Te iritiraa i to tatou Aau

Elder Gerald N. Lund

No te Hitu Ahuru

E faariro tatou i te reira ei tuhaa no ta tatou tutavaraa o te mau mahana atoa no te iriti i to tatou aau i te Varua.

I teie mahana, ua hinaaro vau i te a‘o atu no ni‘a i te faufaa rahi o te iritiraa i to tatou aau i te Varua Maitai.

I muri mai i te bapetizoraa, e haamauhia tatou e e horo‘ahia mai te Varua Maitai. E horo‘araa hanahana teie. E tamahanahana te Varua Maitai, e haapii, e faaara e e faauru ia tatou. Ua haapapû ohie mai Nephi i te reira: « Ia tae ana‘e outou i taua e‘a ra, e farii hoi i te Varua Maitai, na te reira e faaite ia outou i te mau mea atoa ta outou e rave ».¹ Hinaaro roa tatou i te tauturu a te Varua Maitai mai te mea e hinaaro tatou ia manuïa e ia paruruhia mai ta te Aposetolo Paulo i parau e « te ati rahi i taua anotau hopea nei »² o ta tatou e ora nei.

E taata varua te Varua Maitai, i nehenehe ai Ia’na ia puhapa i roto i to tatou aau e ia aparau afaro mai i to tatou varua.³ Ua faaauhia te reo o te Varua mai te hoê reo iti ha‘iha‘i, e te mărû.⁴ Nahea te hoê reo e ha‘iha‘i ai ? No te aha i faaauhia’i i te hoê reo iti mărû ? No te mea, e mea tamau te Varua i te paraparau i to tatou feruriraa e i to tatou aau,⁵ eiaha râ i to tatou tari‘a. Ua parau te Peresideni Boyd K. Packer e: « E paraparau mai te Varua Maitai na roto i te hoê reo o ta oe e farii i ta oe e faaroo ».⁶

E ite tatou i teie mau mea i roto i to tatou aau. I roto i te mau papa‘iraa mo‘a ua haapii mai te mau peropheta e, te heheuraa a te taata iho, e mea horo‘ahia ïa i te aau. Hi‘oraa:

Ua haapii Moromona e: « E no te haehaa e te aau mărû e tae mai ai te Varua Maitai ».⁷

Ua parau Alama e: « Te taata e faa‘eta‘eta i to’na ra aau, o te taata iho â ïa e roaa ia’na ra te tufaa iti o te parau ; o te taata râ e ore e faa‘eta‘eta i to’na ra aau, e roaa ia’na ra te tufaa rahi o te parau ».⁸

Ua papa‘i Moronona no te ati Nephi e: « [Ua î to ratou aau] i te oaoa e te hau… no te mea ua riro to ratou aau i te Atua ».⁹

E no te faaohie ua papa‘i Salamo e, « te fatata nei Iehova i te feia aau paruparu ra ».¹⁰

E ere anei e o teie te mau mea o ta tatou e imi nei, e te mau taea‘e e te mau tuahine – ia farereihia mai e te Varua Maitai, ia haafatata mai te Fatu ra ia tatou, ia imi i te oaoa e te tamahanahanaraa i roto i to tatou oraraa ? Mai te mea e nehenehe, i reira ïa tatou e faaau maitai ai i te huru o to tatou aau te ohipa faufaa roa‘e o ta tatou e nehenehe e rave i roto i to tatou oraraa.

E vahi mărû te aau. E haaputapuhia te aau i te mau faaururaa e rave rahi, i na pae e piti, te mea papû e i te mea papû-ore. E nehenehe atoa e haamauiuihia e vetahi ê. E nehenehe e faata‘otohia e te hara. E nehenehe e tamărûhia e te here. I te omuaraa o to tatou oraraa, ua haapii tatou i te haapa‘o maitai i to tatou aau. E ore roa e ti‘a i te hoê ia tomo maori ra ia faati‘a tatou ia’na ia ô atu.

I te tahi taime e riro te aua o ta tatou i haaati i to tatou aau mai te hoê pou iti tei tuuhia Manava ei tapa‘o i ni‘a iho. To vetahi râ, ua haamauiui-ino-roa-hia e aore râ, ua faata‘otohia e te hara, i haaati ai ratou i to ratou aau i hoê aua niuniu e i ni‘a roa i te aua ua paruruhia ïa i te reta. Ua ponaohia te uputa e ua tapa‘ohia i te hoê tapa‘o iti rahi Tabu.

E faaohipa tatou i te mana‘o no te hoê uputa o te aau no te farii i te heheuraa a te taata iho. Ua haapii Nephi e: « Ia parau te taata na roto i te mana o te Varua maitai, na te mana o te Varua Maitai e faatae i taua parau ra i roto i te aau o te tamarii a te taata nei ».¹¹ Ua papa‘i Elder David A. Bednar i te faaohiparaa o te parau i roto. « Ia ite e, e mea nahea te Varua ia faatae i te poro‘i i te aita râ e titauhia ia hopoi i roto i te aau… E inaha… te parau o te hoê poro‘i e o te hoê iteraa no te Varua Maitai e ô noa ïa i roto i te aau mai te mea e faati‘a te taata farii i te reira ia tomo mai ».¹²

No te aha i te aau noa ? No te mo‘a rahi o te ti‘amâraa o te taata, i ore ai te Metua i te Ao ra e haavi i te aau o te taata nei, noa’tu e Mana Hope To’na. E tamata te taata nei i te reira area te Atua ra, eita ïa. Teie râ, e faati‘a te Atua ia tatou ia riro ei mau tia‘i e aore râ, ei mau tia‘i uputa no to tatou iho aau. Ia tae to tatou iho nei mana‘o, e mea ti‘a ïa ia iriti tatou i to tatou aau i te Varua, no te mea eita Oia e haavi Ia’na Iho i ni‘a ia tatou.

