Lesona mai le Mataupu Faavae ma Feagaiga
Toamalie i le Afioaga o le Atua
A o tatou faateleina lo tatou faatuatua ma tautinoga, o le a tatou latalata atu i lo tatou Tama oi le Lagi.
O le tala i le Perofeta o Iosefa Samita o le na saili e fia iloa po o le fea ekalesia e tatau ona auai i le lotolotoi o “fefinauaiga a … tagata o ituaiga lotu eseese” (Talafaasolopito—Iosefa Samita 2:11) o se tala e uiga i musumusuga ma le faamoemoe o i latou uma o e saili faamaoni i le upumoni. Ai se fiafia o Iosefa—o se tamaitiiti e 14 tausaga sa lei lava sona malamalama, ma se fesili faatauvaa ma se naunautai faamaoni—i le faitau ai i le fuaitau lenei mai le Tusi Paia: “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe tautaua; ona foaiina mai ai lea ia te ia” (Iakopo 1:5).
O lenei fuaitau ua tuuina mai ai se vaaiga maoae i le ituaiga sootaga e tatau ona i ai i tatou taitoatasi ma lo tatou Tama oi le Lagi. E moni, o lenei fuaiupu o loo faaalia ai le alofa ma le manatu mamafa o lo tatou Tama agalelei i se atalii na alu atu ia te Ia ma se fesili. E le masani ona tali mai e le Tama ni tatalo i faaaliga, e pei ona Ia faia i le Vao Paia, ae Na te tuuina mai tali e matuai aumaia ai le mafanafana ma le toafilemu. O Lana folafolaga lenei ia i tatou—ia foai tele mai ma le le toe tautaua, po o le aoaiina.
A o ou laitiiti, na ou maua ni avanoa ou te faataitaia ai lenei folafolaga. Ou te molimau atu e moni lava le folafolaga. Pe o le leiloa o sau meataalo po o se sene po o se isi lava meatotino faapelepele lea e ono leai se uiga i tagata matutua, na tali mai lava le Tama Faalelagi i a’u tatalo ma faatoafilemu lo’u mafaufau. Ou te manatua lelei lava lo’u talitonuga na i ai e mafai ona oo mai se tali. E faapena le faatuatua o se tama talavou. Na faapena le faatuatua o le taulealea o Iosefa Samita.
O le faatuatua faapena e o faatasi ma tulaga ia e taliina ai talosaga, e pei ona faamanino mai e le fuaitau lenei: “A ia ole atu ma le faatuatua, aua lava nei masalosalo” (Iakopo 1:6).
A o faasolo ina ou matua, na ou iloa ai ua amata lava ona faigata ona faatino le faatuatua ma le le masalosalo. Ua toto e le lalolagi ni fatu o le masalosalo ma upuesea i o tatou mafaufau ma loto. O le apoapoaiga a le Faaola ina ia tatou “avea ia pei o tama iti” (Mataio 18:3) na avea ma au taumafaiga i le olaga atoa. Ua ou iloa ai, o le faatuatua “e tusa ma le fua o le sinapi” (Mataio 17:20) e i ai taimi e latalata mai ai ae taumamao foi i nisi o taimi.
E mafai faapefea ona tatou faatinoina e le aunoa lenei ituaiga faatuatua? O le fautuaga lenei ua tuuina mai ai se vaaiga manino i lenei taumafaiga amiotonu: “O mea mai le Atua o le malamalama lava ia; o le talia foi le malamalama, ma tumau pea i le Atua e faateleina atu i ai le malamalama; ma e tuputupu pea le pupula o lea malamalama seia oo mai le aso atoatoa ona lelei” (MFF 50:24).
O le faagasologa lenei na uia e le Perofeta o Iosefa Samita. E pei o isi na muamua atu ia te ia, na ia faamaonia o ia lava i le faaaogaina e le aunoa o lona faatuatua ma le faaaogaina ma le amiotonu o le faitalia i le aluga o taimi. Na faaauau pea o ia i le Atua, ma maua le malamalama faateleina, ma o lena malamalama na tupu pea lava pea seia oo i le aso atoatoa ona lelei.
