Faatamaoaigaina o Au Suesuega o le Mataupu Faavae ma Feagaiga
O le tausaga lenei ua faailoa mai ai se avanoa matagofie mo i tatou taitoatasi e maua ai ni faamanuiaga maoae e ala i le suesueina o le Mataupu Faavae ma Feagaiga—o se tusi ofoofogia o faaaliga lea na tusia i o tatou aso mo o tatou vaitaimi.
A. Roger Merrill (ogatotonu), peresitene; Daniel K Judd (agavale), fesoasoani muamua; ma William D. Oswald, fesoasoani lua.
O nisi taimi e taua ai o le tusitaulima a le Alii i le Toefuataiga, o le Mataupu Faavae ma Feagaiga o loo i ai “le siufofoga malu ae mausali o le Alii o Iesu Keriso, ua toe fetalai mai ai i le tisipenisione o le atoatoaga o taimi.”1
E toatele tagata o le ekalesia ua fiafia tele i lenei tusi. Fai mai se tasi o tuafafine, “E ese le aoga o faaaliga tuusao o le Mataupu Faavae ma Feagaiga i tagata taitoatasi. Ou te lagona e mafai ona ou soota’i atu i ai.” Na ta’ua e se tasi, “O le Mataupu Faavae ma Feagaiga e fesoasoani ia te au ou te tali atu ai i mea ma te fetaiai ona e le matua maotua tele.” Na saunoa se tasi o uso, “Ou te fiafia i le Mataupu Faavae ma Feagaiga ona e fesoasoani ou te malamalama ai i le perisitua.”
Matou te molimau atu o le Mataupu Faavae ma Feagaiga o le siufofoga moni o le Alii i o tatou aso i fanau taitoatasi a le Atua, ma e oo mai faamanuiaga e tele ia i latou e suesue i ai. Matou te ofoina atu foi ni fautuaga se fa ina ia avea ai au suesuega i lenei tausaga o se aafiaga faamanuiaina, ma fautua atu nisi o auala e mafai ona fesoasoani atu ai le Aoga Sa.
Faitau le Tusi mai le tasi Faavaa i le isi Faavaa
O le Taiala Suesue a le Tagata o le Vasega mo le Mataupu Faavae ma Feagaiga ma le Talafaasolopito o le Ekalesia o loo uunaia tagata ina ia “faitau le Mataupu Faavae ma Feagaiga mai le amataga e oo i le faaiuga”2 i le aluga o le 2009, faapea foi ma le faamaeaina o faitauga mo Aso Sa taitasi, lea o loo faatulagaina i autu.
O le suesue i le faiga lenei e fesoasoani tatou te malamalama ai i anotusi o vaega aoaoina faapea ma vaega lava latou. E saunia ai foi i tatou e auai i se talanoaga anoa i vasega o le Aoga Sa—lea, o le a tuuina mai ai le malamalama faaopoopo ma musumusuga mo i tatou e faaaoga i o tatou lava olaga ma olaga faaleaiga.
I a tatou suesuega o tusitusiga paia i aso taitasi, atonu o le a aoga ia te oe le faamatuuese o se aso se tasi pe lua o vaiaso taitasi e siaki muamua ai vaega o le a talanoaina i le vasega, ona faaauau ai lea o lau faitauga o le Mataupu Faavae ma Feagaiga mai le amataga e oo i le faaiuga.
Faitau ma ni Fesili i le Mafaufau
Na aoaoina e Uso Reneso Moli Palio Matia, o Kuatemala le mana o le faaaogaina o suesuega i tusitusiga paia e maua ai faaaliga faaletagata lava ia mo lona lava olaga.
“Ina ua uma ona afea e le Afa o Mitch ia Amerika Tutotonu i le 2001 lea na matuai faataumaoia ai mea uma, na tele lava ni au fesili na i ai,” o lana tala mai lea. “O le sailia o tali, na ou alu ai i se uo e sili ona ou faaaloalo i ai. Fai mai o ia, ‘Faitau tusitusiga paia. O le a e maua ai tali e sili ona lelei i au fesili.’
“O lenei mea na matuai suia ai lou olaga,” o le faamatalaga lea a Uso Matia. “Ina ua uma ona ou suesueina ia tusitusiga paia mo se taimi umi, na amata loa ona ou maua tali i au fesili. Na mafai ona ou iloa e i ai moni lava le uiga o lo’u olaga. O le taimi lena na ou filifili ai e auauna atu faamisiona.”
E lei umi ae auauna atu Elder Matia i le Misiona a Honduras Tegucigalpa, e fesoasoani atu i isi ia iloa le mana o le suesue i tusitusiga paia.
O le faitau ma ni fesili faapitoa e mafaufau i ai, e valaaulia ai le Alii e musuia ma taitai i tatou i o tatou luitau ma avanoa. Atonu e te manao e tusi i lalo fesili e faaaofia ai ma le agaga tatalo i au suesuega o tusitusiga paia. A o e mauaina tali, atonu o le a e lagona le musuia o oe e faasoa atu lena manatu i le Aoga Sa. E faamalamalamaina tagata o le vasega a o latou faalogo atu i se isi tagata o tuuina mai faalelei se molimau i auala e faaaoga ai e le Alii ia tusitusiga paia e aumaia ai se taitaiga ma se musumusuga patino.