Nahea ïa tatou ia iriti i to tatou aau ?

I roto i te A‘oraa i ni‘a i te Mou‘a, ua parau te Faaora e, « e ao to tei mâ te aau e ite ho‘i ratou i te Atua ».¹³ Mai te mea e mea mâ te hoê mea e aita i haaviiviihia e aore râ, aita i faainohia e te hoê noa’tu mea e ere i to te reira. Te mâ o te aau ra o te hoê ïa mea o tei hau atu to’na faataaraa i te faufaa no te fariiraa i te faaururaa no o mai i te Atua ra. No te mea ho‘i e e ere to tatou aau i te mea mâ, te u‘ana rahi o te puai o ta tatou tutavaraa no te iriti i te viivii e aore râ, te tura‘iraa i rapae te mau mea aita e ti‘a ia vai i reira, e rahi atu â ïa to tatou iritiraa i to tatou aau i te Varua Maitai. A haamana‘o na tatou i teie fafau nehenehe a te peropheta Iakobo e: « E outou atoa tei mâ te aau, a faateitei na i to outou upoo i ni‘a ia noaa te parau mauruuru a te Atua ra, ia faaîhia i to’na ra aroha ».¹⁴

I roto i te Fare Tape‘araa no Liberty, ua farii te peropheta Iosepha Semita i te hoê heheuraa o tei faaite i te huru o te tahi aau:

« Inaha, e rave rahi te parauhia area râ, aita re‘a e ma‘itihia ra. E eaha te tumu aita ratou e ma‘itihia ra ?

« No te mea ua faatumuhia’tu to ratou mau aau i ni‘a i te mau mea no teie nei ao, e te titau nei ratou i te mau faaturaraa o te taata ».¹⁵

Rave rahi feia e ora nei ma te manuïa e te hau i teie mahana. I roto i te Buka a Moromona, e arata‘i tamau ê te manuïa i te taata i te Fatu. Ua faaara Moromona e: « I te tau e haamaitai mai ai oia i to’na taata, e i te faarahiraa i to ratou mau aua, ta ratou mau nănă mamoe, e ta ratou mau nănă puaatoro, e te auro, e te ario, e te mau mea maitatai atoa i to ratou mau huru atoa ra… ei reira ihora ratou e faaeta‘eta‘i i to ratou aau, e e haamo‘e ai i te Fatu ra i to ratou Atua ».¹⁶

Ua faaite te Fatu e toru huru mau no te riroraa hoê aau i faati‘ahia i ni‘a i te mau mea o te ao nei: A tahi, e imi tatou i te tapo‘i i ta tatou mau hara i te haere e tatarahapa i te reira. I muri mai, e imi tatou i te haamaururu i to tatou te‘ote‘o e to tatou mau nounou faufaa-ore i te imiraa i te mau mea a te Atua. Inaha, e haamata tatou i te faaohipa i te mau faatereraa ti‘a-ore i ni‘a ia vetahi ê.¹⁷

Ia ite mai tatou e, ua riro te te‘ote‘o ei huru no te iritiraa i to tatou aau i te mau mea o teie nei ao. E faateimaha te te‘ote‘o i to tatou aau i te mau muhumuhu o te pae varua. Hi‘oraa, ua parau te Fatu e: « Aore au te Fatu, i mauruuru i ta‘u tavini ra ia Sydney Rigdon ; te faateitei atura oia ia’na iho i roto i to’na ra aau, e aita hoi i farii i te a‘oraa, ua faaoto râ hoi i te Varua ».¹⁸ A faaau na i teie nei fafauraa: « Ia vai haehaa noa oe ; e na te Fatu to oe Atua e arata‘i ia oe na to oe rima ra, e e horo‘a’tu ia oe te pahonoraa i ta oe mau pure ».¹⁹

I roto i te fare tape‘araa no Liberty, ua faaite te Fatu i te huru no te hoê aau tei faainohia e te mau mea o teie nei ao: « Inaha, e faananaue atu te mau ra‘i ia ratou iho ; e oto te Varua o te Fatu: e… inaha, hou oia e araara mai ai, ua vai-iho-hia’tu oia ia’na iho ra ».²⁰ Te mau taea‘e e te mau tuahine, i roto i teie « tau pe‘ape‘a mau », eita e ti‘a ia tatou ia faaoto te Varua e ia vai overe noa tatou.

Te parau faahou atu nei au e, na te huru o to tatou aau e haaputapu i to tatou huru no te mau mea o te pae varua. E faariro tatou i te reira ei tuhaa no ta tatou tutavaraa o te mau mahana atoa no te iriti i to tatou aau i te Varua. No te mea o tatou iho te tia‘i no to tatou aau, e ma‘iti ïa tatou ia na reira. Ua ma‘iti tatou i te tuu mai e aore râ, i te tape‘a’tu i rapae. Auaa râ, ua hinaaro te Fatu i te tauturu ia tatou ia ma‘iti ma te paari.

Te opani nei au ma te faaite papû na roto e piti o te mau fafauraa o Ta’na i rave no te feia o te imi i te haere mai Ia’na ra: « No reira, e au mau taea‘e here, e pure atu i te Metua ma te puai hope o te aau ia î outou i teie nei aroha… e ia tamâhia hoi tatou atoa mai ia’na i mâ ».²¹

E te hope‘araa teie faaururaa a Paulo te Aposetolo e: « E ti‘a ia‘u te mau mea atoa nei i te mesia, tei tauturu mai ia‘u ra ».²²

E ani tatou i te Mesia ia haapuai i to tatou aau e ia faî i To’na here, o ta‘u ïa pure na roto i te i‘oa o Iesu Mesia amene.