Tutu Malosi ma le Mausali i le Faatuatua

Ia aoao atu mau ma faamatalaga e fetaui ma manaoga o uso o loo e asia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.

Mosaea 5:15: “Ia outou tutumau ma le le mafaagaeetia, ia fua mai pea i galuega lelei, ina ia faamaufaailogaina outou mona e Keriso le Alii le Atua Puleaoao, ina ia aveina atu outou i le lagi, ina ia outou maua le olataga e tumau ma le ola faavavau.”

E Mafai Faapefea Ona Ou Tu Malosi ma le Mausali i le Faatuatua?

3 Nifae 6:14: “Ua iu ina malepe le ekalesia i le nuu uma i lona tolusefulu o tausaga, ae na o le toaitiiti o sa Lamana, o e na faaliliuina mai i le faatuatua moni; ua le mafafai ona tea ese ai, aua ua mausali i latou, ma ua mautu ma le le mafaagaeetia, ua loto ina tausi i poloaiga a le Atua ma le filiga uma.”

Julie B. Beck, peresitene aoao o le Aualofa: “E tatau ona malolosi ma mausali tamaitai o le Au Paia o Aso e Gata Ai i lo latou faatuatua. E mafai ma e tatau lava ona tulaga ese i latou i le ola ai, ma faasoa atu a latou molimau i le Alii o Iesu Keriso ma Lana talalelei toefuataiina. Tatou te faia lenei mea pe a tatou:

“1. Osia feagaiga ma Ia ma tausia.

“2. Agavaa ma tapuai i Ona malumalu.

“3. Suesue Ana aoaoga faavae i tusitusiga paia ma upu a perofeta.

“4. Ia agavaa mo le Agaga Paia, iloa, ma mulimuli ai.

“5. Faasoa atu ma puipuia Lana talalelei.

“6. Faia tatalo faamaoni faaletagata lava ia ma faaleaiga.

“7. Fai afiafi faaleaiga.

“8. Ola i mataupu faavae o le ola faalagolago o le tagata ia te ia lava ma le ola magafagafa mo le lumanai.

“O mea taua nei e tatau ona faia a o lei faia mea e le taua. O faiga faigofie nei, ma le taua e toetoe lava o ni mea masani pe a tatou talanoa ai. … E leai se tasi e mafai ona faia nei mea mo i tatou—o faiga ma tu masani patino nei ua ese ai lo tatou malolosi ma le mausali i mea e sa’o” (“O Le Mea Sili e Faia e Tamaitai o le Au Paia o Aso e Gata Ai: Tutu Malosi ma le Mausali,” Liahona ma le Ensign, Nov. 2007, 109–10).

Cheryl C. Lant, peresitene aoao o le Peraimeri: “E oo mai le liua o le tagata lava ia a o amata ona tatou ola i le mea o loo finagalo le Alii tatou te ola ai—ia tutumau ma le le mafaagaeetia i le tausiga o poloaiga uma, ae le na o poloaiga e fetaui [ma i tatou]. Ona avea ai lea o lenei mea ma se faagasologa o le toe faaleleia, a o tatou taumafai ia sili atu le lelei o aso taitasi nai lo le aso ua mavae” (“Tu Masani Amiotonu,” Liahona ma le Ensign, Me 2008, 14).

Aisea e Tatau Ai Ona Ou Tu Malosi ma Mausali i le Faatuatua?

Elder M. Russell Ballard o le Korama a Aposetolo e Toasefululua: “O lou faatuatua ma lou malamalama i le toefuataiga o le talalelei o le a e maua ai le malosi e te faamaoni ai ma tumau i feagaiga ua e osia ma le Alii, ma le faasoaina atu ma le fiafia o ou malosiaga ma taleni i le fausiaina o le malo o le Atua iinei i le fogaeeleele! O lau molimau ia Iesu Keriso o le taula aupito taua lea e mafai ona e maua e fesoasoani e taofiofia oe, ia tumau ma le mausali, i mataupu faavae o le amiotonu, e tusa lava po o a luitau ma faaosoosoga e ono oo mai i le lumanai” (“Steadfast in Christ,” Ensign, Tes. 1993, 52).

Elder Richard G. Scott o le Korama a Aposetolo e Toasefululua:

“E le mafai ona e mafaufauina mamao i le taimi lenei le mea e mafai ona e ausia i le olaga ona o lena filifiliga ina ia e usiusitai ma le le mafaagaeetia i le Alii. O lou naunau le leoa, ma le malosi e ola i se olaga amiotonu o le a faaopoopo ai ia te oe musumusuga ma le mana e sili atu i ou tulaga gafatia i le taimi lenei e malamalama ai” (“Making the Right Decisions,” Ensign, Me 1991, 34).

Ata na pueina e Henrik Als; vaaiga i tua atu na saunia e Shannon Gygi Christensen