Haʻu ʻo Fanongo ki he Leʻo ʻo e Palōfitá
Ko e ʻOfa ʻa ha Palōfita
Mei ha lea ʻi he konifelenisi lahi ʻo ʻEpeleli 2008.
ʻI he ngaahi taʻu lahi kuo hilí, naʻe ʻaʻahi ange ʻa Palesiteni Tōmasi S. Monisoni ki ha konifelenisi fakavahelahi ʻi Hamipeeki, Siamane pea naʻá ku maʻu ʻa e lāngilangi ke muimui folau kiate ia.
Naʻe fehuʻi mai ʻe Palesiteni Monisoni ʻo kau kia Misa Maikolo Penitisa, ko ha palesiteni fakasiteiki mālōlō pea kau ʻi he kau fuofua paionia mālohi ʻi Siamané. Naʻá ku fakamatala ange naʻe puke lahi ʻa Misa Penitisa, pea naʻe siʻi tokoto mohenga pē ʻo ʻikai ke ne lava mai ki heʻemau ngaahi fakatahá.
Ne kole mai ʻa Palesiteni Monisoni pe ʻe lava ke ma ʻaʻahi ki ai.
Naʻá ku ʻiloʻi ne fai ha tafa ki he vaʻe ʻo Palesiteni Monisoní ʻi ha taimi nounou pē kimuʻa peá ne folau mai ko ia ki Hamipēkí pea naʻe langa ʻa hono vaʻé ʻi heʻene lué. Naʻá ku fakamatalaʻi ange ʻoku nofo ʻa Misa Penitisa ʻi he fungavaka hono nima ʻo ha fale ne ʻikai ha lifi ai. Kuo pau ke ma kaka he sitepú kae lava ke ma ʻaʻahi ki ai.
Ka naʻe vilitaki pē ʻa Paleisteni Monisoni. Ko ia ne ma ō leva.
ʻOku ou manatuʻi ʻa e faingataʻa kia Palesiteni Monisoni ke kaka he ngaahi sitepu ko iá. Naʻe pau ke ne lue māmālie pea fie maʻu ke ne kiʻi tuʻu ʻo mālōlō. Naʻe ʻikai te ne hanu pea naʻe ʻikai ke ne fie foki. Koeʻuhí ko e māʻolunga ʻa e ʻato e falé, ne hangē ia ʻoku ʻikai ha ngataʻanga ʻo e ngaahi sitepú, ka naʻe vilitaki fiefia pē ʻa Palesiteni Monisoni kae ʻoua kuo ma aʻu ki he fale nofo totongi ʻo Misa Penitisa ʻi he fungavaka hono nimá.
Ne fakafiefia ʻema ʻaʻahí ʻi heʻema aʻu ki aí. Naʻe fakamālō ange ʻa Palesiteni Monisoni koeʻuhí ko ʻene moʻui ngāue mateakí peá ne fakafiefiaʻi ia ʻaki ha malimali. Kimuʻa peá ma mavahé, naʻá ne foaki ange ha tāpuaki fakaʻofoʻofa ʻo e lakanga fakataulaʻeikí.
Naʻe mei fili ʻa Palesiteni Monisoni ke ne kiʻi mālōlō ʻi he vahaʻa ʻo ʻemau ngaahi fakataha lōloá. Naʻá ne mei kole ke ʻave ia ʻo takimamataʻi ʻi he ngaahi feituʻu fakaʻofoʻofa ʻo Hamipēkí. Ne u faʻa fakakaukau atu neongo hono fakaʻofoʻofa kotoa ʻo e ngaahi mātanga ʻi he koló, ka ko e meʻa naʻá ne vivili taha ke ne mamata ki aí, ko ha mēmipa toulekeleka mo mahamahaki ʻo e Siasí.
Naʻe haʻu ʻa Palesiteni Monisoni ki Hamipeeki ke ne akoʻi mo tāpuakiʻi e kakai ʻo ha fonua. Ka ʻi he taimi tatau pē naʻá ne tokanga taha ki he fakafoʻituituí.
ʻI he taimi ne lea ai ʻa e ʻAposetolo ko Paulá ʻo kau kia Sīsuú, naʻá ne ʻomi ʻa e fakamatala faingofua ko ʻení: “[Naʻá ne] feʻaluʻaki holo ʻo fai lelei” (Ngāue 10:38). ʻE lava ke tau fai ʻa e lea tatau fekauʻaki mo e tangata ko ia ʻoku tau hikinimaʻi ko e palōfita ʻa e ʻOtuá.
Toʻohemá mo ʻolunga ʻi he tafaʻaki toʻomataʻú: tā fakatātaaʻi ʻe Beth M. Whittaker; toʻomataʻú: tā fakatātaaʻi ʻe Sam Lawlor