O Mai e Faalogo i le Siufofoga o se Perofeta
Avea e Faapei o Iesu Keriso
Mai se lauga o le konafesi aoao o Oketopa 2005.
Na faamalamalama mai e Peresitene Uchtdorf le uiga o le atiina ae o uiga faaKeriso.
Na faatonuina e Iesu Keriso Ana au Aposetolo i le amataga o Lana galuega i le tino, “[O mai,] ina mulimuli mai ia ia te au, ou te faia oulua ma fai faiva i tagata” (Mataio 4:19). E manaomia ona tatou “mulimuli ia te Ia,” afai tatou te faia lenei mea, o le a faamanuiaina i tatou e le Faaola e sili atu nai lo mea tatou te mafaia ina ia avea ai ma tagata ua Ia finagalo tatou te oo i ai.
O le mulimuli ia Keriso o le avea atili lea faapei o Ia. O le aoao mai lea i Lona tagata. Ua valaaulia i tatou e le Faaola ina ia aoao i Lana talalelei e ala lea i le ola ai i Ana aoaoga. Na faamatalaina e perofeta anamua ma aso nei i ni upu se tolu: “Tausi ia poloaiga”—e leai se mea e sili atu, pe itiiti ifo.
O loo faamatalaina i tusitusiga paia le tele o uiga faaKeriso e moomia ona tatou atiina ae i le taimi o o tatou olaga. E aofia ai le malamalama ma le lotomaulalao, alofa mama ma le agalelei, usiusitai ma le maelega, faatuatua ma le faamoemoe. O uiga faaKeriso o ni meaalofa mai le Atua. E le mafai ona atiina ae e aunoa ma Lana fesoasoani. O le fesoasoani e tasi lea tatou te manaomia uma lea ua tuuina fua mai ia i tatou e ala i le Togiola a Iesu Keriso.
O le i ai o le faatuatua ia Iesu Keriso ma Lana Togiola o lona uiga o le faalagolago atoa atu lea ia te Ia—faalagolago i Lona mana faavavau, atamai, ma le alofa. Afai tatou te faatuatua ia Keriso, ua lava lo tatou faatuatua i le Alii e mulimuli ai i Ana poloaiga—e tusa lava pe le atoatoa lo tatou malamalama i o latou mafuaaga. I le saili atu ina ia avea atili e faapei o le Faaola, e moomia ai ona tatou toe iloiloina o tatou olaga e le aunoa ma faalagolago i le ala o le salamo moni, ma faalagolago i le atoatoa ona lelei o Iesu Keriso ma faamanuiaga o Lana Togiola.
A o tatou atiina ae uiga faaKeriso i o tatou lava olaga, o lea laasaga ma lea laasaga, o le a latou “lagolagoina i [tatou] e pei o i luga o apaau o aeto” (MFF 124:18). O le faatuatua ma le faamoemoe o le a aveina atu ai i tatou i luga o vasa o faaosoosoga, i luga o mauga o faigata, ma toe aumaia ai i tatou ma le saogalemu i lo tatou taunuuga ma le aiga e faavavau.
Alofa Atoatoa, na saunia e Del Parson, e le mafai ona kopiina