Saili mo Fesootaiga, Mamanu, ma Autu
Na fautua mai Elder David A. Bednar o le Korama a Aposetolo e Toasefululua e faapea, i a tatou suesuega uma o tusitusiga paia, tatou te saili mo fesootaiga, mamanu, ma autu.3
O se faataitaiga o se fesootaiga i le Mataupu Faavae ma Feagaiga o le sootaga lea i le va o lo tatou usiusitai ma faamanuiaga folafolaina. “Ua noatia au le Alii, pe a outou faia mea ou te fai atu ai; a e pe a outou le faia mea ou te fai atu ai, e leai sa outou folafolaga” (MFF 82:10). E sili atu ona anoa a tatou suesuega i tusitusiga paia pe a tatou iloa lenei fesootaiga ma filifili ai e fai le mea ua poloaiina i tatou e le Alii e fai.
O se mamanu o loo i le Mataupu Faavae ma Feagaiga o loo afifi i le natura moni o le tusi lava ia. E pei ona faailoa mai i le folasaga, “O nei faaaliga paia na maua mai o ni tali i talosaga, i taimi o mafatiaga, ma na tutupu mai i tulaga moni o olaga o tagata moni.”4 O faaaliga o ni fesili ma ni tali faapitoa e uiga i mea e silafia e le Tama Faalelagi o le a “sili ona aoga” (MFF 15:6; 16:6) i le tagata lava ia.5 O lenei mamanu o le sailia ma le mauaina o faaaliga faaletagata lava ia, o se tasi lea o auala e mafai ona tatou mulimuli ai i o tatou lava olaga.
O se tasi o autu masani i tusitusiga paia uma o le “Ia saili ia te au ma le filifiliga ona outou maua ai lea o au; ia ole mai ona outou maua ai lea; ia tuitui mai ona toina ai lea ia te outou” (MFF 88:63). O autu faapenei e uunaia ai i tatou e talia ni tiutetauave sili atu mo lo tatou lava aoaoina a o tatou faitau ma mafaufau loloto i afioga a le Atua.
E ui o le Mataupu Faavae ma Feagaiga e le pei lona faitauina o le faitauina o se tala, ae ua lalagaina faatasi i fesootaiga, mamanu, ma autu. O se tasi o faamanuiaga o le talanoaina faatasi o tusitusiga paia i le Aoga Sa o le, e sili atu ai ona tatou nofouta i nei manatu a o tatou fefaasoaai i o tatou lava lagona ma faalogo atu i manatu o isi.
Saili ina Ia Faamanuiaina ma Olioli Faatasi
Ua fetalai mai le Alii e faapea, pe a aoaoina tagata o le Ekalesia ma aoao atu le tasi i le isi e ala i le Agaga, “e faamanuiaina ma olioli faatasi i laua uma” (MFF 50:22). E tutupu aoaoga mamana o le talalelei ma aoaoga musuia pe a tau fai malamalama faiaoga ma tagata aoao, o le faiaoga moni i soo se vasega o le Ekalesia o le Agaga Paia lea, ma o le auai i talanoaga i le potuaoga e valaaulia ai le Agaga e molimau atu.
I le aoaoga mo taitai i le lalolagi atoa ia Fepuari 2007 e faatatau i le aoao atu ma le aoaoina, na valaaulia ai i tatou e Elder Jeffrey R. Holland o le Korama a Aposetolo e Toasefululua ina ia tatou mafaufau i ni auala sili atu mo le aoaoina o le talalelei. Ona ia faataitai maia lea o le auala e mafai ai e faiaoga musuia ona valaaulia tagata o le vasega ina ia avea o ni tagata e auai i le faatinoina o talanoaga faalevasega nai lo le na ona nofonofo ai.
Na saunoa Elder Holland, “Afai o le a tatou fesoasoani i le tagata aoao e tauaveina le matafaioi o le aoaoina, ma afai o le a tatou molimau atu i mea moni sa tatou aoao atu, o le a faamautuina e le Atua i o tatou loto ma loto o tagata o a tatou vasega le savali o le talalelei a Iesu Keriso.”6
A o suesue ma le agaga tatalo tagata o le vasega i le vaiaso atoa ona latou faitau faatasi lea mai tusitusiga paia ma fefaasoaai i manatu, o le a molimau atu le Agaga Paia ma molioo atu “i loto” (2 Nifae 33:1) o tagata taitoatasi o le vasega ia mea tonu e moomia ona ia iloa ma fai (tagai 2 Nifae 32:3–5).
O Se Valaaulia Patino
A o tatou suesue ma aoao mai le Mataupu Faavae ma Feagaiga i lenei tausaga, o le a faapea ona faamalolosia o tatou faatuatua i le Tama Faalelagi ma Iesu Keriso ma o le a faateleina foi a tatou molimau ia Iosefa Samita o se perofeta o le Toefuataiga a le Atua. O le a tatalaina e le Alii lo tatou malamalama, ma o le a avea tusitusiga paia o se vaega e sili atu ona taua i o tatou olaga.7
I le amataga o lenei tausaga fou, matou te valaaulia outou ina ia tatou auai faatasi a o tatou fiafia i le “sailia o nei poloaiga aua ua moni ia ma faamaoni lava, ma o valoaga uma ma folafolaga o i ai o le a faataunuuina” (MFF 1:37).
E tutupu aoaoga mamana o le talalelei ma aoaoga musuia pe a tau fai malamalama faiaoga ma tagata aoao, o le faiaoga moni i soo se vasega o le Ekalesia o le Agaga Paia lea, ma o le auai i talanoaga i le potuaoga e valaaulia ai le Agaga e molimau atu.
Ata na tusia e Craig Dimond
Mataupu Faavae ma Feagaiga ma le Talafaasolopito o le Ekalesia
Taiala Suesue a le Tagata o le Vasega