E i ai se mea na tupu i le soifuaga o le Perofeta na matuai mamana lona aafiaga ia te au a o ou talavou:
“I se itula i le leva o le po na taoto ai Iosefa ua moegapepe ona ua vaivai. … Ma e lei umi lava ae talepe e se vaega o tagata leaga le faitotoa [o lona fale] ma … pue o ia ma toso i fafo o le fale a o tagi faataitaio Ema. …
“… Na faapotopoto se vaega … ina ia faia se fonotaga. … Ina ua uma le fono, na tautino e le vaega leaga na taitai, o le a latou le fasiotia o ia ae o le a latou aveeseina uma ona lavalava ae sasa ma saeia lona tino. … Na latou asuina se pakete ta manogi leaga i ona foliga ma taumafai e sasaa faamalosi i totonu o lona faai. …
“Ina ua latou tuua Iosefa, sa taumafai o ia e tu i luga, ae na toe pau i lalo ona o le tiga ma le mafatia. Ae na manuia ana taumafaiga i le foefoeeseina o le ta mai ona foliga ina ia mafai ona manava lelei. …
“Ina ua mafai ona ufiufi lona lelavalava, ona alu atu lea o le Perofeta i totonu o le fale, ma faaaluina le po i le fufuluina o lona tino ma fusifusi ona manua. …
“O le taeao na sosoo ai, o le Sapati lea, na faapotopoto ai tagata i lo latou taimi masani mo tapuaiga. Na faatasi ai ma i latou ia nisi o tagata leaga. …
“Faatasi ai ma lona tino ua solouli ma mafoefoe, na alu atu ai Iosefa i le lotu ma tu i luma o le aulotu, ma faasaga atu ma le toafilemu ma le faatamalii i tagata na osofaia o ia i le po na muamua atu. Sa ia aoaoina atu se lauga mamana ma o lena lava foi aso na papatisoina ai ni tagata talitonu se toatolu i le Ekalesia.”1
E le mafai ona ou mafaufau i le tiga ma le le lagolelei lea na onosaia e le Perofeta o Iosefa. Na tele lava ni ’alofaga e le mafai ai ona aoao atu i le taeao na sosoo ai, ae o lenei aafiaga ma le tele o isi aafiaga e tutusa lava pe leaga atu foi ona taunuuga, sa faapea ona le faavaivai ai o ia mai lona tiutetauave. E faapefea ona tatou lagona le tauaogaina pe afai tatou te faavaivai mai lo tatou tiute, ona o sina faaletonu po o sina vasa’i itiiti?
A o faateleina lo tatou faatuatua ma le tautinoga, o le a faapea ona tatou latalata atili atu ai i lo tatou Tama oi le Lagi.
“Ona e valaau lea ae tali mai ai Ieova; e te alaga atu, a e fetalai mai o ia, O au lenei” (Isaia 58:9)
“Ona malosi ai lea o lou faatuatua fai ifo i luma o le Atua; ma toto ifo i lou agaga le mataupu faavae o le perisitua e pei o le sau mai le lagi.
“… E aunoa foi ma faiga faamalosi o le a tafe ia te oe e faavavau faavavau lava” (MFF 121:45–46).
O se faamanuiaga mo au le molimau atu o Iosefa Samita o se perofeta a le Atua. Ona sa ia sailia le poto i le Vao Paia ma faaaoga mulimuli ane ai le maelega, ua tatou fiafia ai nei i le atoatoaga o le talalelei a Iesu Keriso. O le saafiafiga lenei a Peresitene Ioane Teila (1808–87), na tusia ina o avea o ia ma se tasi o le Korama a Aposetolo e Toasefululua, ua faamatalaina ai ma le matagofie le mea na faia e le Perofeta o Iosefa Samita mo i tatou uma: “O Iosefa Samita, le Perofeta ma le Tagatavaai o le Alii, e sili atu ana mea ua faia, vagana o Iesu lava, mo le faaolataga o tagata i lenei lalolagi, i lo soo se isi lava tagata na ola ai. … Na ola maualuga o ia, ma na oti maualuga o ia i luma o fofoga o le Atua ma lona nuu; e pei foi o le tele o auauna faauuina a le Alii i aso ua mavae, ua faamaufaailogaina lana misiona ma lana galuega i lona lava toto” (MFF 135:3).
Talosia ia tatou faaaogaina e le aunoa ma le poto la tatou faitalia, ma e pei o le Perofeta o Iosefa Samita, na faaaogaina lona faatuatua le maluelue e ui lava i o tatou tulaga ina ia mafai e lo tatou faatuatua ona “malosi i luma o le Atua.”
O le apoapoaiga a le Faaola ia “avea ia pei o tama iti” na avea ma au taumafaiga i le olaga atoa.
Ona sa sailia e Iosefa Samita le poto i le Vao Paia ma faaaoga mulimuli ane ai le maelega, ua tatou fiafia ai nei i le atoatoaga o le talalelei a Iesu Keriso.
Tauagavale pito i luga: O Iosefa Samita o loo Tusitusi, na saunia e Dale Kilbourn; taumatau: Fanau o le Malamalama, na saunia e Anne Marie Oborn, mai faaaloaloga a le Falemataaga o Talafaasolopito ma Faatufugaga a le Ekalesia; si’o © 2007 e le Cary Henrie
Na Ou Vaaia se Malamalama, na saunia e Jon McNaughton