2009
E i Ai So’u Tama oi le Lagi, O Le e Alofa ia te Au
Ianuari 2009

Taimi o Fetufaaiga

E i Ai So’u Tama oi le Lagi, O Le e Alofa ia te Au

Na saunia e Cheryl Esplin

“O fanau foi outou uma a le Silisili ese” (Salamo 82:6).

E mafai faapefea ona e iloa moni o oe o se atalii/afafine o le Atua? O le toatele o tamaiti latou te le iloa e i ai so latou Tama oi le Lagi, o le e alofa ia i latou ma e mafai ona fesoasoani ia i latou. O le toatele o tamaiti latou te le iloa sa latou nonofo faatasi ma le Tama Faalelagi ae latou te lei o mai i le lalolagi. Latou te le iloa e mafai ona latou tatalo atu ia te Ia. E pei foi o oe, ua galo ia i latou le mea na i ai le olaga i le lagi.

Ua e maua tusitusiga paia, perofeta, le Agaga Paia, ma se aiga e aoao ma faamanatu atu ia te oe le mea na i ai le nonofo faatasi ma le Tama Faalelagi i le avea ai o Sona atalii/afafine. Ua aoao mai tusitusiga paia e faapea, o le lagi na e maua ai au uluai lesona ma na saunia ai e o mai i le lalolagi (tagai MFF 138:56). Ua latou aoao mai foi o le Agaga Paia “o loo molimau mai i o tatou agaga, o fanau i tatou a le Atua” (Roma 8:16). O pese “O Au o se Atalii o le Atua” ma le “Sa Ou Nofo i le Lagi” (Tusipese a Tamaiti, 2–3, 4), e mafai ona faamanatu atu ia te oe po o ai oe ma po o fea foi na e sau mai ai.

E finagalo le Tama Faalelagi ina ia e manatua o Ia o le Tama o lou agaga; na Ia faia oe. Pe a fai au tatalo, ia ole atu i le Tama Faalelagi e fesoasoani atu ia te oe ia e manatua o oe o Lona atalii/afafine. O le Agaga Paia e mafai ona fesoasoani atu ia te oe e te mafaufau ma faia amio o se atalii/afafine o le Atua.

Gaoioiga

Oti ese le faailoga tusi o loo i le itulau U4, ma faapipii i se pepa malo. Gagau faaafa. Faakelu faatasi pito i tua, ma faapu le pito i luga. Nonoa ai se lipine po o se fasivulu i le pu. Faaaoga le faailoga tusi lenei i au tusitusiga paia e faamanatu atu ai o loo i ai sou Tama Faalelagi, o le e silafia oe, alofa ia te oe, ma o le a faafofoga pea ma tali atu i au tatalo.

Manatu mo Taimi o Fetufaaiga

  1. Ia faaaoga le Peraimeri 6, itulau 2, e saunia ai ni ata tusi ma fasipepa o upu mo faatagata o le ata o le faaolataga ma ia faaali atu i le faasologa. Amata i le ta’u atu i tamaiti e alofa le Tama Faalelagi ia i tatou ma ua ia tuuina mai ia i tatou se fuafuaga lelei lava. O Iesu Keriso o le tagata autu lea o le fuafuaga, ma afai tatou te mulimuli ia te Ia, o le a mafai ona tatou toe foi atu e nonofo faatasi ma lo tatou Tama oi le Lagi. Vaevae le Peraimeri i ni vaega se fa, ma tuu atu i ai ni vaega eseese o le olaga. Tufa atu ni pepa, penitala po o vali, mau mai tusitusiga paia, ma se pese po o faatinoga (o loo lisina i lalo ifo). Tuu atu i vaega taitasi e faitau a latou mau, ona tusi lea o se mea se tasi o loo tupu i lena vaega o le fuafuaga. A saunia loa ia vaega, ona aoao atu lea o le ata o le faaolataga i le faasologa sa’o, e faaaoga ai veaga e fesoasoani atu i lou aoaoina o vaega taitasi. Muai olaga: MFF 138:56; Mose 4:2; Aperaamo 3:22–23 (faatinoga: sii i luga lima ma musumusu, “Hurei!”). Olaga i le lalolagi: Aperaamo 3:24–25; Mataupu Faavae o le Faatuatua 1:3 (pese: “Tausi Poloaiga,” Tusipese a Tamaiti, 68–69). Lalolagi o agaga: Alema 40:11–14; MFF 138:30–32. Malo o mamalu: telesitila—MFF 76:81; terasitila—MFF 76:71; selesitila—MFF 76:92–96 (pese: “E Mafai Ona Faavavau Aiga,” Tusipese a Tamaiti, 98).

  2. Faaali atu se ata o se malumalu. Fesili atu: “O le a se mea e te mafaufau i ai pe a e vaai i se malumalu po o se ata o se malumalu? Aisea e te manatu ai e galulue malosi tagata ina ia tausia le matagofie ma le mama o le malumalu?” Ia faamalamalama atu o le malumalu o se nofoaga paia, ma mamalu.

    Fesoasoani i tamaiti e tauloto le 1 Korinito 3:16. Ia faamatala atu e pei foi o le malumalu, o o tatou tino e paia ma mamalu. E tatau ona tatou tausia faalelei. Faaali atu le Ata o le Talalelei 114 (O Tanielu o loo Teena Meaai ma Uaina a le Tupu). Faamatala le mea na tupu ia Tanielu ma ana uo ina ua latou tausia o latou tino e pei o malumalu (tagai Tanielu 1:5–20). Faaali atu ni mea faitino e faatusa i le moe, meaai lelei, faamalositino, mama, ma le tauagafau (faataitaiga: aluga, meaai taumafamata, polo, selu, fusiua). Fai atu i tamaiti e pasi faasolosolo ia mea faitino a o latou usuina se pese e uiga i malumalu. Ia fai ma taofi le musika, ma fai atu i tamaiti o loo uuina le mea faitino e tau mai se mea se tasi e mafai ona latou faia e faia ai o latou tino e pei o malumalu. Molimau atu e pei foi o le malumalu, o o tatou tino e paia ma mamalu.

O loo i ai so’u Tama oi le Lagi, o le e alofa ia te au.

“O fanau foi outou uma a le Silisili ese” (Salamo 82:6)

Ata na tusia e Dilleen Marsh