O Loo i Ai le Faamoemoe i Haiti
O le agaga faafaifeautalai o loo ola ma malosi i lenei atumotu, ma o loo naunau lava le tupulaga e faatumau ai faapena.
O Dieuveut Demosthène, 18, ma Robenson Marcel Laroque Jean, 19, o se uo lelei lava. Ma ua la fuafua ina ia tumau ai pea faapena. E faavavau.
“Sa ma tuaoi, ma sa ma taaalo pasiketipolo faatasi,” o le tala lea a Robenson. “Sa ou auai i le Ekalesia ina ua 16 ou tausaga, ma e lei umi ae ou fautuaina Dieuveut e tatau foi ona sau ai ma ia. Sa ou tatalo soo, ma sa ou tumau ai. Vaai atu nei ia te ia, o se tagata malosi o le Ekalesia. Ou te mitamita lava ia te ia.”
E tele taimi na valaaulia ai a’u e Robenson,” o le tala lea a Dieuveut, “ma i le aluga o taimi na ou talia ai. O taimi uma lava na tautala ai o ia i upu maoae, pei lava e malamalama i mea uma. O le mea lea, o ana valaaulia sa le o se mea na faapopoleina tele ai; sa matua maoae lava. Ina ua mavae sina taimi, na amata ona fai au lesona e faifeautalai, ma ou auai ai i le Ekalesia ina ua 17 ou tausaga.”
O Le Faataitaiga
O le auala lelei lena e tatau ona fai ai le galuega faafaifeautalai—o uo e faasoa atu le talalelei i uo ma tuuina atu igoa o tagata i faifeautalai latou te aoaoina. “Mai ia te au—o se tagata se toatasi i le Ekalesia—o lenei ua ma toalua, ma o loo ma faaauauina faatasi lea lava galuega e tasi,” o le tala lea a Robenson. O se taunuuga o a laua taumafaiga, ua auai ai foi se tasi o uso matua o Dieuveut ma se isi uo i le Ekalesia. E tasi na avea ma lua, ma o le lua ua avea ma fa.
O Robenson ma Dieuveut, e mai le Uarota a Centrale, Siteki a Port-au-Prince Haiti i Matu, o le faataitaiga lea o le mea o loo tupu i le galuega faafaifeautalai i Haiti talu mai ona aveesea mai faifeautalai mai isi atunuu i le 2005 ona o faalavelave faaupufai. Na tapa atu le Misiona a Haiti Port-au-Prince ia te ia lava mo se malosiaga ma na maua ai. O le taimi nei e na o tagata Haiti lava o loo faamisiona i Haiti, ma ua faamoemoeina le tupulaga e auauna atu pe a oo i lo latou matutua e tatau ai. E tusa lava pe lei valaauina i latou e faamisiona, ae ua latou aapa atu i o latou tuaoi ma uo.
“Soo se mea e te vaaia ai Le Ekalesia a Iesu Keriso o le Au Paia o Aso e Gata Ai i Haiti, e te iloa lava o ona tagata lotu o tagata Haiti,” o le tala lea a Farah Jean-Baptiste, 18, o se tamaitai talavou foi o le Uarota a Centrale. “O se uunaiga moni lea mo le autalavou le iloa o i matou lava e nafa ma le lumanai o le Ekalesia iinei.”
“Ua uunaia alii talavou ma tamaitai talavou o le Ekalesia iinei ina ia mulimuli i le Faaola,” o le tala lea a le uo a Farah o Nathalie LaGuerre e 17-tausaga mai le uarota lava lea e tasi. “Matou te mananao e savavali i Ona ala, ia vaaia le alualu i luma o Lana galuega. Ma o lea e faatumulia ai i matou i le olioli pe a matou vaaia faifeautalai Haiti o galulue i Haiti. O i latou e naunautai ma fiafia, ma a uma a latou misiona latou te fai mai ia i matou e ese le manaia o se aafiaga na latou maua. Ona latou valaaulia lea o i matou ina ia matou maua lea lava aafiaga ma ia amata nei e ala i le faasoa atu o le talalelei i a matou uo.”
Fai mai o ia, e ui lava ina le i ai i tamaitai talavou lea tiute e tasi o le perisitua e auauna atu faamisiona e pei o alii talavou, “ae matou te vaaia lava le tele o faamanuiaga e oo mai ia i latou [tamaitai] o e faamisiona. E mafai ona e faamanuiaina isi, ma aoaoina ai oe. E faamalosia ai outou mo luitau o le a outou fetaiai i le olaga, ma e taula ai outou i le talalelei. E faaalia ai o oe moni o se soo o Iesu Keriso, ma o oe o se molimau mo Ia, ma o loo e mulimuli i Ana faataitaiga.”
O Le Faamoemoe
“E matua tele lava se faamoemoega mo le malo o le Atua iinei i Haiti,” o le saunoaga lea a Peresitene Gh. Ghammald Francillon o le Siteki a Port-au-Prince Haiti i Matu. “Ua matuai uunaia lava le autalavou e auauna atu faamisiona. O se vaega lea o lo latou tuputupu ae faanatura ina ia aofia ai se misiona i a latou mea e tatau ona faamuamua, e faamuamua foi i le kolisi. Afai e te vaaia faifeautalai i le alatele, e na o lou fesili lava, ma o le a latou tau atu ia te oe ua latou tolopoina a latou aoaoga ona ua valaauina i latou i le galuega a le Alii.
