau utuafare e pahono ti‘a mai area râ, e patu tatou i te hoê niu papû no te mau peu tumu parau-ti‘a ia nehenehe ta tatou mau tamarii e turu‘i i ni‘a iho. E nehenehe ratou e mau i teie niu ia fifi noa’tu ratou e e nehenehe ratou e ho‘i i taua niu ra mai te mea e hahi ê ratou i te hoê tau.
I te pae hopea o te oraraa o to‘u papa, ua horo‘a mai oia e rave rahi atu â mau mea ia matou, ta’na mau tamarii, i teie tape‘a ofa‘i ute‘ute. Ua paari to’na tino area râ, e ti‘a papû oia mai te hoê pou itoito, te hoê hi‘oraa no te parau-ti‘a e te parau mau. I roto i to’na oraraa, ua mau na oia i te mau peu tumu o tei haapuai ia matou i teie mahana, noa’tu e aita faahou oia i pihai iho ia matou. Ua mau papû oia ma te « eta‘eta e te aueue-ore, e te mana‘o i te haapa‘o itoito i te mau faaue a te Fatu ra ».
E na reira atoa anei tatou no ta tatou mau tamarii ? Eaha ïa te faufaa ai‘a o ta tatou e vaiiho mai na ratou i teie mahana ? Eaha ïa to ananahi ? E nehenehe te reira e haamata na roto ia tatou. E î anei to ratou aau e to ratou oraraa i te mau peu tumu no te faaohieraa ia ratou ia farii e ia pee i te Fatu e i te mau peropheta o te mau mahana hopea nei ? E nehenehe anei tatou ei mau utuafare e titau i teie mau haamaitairaa tei fafauhia mai « ia haamau te Mesia te Fatu ra, te Atua puai hope ia outou no’na iho, ia arata‘ihia outou i te ra‘i, e ia noaa ia outou te ora vai maite e te mure ore hoi » (Mosia 5:15).
E te mau taea‘e e te mau tuahine, ua ite au e e nehenehe ! Ua ite au e ua here te Atua ia tatou e te tia‘i nei ia tauturu ia tatou ia haere Ia’na ra. Ua ite tatou tata‘itahi e, e parau mau teie mau mea. Ua ite au e parau te reira ! Ua ite au e te ora nei te Atua ; e o Iesu Mesia Ta’na Tamaiti e to tatou Ora. E parau mau te evanelia a Iesu Mesia ; ua faaite papû atoa mai te mau papa‘iraa mo‘a i te reira. Te vai nei ta tatou peropheta ora i teie mahana – te Peresideni Thomas S. Monson. Ua faaineinehia oia e ua afa‘ihia mai i teie nei mau mahana hopea nei no te arata‘i i te Ekalesia a te Fatu.
A mau papû ai tatou « ma te eta‘eta e te aueue-ore » i te haapa‘oraa i te mau faaueraa a te Fatu, ua papû ïa e, e roaa te mau haamaitairaa o te ra‘i no tatou iho e no to tatou mau utuafare.
Te pure nei au ia ite tatou i te reira i roto i te hohonuraa o to tatou aau e i to tatou mau oraraa, na roto i te i‘oa o Iesu Mesia, amene.