Faia o ni Uo
Ma Lou Loto Atoa
E alolofa ma tapuai tamaiti uma i le lalolagi atoa ia Iesu Keriso—e pei lava o oe! O le masina lenei, sei o tatou feiloai atu ia Ricardo Fortuna o Santo Domingo, Ripapelika Tominika
Po o le a lava le mea e faia e Ricardo Fortuna, na te faia lava ma le naunautai. O lenei alii e valu-tausaga-le matua mai Santo Domingo i le Ripapelika Tominika e taalo malosi i le pesipolo e pei lava o se polofesa. E faatasitasi foi ma lana uo ma lona uso i miliga taavale meataalo pe faia se taua faafaatusa i le va o ni tainasoa. E fiafia lava pe a valaaulia o ia e lona tina i le umukuka e kuka tostones (o palatana falai).
E auai fiafia foi Ricardo i le taimi o afiafi faaleaiga. E tatalo faatauanau o ia faatasi ma lona aiga i taeao ma afiafi uma. E faitau ma saga faitau ana tusitusiga paia. Ma e moomoo o ia ia mafai ona alu i le Peraimeri e sili atu ma le faatasi i le vaiaso! Po o le a lava le mea e fai e Ricardo, na te faia ma lona loto atoa.
E i ai se mea e tasi e faia e Ricardo ma lona loto atoa—e alofa o ia i le Alii. Ua ia iloaina o se poloaiga aua na faitau i ai i le Tusi Paia: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa” (Mataio 22:37).
“O lona uiga e te alofa atu ia te Ia i mea uma e te mafaia,” o le tala lea a Ricardo. O lena alofa sa matuai iloa lelei i le fale o lo latou aiga a o latou faamanatuina le Kerisimasi. O po taitasi e faitau ai e le aiga mau e uiga i le fanau mai o le Faaola. O nisi na ta’u mai ai mea na tutupu i le Nuu Paia. O isi na ta’u mai ai mea na tutupu i le Lalolagi Fou.
Fai mai Ricardo e taua le manatua o Iesu Keriso i le Kerisimasi aua o le taimi lena e faamanatu ai e tagata Lona soifua mai. “Ae e taua le mafaufau ia Iesu i aso uma ma mulimuli i Ana faataitaiga,” o lana faamatalaga lea. “E tatau ona tatou manatua sa Ia aoaoina i tatou e uiga i le Tama Faalelagi ma le ala e tapuai atu ai ia te Ia, ma ua Ia auina mai foi le Agaga Paia ia i tatou.”
I totonu o le faitotoa pito i luma o le fale o le aiga o Fortuna o loo tautau ai se ata vali tele o le Faaola. E tusa lava po o fea o totonu o le potu e te alu i ai, e mafai lava ona e vaai mai ia te Ia. “E faamanatu mai ai ia i matou ia mafaufau ia te Ia,” na fai mai ai Ricardo, “e le gata i le Kerisimasi ae i le tausaga atoa foi.”
O Le Mau e Sili ona Fiafia i ai Ricardo
E fiafia tele Ricardo i Mataupu Faavae o le Faatuatua, ae maise lava o le numera lima, lea na te taulotoina muy rápidamente (vave lava). “Matou te talitonu e ao ina valaauina le tagata e le Atua, i le valoaga, ma le faaee atu o lima o e o i ai le pule, e talai atu ai le talalelei ma faia sauniga o i ai,” na ia taua ai. “O loo ta’u mai e lena mea, e valaauina e le Alii ia taitai o Lana Ekalesia ma tatou te aoao atu le talalelei e ala i le pule.”
Meaai Manaia
E umi se taimi e fai ai lana meaai e sili ona fiafia i ai, o tostones, ae e manatu Ricardo e matuai aoga ai lava minute uma. La te fofoeina ma tipi faamanifi ma lona tina ia palatana, lea e foliga o ni fa’i ae e le suamalie. La te falaia i le gao vevela, faamaalili, ona too lea ma le faaeteete e faamamago ai. Ona sosoo lea ma le vaega e sili ona fiafia i ai Ricardo. Na te faataatitia ia tipiga taitasi i luga o se laupapa ona tu’i lea faamafolafola. Ona toe falai foi lea o tipiga taitasi. E sili atu lona fiafia e ai tostones faatasi ma le sosisi.
Faataitaiga Lelei
E masani ona taaalo Ricardo ma lona uso laitiiti o Marcus, faapea ma se isi ana uo o Manuel, o se tagata o le Au Paia o Aso e Gata Ai, e nofo i se fale latou te tuaoi. Na te iloaina o uo moni e uunaia e le tasi le isi e fai le mea sao. “Talu ai e vaavaai mai i laua ia te au mo se faataitaiga, o lea e tatau ai ona ou faia se faataitaiga lelei mo i laua,” o lana tala mai lea.
E latalata foi Ricardo i lona tina ma lona tama. “Ou te alofa i lo’u mama ma lo’u papa,” o lana tala lea. “La te fesoasoani mai ia te au, ma matou te taaalo foi. La te aoaoina au, ma matou te faitau faatasi. Matou te tatalo faatasi i taeao uma ma po uma.”
E vaai atu o ia ia Peresitene Thomas S. Monson o se faataitaiga. “Ou te iloa o ia o se perofeta a le Atua ma e saunoa mai o ia i le afioga a le Atua,” na fai mai ai Ricardo. “Ou te iloa e fai ana tatalo, ma faitau ana tusitusiga paia, o lea e tatau ai foi ona ou faia.”
Ma fai mai Ricardo o Iesu Keriso o le faataitaiga sili lea. “Na te aoaoina i tatou e fai le mea sao, ia usiusitai, ia tatalo i le ala sao, ma ia migao ma faaaloalo.”
Ata na pueina e Richard M. Romney, vagana ua faaalia
Faafanua © Mountian High Maps
Fai mai Ricardo e taua le mafaufau ia Iesu Keriso i aso uma lava. Faatasi ai ma lona tama, e masani ona vaavaai atu i le ata vali o loo tautau i lo latou fale, ma e faitau e Ricardo mau e uiga i le soifuaga o le Faaola.
E nofo Ricardo i le Ripapelika Tominika, lea latou te faaaogaina faatasi ai ma Haiti se motu. Na te kukaina palatana ma sosisi, e fiafia i le pesipolo, ma e taalo i meataalo o tainasoa ma loli.
O Gafea o le Lalolagi e I Ai San Tominiko, Ripapelika Tominika?
vasa atalani
kiupa
Haiti
ripapelika tominika
Puerto Rico
Sana Tominiko