Sau i le Aiga

Suzanne Goble, Iuta, ISA

Sa ou nofo ese mai lo’u aiga mo le taimi muamua lava ina ua tetea o’u matua. O lou masina muamua foi lea i le kolisi, ma a o fesiitai lou olaga faaleaiga, sa ou tauivi ai e malamalama i le uiga o le upu aiga. Ina ua tatala le faaipoipoga a o’u matua ma siitia ese lo’u aiga mai le fale na ou ola ai i le 18 tausaga ua mavae, na matuai ou le mautonu ai lava. Na ou iloaina e le faapea na leai so’u aiga, ae o le lagona tonu lena na ou lagonaina.

Na masani ona ou faalogo o faamatalaina le Ekalesia o se “sulufaiga mai le afa” (MFF 115:6). Na avea le inisitituti ma lena sulufaiga mo au a o ou tauivi ma lenei afa fou i lo’u olaga. Na ou lesitala i le inisitituti, ma e ui ina ou le manatua upu tonu na tautalagia i lesona, ae ou te le faagaloina lava le lagona o le toafilemu ma le mafanafana na oo mai ia te au a ou faalogologo i ai. Na amata ona ou iloa le alofa o lo’u Tama Faalelagi mo au, ma na amata ona mafana la ma mafutaga ma le fesoasoani sili na ou mauaina: o Iesu Keriso.

E tatau ona totogi la’u aoga i le kolisi, ae na ou aoaoina ia lesona aupito taua mai vasega o le inisitituti, lea o loo mafai ona ou mauaina e aunoa ma se totogi. Ua ou iloa nei o le faauigaga o le aiga e le faapea o le fale na e ola ae ai, ae o se nofoaga o loo aoaoina ai lesona o le olaga ma i ai le alofa. Ona o le mea na ou aoaoina ma le Agaga na ou lagonaina, ua avea ai le inisitituti ma ou aiga fou. E ese le manaia o le maua o se nofoaga ou te lagona ai le alofaina ma le taliaina.