Faaaliga Taleni
“A o le alofa moni, o le alofa mama lea o Keriso, e tumau ia e faavavau; o i latou uma foi ua maua i ai lea alofa i le aso gataaga, e lelei ia te i latou” (Moronae 7:47).
Na tilotilo atu i fafo Marie i le faamalama o le taavale a o tietie atu le latou vasega o le Peraimeri i le fale e tausi ai tagata matutua. Sa faamoemoe o ia e leai se tasi o teineiti na matauina lona tagi.
Ina ua fautuaina e Sister Gibson le faia o se faaaliga taleni mo se aso o gaoioiga, na foliga mai o se manatu manaia. Na o teineiti uma na galulue i le fuafuaina o le taleni o le a ia faasoaina atu. Sa taumafai foi Marie, ae sa le mafai ona ia maua se mea e fai.
O ni teineiti se toalua sa taina le piano. O le isi teine sa taina le vaiolini, ae o le isi na pese. O le isi sa taulotoina se solo na ia tusia, ae o le uo lelei lava a Marie o Shelley, o le a ia faia se tagafiti. Sa lei faafiafia Andrea, ae sa ia faia ni kuki mo tagata uma pe a uma le faaaliga.
O le tele lava o le mafaufau o Marie i le faaaliga taleni, o le tele foi lena o lona talitonu e leai ni ana taleni. Sa le mautinoa foi e ia pe aisea foi na sau ai. Sa taumafai Sister Gibson e faafiafia o ia, i le ta’u atu i ai atonu na te lei mauaina i le taimi lea se taleni e faapitoa ua tuuina mai e le Tama Faalelagi ia te ia. Ae sa faigata ona talitonu Marie i lena mea. Sa leai sona manatu o le a i ai se mea e lelei ai o ia.
Sa filemu lava le potu e faatasitasi ai tagata i le fale e tausi ai tagata matutua. Na i ai tagata matutua i soo se itu, ma na atili ai ona popole Marie. Sa na le iloa pe o le a se tala e fai atu ia i latou pe o le a foi sana taga e fai. Na foliga mai na faapena foi lagona o isi teineiti. Sa latou faaputuputu faatasi, ma fetilotiloai solo ma le matamumuli, seia oo ina faasino atu e Sister Gibson le mea e nonofo ai.
Na lagona lava e Marie le faanoanoa ina ua amata le polokalama. Ma, o le taimi lava na uma ai le solo muamua i le piano, na ia faalogoina le tale mai o se tagata i ona tua. Na faliu atu Marie ma vaaia ai se olomatua laulu sinasina e gatete atoa lona tino pe a tale.
Na tuu e Marie lona mafaufau popole mo ia lava, ae amata ona popole mo le olomatua. Sa ia aumaia ma le filemu se lole mai lana taga ma alu atu loa i le olomatua. Sa ia tuuina lona lima i le tauau o le olomatua ma tuu atu si meaalofa laitiiti. Ina ua aapa mai i ai le lima maanuminumi i le lole ma ataata mai ia te ia, na lagona e Marie le fiafia ma le toafilemu.
Na nonofo ai lava Marie ma le olomatua seia oo ina uma le polokalama. Sa ia uuina lona lima ma o nisi taimi na ia faamatala atu i ai le mea o loo tupu. E ese le manaia o le lagona o le faia o se mea mo se isi tagata, ma na uma ai lona faanoanoa mo ia lava.
Ina ua oo i le taimi latou te o ai, na fusi e le olomatua ia Marie ma musumusu atu, “Faafetai lava mo lou talanoa mai ia te au. O loo i ai sau taleni moni lava o le faia o tagata ia latou lagona le alofaina.”
O le latou toe foi atu i le falesa, sa faafetai ai lava Marie i le iloaina sa i ai lava sana taleni. Pe a auauna atu o ia i isi, na te lagonaina le alofa o le Tama Faalelagi, ma na fesoasoani foi o ia ina ia lagona e isi Lona alofa. O se taleni faapitoa tele lena.
Ata na tusia e Brandon Dorman