Faatuatua e Asaina ai le Vaitafe
“Sa aapa mai Lona aao mai luga, sa tago mai ia te au, ma sa aumaia a’u ai vai e tele. Sa ia laveai mai ia te au ai le tagata malosi na ita mai” (Salamo 18:16–17).
Na tutu Lafaeli Mateo ma lona atalii o Ualikona (ua lauiloa ia “Uali”), i le pogisa o se aoauli matagi ma tilotilo atu i le tatafe o le vaitafe ua pa ona o timuga. O Lafaeli, o le fesoasoani muamua i le au peresitene o le paranesi, ae o Uali, o le peresitene o le korama a le au toeaina i le paranesi, sa la foi atu i le fale ina ua maea se Aso Sa na pisi i fonotaga i lo latou falesa i San José de Ocoa i le Ripapelika Tominika.
Na susu pala i laua i le timu a o la sopoia le vaitafe ua pa o Río Ocoa lea na mafua ai ona poloka le auala i le va o le falesa ma lo latou fale. A oo i le vaitau mago, o le savali sopo e 6-kilomita (4-maila) e faaifo mai le falesa i le isi itu o le vanu ona ae lea i luga i lo latou fale i le isi itu, e masani lava ona alu ai se itula. Ae a pa loa le vaitafe i le vaitau o timuga, ona faaaoga lea e Lafaeli ma lona aiga se auala ‘alo e tolu itula e o ai, 15-kilomita (9-maila) le mamao e sue ai se itu e fai si saogalemu latou te asaina ai le vaitafe.
Ua tele ni taimi ua tea na faia ai e Lafaeli lea malaga. Na ia sopoia le vaitafe i aso uma lava mo le 12 tausaga e alu ai e faigaluega. O le valaauina i le mavae ai o le lua masani talu ona papatisoina e avea ma peresitene o le paranesi, o se valaauga na ia umia mo le ono tausaga, sa na ona faateleina ai o nei malaga. Na sosoo atu ma lena se valaauga e avea ma peresitene o le korama a le au toeaina. Ona toe valaauina foi lea o ia i le au peresitene o le paranesi.
Ae e lei avea lona masani i le vaitafe ma mea na tuuitiitia ai lona matautia, ma o le aave o vaitafe e pa, e matuai lamatiaina lava e pei lava o le vaitafe tele o loo latou fafagaina. E lei leva atu, na pa ai le vaitafe ma tafea ai se tasi o o latou tuaoi, ma na faapea ona maliu ai i le aave o tafega.
Na faataututu le tama ma le atalii i autafa o le vai; ona savali atu ai lea o Lafaeli i totonu o le vai. Sa le matua lautele tele le vaitafe, ae ona e tele naua ni vai e tatafe mai i ai, o lea na matuai loloto ai lava. Na muamua lava toso e le vai malulu ma le aave ona tulivae, sosoo ai ma ona puimanava, ma e lei umi ae oo i lona fatafata.
Na iloa e Lafaeli ua pagatia o ia. Na maseesee ma lē gatusa maa o le auvai, ma o le malosi o le tafe na lamatia ai le tutu o ona vae. O lona taunuu i le afa o le vaitafe, na ia faaaoga ai lona malosi uma e tu sao ai i luga, ae na ia iloa le leai o sona malosi e alu ai i luma po o tua foi.
E fetaui lava lona manatu ifo ua le mafai ona ia toe faatautee atu i le tatafe o le vai, ae ona lagonaina loa se uunai mai tua lea na lafotu atu ai i luma i le isi ituvai. A na le oo lava i le isi itu na te le iloaina o lona faaola sa le o Uali, o le sa tutu lava i le isi itu o le vai.
Na te faafetaia le laveaiina o ia e le mana o lena lava Faaola o le na fesoasoani e laveaiina o ia mai ave malolosi o isi tofotofoga, faaletino ma le faaleagaga.
“Na tele taimi na ou oso ai i totonu o lena vaitafe e pau i lou fatafata ona o le galuega a le Alii,” o le saunoaga lea a Uso Mateo. “Ae ou te lagona lava lo’u nofo aitalafu tele i le Alii. Ua Ia tuuina mai ia te au e le gata o le avanoa e auauna ai ia te Ia ae faapea foi ma le onosai.”
E pei o le Tupu o Tavita, ua iloa e Uso Mateo o le Faaola “ua ia faaea ia te au ai vai e tele. Ua ia laveai mai ia te au ai le tagata malosi na ita mai” (Salamo 18:16–17).
O lena molimau na fesoasoani ia te ia i ona tofotofoga e sili atu le maaleale, ae e tutusa lava le moni, ma le sopoiaina o vaitafe i lena aoauli matagi faatasi ma Uali.
E ui lava i le taugata o le malaga, ae na faamauina lava Uso Mateo; ma lona faletua o Aletakasia; ma le la fanau e toatolu i le malumalu i le 2001. Talu mai lena taimi ua latou ositaulaga lava ina ia lava se tupe e sefe e asiasi atu ai i le malumalu pe a ma le faalua i tausaga taitasi.
O le galuega ma osigataulaga, i le faaletino ma le faaleagaga, ua matua aoga lava ia Uso Mateo.
“E le faigata pe afai ua e iloa le faamoemoega,” o lana tala lea. “O loo matou tau mo se mea e sili atu le musuia nai lo mea o le lalolagi.”
Ata na tusia e Gregg Thorkelson; ata na pueina e David Newman