O Se Valaaulia i Tamaitai Talavou
Elaine S. Dalton (ogatotonu), peresitene; Mary N. Cook (tauagavale), fesoasoani muamua; ma Ann M. Dibb, fesoasoani lua.
E le faigofie le avea ma se “faaaoao o e ua faatuatua.” E manaomia ai taumafaiga i aso taitasi e manatua po o ai i tatou ma po o a foi mea e fai e tagata faatuatua. Matou te fia valaaulia outou e faia ni mea se tolu i aso uma e mafai ona outou maua ai le malosi ma fesoasoani ia te oe e avea ai ma se faaaoao i lou aiga ma uo. I le avea ai ma se au peresitene, o loo matou faia nei mea—i taimi uma lava. Pe tou te mananao la ina ia tatou auai faatasi ai?
Muamua, tatalo i aso uma.
Lona lua, faitau le Tusi a Mamona i aso uma ia le itiiti ifo ma le lima minute.
Lona tolu, ataata i aso uma.
Matou te valaaulia outou e ataata aua ua outou i ai i le lalolagi i lenei taimi maoae lea ua toefuataiina mai ai le talalelei a Iesu Keriso. Ua aoaoina outou e se perofeta a le Atua e faapea, o le a tosina mai tagata lelei o le lalolagi ia te outou i le maualuga o loo “vaaia ai outou e tulaga iloga ma ese—i ni auala fiafia.”1
Mafaufau pe o le a se mea e tupu pe afai e fai e ni tamaitai talavou e faitau afe e pei o oe nei mea e tolu i aso taitasi!
O le tele o tulaga faamanuiaina iloga o le olaga o loo fausia i se faavae o le faia o nai mea laiti i taimi uma i se taimi umi. O nei mea e tolu e laiti ma faatauvaa, ae ia manatua, “o mea faatauvaa ma mea faavalea ua faataunuuina ai mea tetele” (Alema 37:6). Matou te iloa o le a outou iloa faamanuiaga o le faia o nei mea e tolu i aso uma. Ma afai e galo ia te oe i se aso, e mafai ona e toe amataina i le isi aso e sosoo ai.
Matou te molimau atu, afai o le a e tatalo, faitau le Tusi a Mamona, ma ataata i aso taitasi, o le a faamanuiaina oe mo au taumafaiga ma o le a avea oe ma se faaaoao i e ua faatuatua—o se tamaitai talavou e mafai ona faia se eseesega i le lalolagi.