Mo Alii Talavou o le Perisitua Arona

Charles W. Dahlquist (ogatotonu), peresitene; Dean R. Burgess (tauagavale), fesoasoani muamua; ma Michael A. Neider, fesoasoani lua.

Na faamanatu atu e Paulo ia Timoteo se mea taua lava—na taua ia Timoteo ma i latou taitoatasi e tauaveina le Perisitua Arona: “Aua nei e faatalale i le mea alofa na tuuina atu ia te oe i le valoaga, ma le faaee atu o lima” (1 Timoteo 4:14). Na tautala Paulo i le taua o le perisitua.

O le a le uiga o le “aua nei faatalale” i o tatou perisitua? Muamua, o lona uiga ia ola agavaa mo faamanuiaga e tafe mai e ala i le perisitua. Ia tatou mautinoa e mama o tatou mafaufauga, upu, ma amioga. Tatou te ola ina ia avea “o se faaaoao o e ua faatuatua” i mea uma tatou te faia: i le tatalo ma faitau tusitusiga paia i aso uma, auai i le seminare, totogi sefuluai, ma pe afai e mafai, auai i le malumalu e faataunuu papatisoga mo e ua maliliu.

Lona lua, o lona uiga ia faalautele le perisitua—ia faaaoga le perisitua e auauna atu ai ma faamanuia ai olaga o isi. E mafai ona tatou faia lenei mea e ala i le faataunuuina o o tatou tofiga faaleperisitua; faia o auaunaga faaletagata lava ia ma faalekorama; po o le aapa atu i se tasi i le aiga, a’oga, po o le galuega e manaomia se upu alofa, o se ataata, po o se popo i le papatua.

Lona tolu, o lona uiga o le aoao e uiga i le perisitua ma ona tiute. Faitau ma mafaufau loloto i mau e uiga i le perisitua, ae maise lava o le Alema 13 ma le Mataupu Faavae ma Feagaiga vaega e 13, 20, 84, 107, ma le 121. Faitau saunoaga o loo i le sauniga o le perisitua i le konafesi aoao aupito lata mai, ona e fesili ifo lea ia te oe lava, “E faapefea ona ou faatatauina mea ua ou aoaoina e fesoasoani ai ia ou faalauteleina le perisitua?”

Matou te alolofa ia te outou. E i ai lo matou talitonuga ia te outou. A o e taumafai e faalautele lou perisitua, o le a e saunia lelei atu e auauna atu i le Alii o se faifeautalai faamisiona, ma e pei ona folafola atu e Paulo ia Timoteo, o au auaunaga ma au faataitaiga o le a faamanuia ai lou olaga ma olaga o i latou o siomia oe. Ia faamanuia outou e le Atua i a outou taumafaiga.