Na ia taua faamanuiaga o loo ia lagonaina i totonu o lona lava aiga ona o lona toalua o se faifeautalai ua maea se misiona. Fai mai o ia, o aiga malolosi ma taitai malolosi o taunuuga tuusao ia o le galuega faafaifeautalai. “Tagai faalemafaufau,” na ia fai mai ai, “i le 15 i le 20 tausaga, pe afai e toatele lava tagata Haiti e faamisiona i Haiti, i le ituaiga o Ekalesia o le a tatou maua iinei!” Fai mai o ia “e lagona e tagata o le ekalesia le alofa ma le lagolago a le toatele, mai le perofeta ma le Au Pulega Aoao ma mai faifeautalai mai isi atunuu ua maea misiona iinei i le taimi ua tuanai. Ae i le taimi lenei ua 100 pasene tagata Haiti, e aofia ai le peresitene o le misiona o Fouchard Pierre-Nau, o se faifeautalai ua maea se misiona o le na auauna atu i Haiti pe a ma le 10 tausaga talu ai.”
O Le Lumanai
Na manatu nisi tagata atonu o le a faaletonu le Ekalesia iinei e aunoa ma le fesoasoani mai fafo. “Ae ou te le popole lava,” o le tala lea a se faifeautalai o loo auauna atu nei i le Misiona a Haiti Port-au-Prince, o Elder J. Henry Michel. “E le mafai ona toilalo le Ekalesia. O Le Ekalesia a Iesu Keriso, ma o lea e le mafai ai ona toilalo.”
Nai lo lena, fai mai Dieuveut, a o vaaia e tagata le fiafia o loo aumaia e le talalelei, o le a faaauau pea ona tuputupu ae le Ekalesia i Haiti. “Ou te faafetai lava ia Robenson mo le faasoaina mai o le talalelei ia te au,” o lana tala lea, “ma o le mafuaaga lena ou te manao ai e faasoa atu le talalelei i isi. O le vaiaso na tea nei, na ou fesili ai ia te au lava, pe na ou iloa i aso ua mavae le uiga o le olioli? Aua o le taimi nei, e tusa lava pe ou te le mauaina mea uma o le olaga nei ou te manao i ai, ou te lagonaina lava le toafilemu ia te au lava. Ou te matuai faamoemoe lava o le a ou latalata atu i lou Tama Faalelagi.”
“Ua ou taumafai nei e avea ma se faifeautalai,” o le tala lea a Robenson. “O aso uma lava ou te aveina ai lau ato faafafa o loo tuu ai i totonu ni nai kopi o le Tusi a Mamona, ina ia faasoa atu i isi. E toatele ua latou iloa o au o se tagata o le Ekalesia, ma ou te naunau lava e faasoa atu i ai lau molimau. O le alu e faamisiona o le a avea ma se avanoa lelei e auauna atu ai i le Atua e ala i le auauna atu i Ana fanau. Ou te manao lava ina ia ou alu [e faamisiona].”
Fai mai Dieuveut e masani ona latou talanoa ma faifeautalai ua maea misiona. “Na latou faamatala mai ia te au auala na mafai ona faamanuiaina ai e le Alii tagata e ala i faifeautalai, ma ou te fia maua foi na faamanuiaga. Na latou faamatala mai le ala na latou ola ai i totonu o le misiona, ma lo latou fiafia tele i ai. Ma le isi, o le uma ai o a latou misiona, ua agavaa i latou, ma avea ma ni faataitaiga lelei. Ou te fia faapena foi.”
O le a se mea o le a aumaia e le lumanai? “O loo i ai i le Tama Faalelagi ia Ana fuafuaga mo Haiti,” o le tala lea a Dieuveut. “Ua Ia tuuina mai i tagata iinei le avanoa ina ia malolosi ai. O tagata Haiti e aoaoina tagata Haiti, ma o lena mea o le a faamanuiaina ai i matou.”
O le a le toe umi ae maua le valaauga o le misiona a Robenson, ma e faamoemoe lava o ia e alu i Haiti Ma e le mamao ese foi Dieuveut, ma e faamoemoe foi ia auauna atu i lona atunuu moni. Ae pe valaauina i latou i Haiti po o se isi lava atunuu, ua latou iloa o le a latou maua ni uo se toatele i le Ekalesia ma o le a faaauauina ai a latou lava faauoga. Aua afai o outou o ni uo i totonu o le talalelei, o outou o ni uo e oo i le faavavau.
Ua fotu ae le faamoemoe mo le autalavou a le Au Paia o Aso e Gata Ai e pei o Robenson Jean, Dieuveut Demosthène, Nathalie LaGuerre, ma Farah Jean-Baptiste, o e ua talitonu o le talalelei e mafai ona suia ai olaga faapea foi ma lo latou atunuu. Mai le tumutumu o se mauga i Port-au-Prince lea na faapaiaina ai le laueleele mo le talaiina o le talalelei i le atunuu atoa, o loo fefaasoaai e le Au Paia o Aso e Gata Ai i Haiti ni foliga ataata ma sauniuni mo le lumanai.
Luga: O le peresitene o le misona ma lona faletua o loo talanoa ma alii faifeautalai o loo galulue i le ofisa o le misiona. Ua uunaia e Peresitene Pierre-Nau le autalavou a le Au Paia o Aso e Gata Ai ina ia amata nei ona faasoa atu le talalelei. “Ua avea nei outou ma ni faifeautalai,” o lana saunoaga lea. Luga: Peresitene Francillon o le Siteki a Port-au-Prince Haiti i Matu o loo fiafia faatasi ma lona faletua ma lana fanau. Fai mai a ia, o le Ekalesia ua faamanuiaina ai le autalavou i le tele o itu.
O loo matuai aafia lava le autalavou i Haiti i vasega o Tamaitai Talavou ma korama a le au perisitua. E le gata ina latou manatua folafolaga na latou faia ina ua latou papatiso, ae ua latou ola foi i aso uma i na folafolaga.
Ata na pueina e Richard M. Romney