Elder Allan F. Packer

No te Hitu Ahuru

Te haamana‘o nei Elder Allan Forrest Packer e ei tamarii 10 e aore râ, 12 matahiti, aita oia e mana‘o ra e, te pahonohia nei ta’na mau pure. I te hoê râ mahana a rave noa’i oia i te ohipa i pihai iho i to’na papa o Boyd K. Packer, peresideni no te Pŭpŭ no te Tino Ahuru Ma Piti Aposetolo, ua faaite oia i to’na hepohepo.

Ua haapii to’na papa ia’na na roto i te faaauraa, ma te parau atu e, eita te feia faahoro manureva e faaohipa noa i to ratou fare amarara ia tere ratou tera râ, e haapiipii noa râ ratou ia mau noa e nahea ia faaohipa i te reira. Ua faaitoito te peresideni Packer i ta’na tamaiti ia pure tamau noa, ia faaoroma‘i noa e ia vai noa te faaroo mai te mea e titauhia te hoê pahono, e farii mau oia i te reira.

« Ua tauturu mau teie haapiiraa ia‘u i roto i te mau matahiti matamua no te faatupu i to‘u iteraa papû », o te parau ïa a Elder Packer n pii-noa-hia’tura i roto i te pŭpŭ matamua no te Hitu Ahuru.

Ua fanauhia Elder Packer i te Oire no Brigham, i Utaha, i te Mau Hau Amui no Marite i te 7 no tiurai 1948, ia Boyd Kenneth Packer e ia Donna Smith Packer. Noa’tu e e na taata tumu raua ta’na vahine Terri Bennett Packer no Utaha, ua farerei ra raua i Boston Massachusetts, i te Mau Hau Amui no Marite, i reira to raua toopiti atoa ra haereraa i te haapiiraa tuarua. I muri mai i te misioni a Elder Packer i te Misioni no Andes i Colombia-Venezuela, ua faaipoipohia raua Terri i roto i te hiero no Roto Miti i te 1 no tiunu 1970. E va‘u a raua mau tamarii e 17 mootua.

Ua roaa te parau tu‘ite tuarua nui a Elder Packer i roto i te ohipa ‘ihi uira i te Fare Haapiiraa Tuatoru no Brigham Young. Ua rave oia i te ohipa uira e ua tavini ei peresideni mono no te mau taiete e rave rahi.

Ua tavini atoa Elder Packer i roto e rave rahi mau pi‘iraa i roto i te Ekalesia, oia’toa ei episekopo, ei Ti‘a Faatere no te Scouts, ei tauturu i roto i te peresideniraa tĭtĭ, ei peresideni misioni no Málaga i Paniola, e ei melo tomite rahi no te Feia Apî Tamaroa.

« Ua ite au e, e parau mau teie nei ohipa », o te parau ïa a Elder Packer. « O te Faaora to tatou Arai. Ua iriti Oia i te uputa e ua horo‘a ia tatou te rave‘a no te ho‘i faahou i to tatou Metua ra. Te oaoa nei au i te tautururaa Ia’na i te raveraa i Ta’na ohipa ».