Feituʻu ʻo e Nonga
ʻOku mahulu ange ʻa e fakaʻofoʻofa ia ʻo e temipalé ʻi ha toe fale, ki he ongo fafine ko ʻeni mei he Tominikeni Lepupeliká. ʻOku toe hoko foki ia ko ha fakamanatu ʻo ʻena ngaahi ʻamanaki mo e fakaʻānaua fakaʻofoʻofa tahá.
ʻOku kei manatu pē ʻa e finemui taʻu 16 ko Tilisa Sotó ki he ʻaho naʻe fakatapui ai ʻa e temipalé ʻi hono kolo ko Seni Tomingikoú ʻi he Tominikeni Lepupeliká: “Ne u taʻu hiva pē he taimi ko iá, ka naʻá ku pehē ange, ‘Tō atu! ʻA e temipalé heni!’ Naʻá ku anga he mamata ki he ʻalu ʻa e kakaí ki he ngaahi fonua kehé ke silaʻi ai kinautolu mo nau fai ai ha ngaahi fuakava. Ne u fakakaukau, ‘He ʻikai ke u toe ʻalu mo hoku fāmilí ki ha fonua kehe he ʻoku ofi mai pē ʻa homau temipalé.’”
ʻOku tuʻu fakaʻeiʻeiki ʻa e temipalé he ʻahó ni ʻo hangē ha fanāfotú ʻi he kolomuʻá pea fakaʻofoʻofa mo hono tauá mo hono kelekelé ʻo pehē ai ʻe ha kakai tokolahi ʻoku nau foua atu aí, ko ha fale lotu lahi ʻeni. ʻOku fiefia ʻa Tilisa ke fakamatalaʻi ange ʻoku toputapu ange ʻa e temipalé ia ai. ʻOku ʻi ai ha ongoʻi fakaʻeiʻeiki makehe ʻi he kelekele ʻo e temipalé, ʻi hono fakafehoanaki atu ki he ngaahi hala femoʻuekina mo e ʻū māketi ʻi loto koló.
Ko e feituʻu ʻeni ʻo e nonga naʻe haʻu ki ai ʻa Tilisa mo hono kaungāmeʻa taʻu 14 ko Kelisia Seni Kātieni he kuohilí. ʻOkú na fakatou kau atu ki he Uooti Milatoá ʻo e Siteiki Seni Tomingikou Lepupelika ʻInitipenitenisiá. Kuó na ʻosi ʻalu fakatouʻosi ki he temipalé kimuʻa ke papitaiso maʻá e kau pekiá. Ka naʻá na omi pē ki ai he ʻahó ni ke na ʻeveʻeva ʻi he ngoue matalaʻiʻakaú pea mo ongoʻi he tuʻa falé ʻa e Laumālie ʻoku maʻu ʻi he loto temipalé.
Ngaahi Fakaʻamu ʻa Tilisá
ʻOku pehē ʻe Tilisa, “ ʻOku ou maʻu ha ʻofa lahi ki he ʻEikí pea ʻoku ou fakafetaʻi koeʻuhí ko e tokoni kuó Ne fai ki heʻeku moʻuí. ʻOku kau hoku fāmili tonú ki he Siasí, ka ʻoku teʻeki kau mai ki ai ʻa hoku ngaahi mehikitangá, faʻētangatá mo e niʻihi ʻoku ou tokoua ʻakí. ʻI heʻenau omi ki homau ʻapí, ʻoku ou mateuteu maʻu pē mo e Tohi ʻa Molomoná he ʻe ʻi ai pē ha faingamālie ke u vahevahe ange ai ʻa e ongoongoleleí kiate kinautolu.” ʻOkú ne vahevahe atu foki ʻa e ongoongoleleí ki hono kaungāmeʻá pea “mo ha taha pē ʻoku ou ongoʻi ʻoku mahuʻingaʻia moʻoni ai.” Pea ko e taimi kotoa pē ʻokú ne fai ai iá, ʻokú ne pehē, “ ʻOku ou ongoʻi e mālohi fau ʻa e Laumālié. Ko e taimi kotoa pē ʻoku ou vahevahe ai ʻeku fakamoʻoní, ʻoku ou toe ongoʻi ai ʻa hono moʻoni ʻo e Siasí.”
ʻOkú ne manatuʻi ha lēsoni semineli fekauʻaki mo e palani ʻo e fakamoʻuí. ʻOkú ne pehē, “Kimuʻa pea ngaohi ʻa e māmaní, naʻa tau kau atu ki ha Fakataha Lahi ʻi he Langí, pea naʻa tau fili ai ke muimui ki heʻetau Tamai Hēvaní mo tali ʻa e feilaulau ʻe fakahoko ʻe Sīsū Kalaisi maʻatautolú. Naʻe fakamatala mai ʻemau faiakó ʻe lava ke mau ʻiloʻi ne mau talangofua ki he Tamai Hēvaní he taimi ko iá koeʻuhí he ʻoku mau ʻi he māmaní he taimí ni ʻo maʻu ʻa e sino ʻo e kakano mo e hui. Naʻá ku ʻiloʻi naʻe moʻoni ia heʻene leaʻaki iá. ʻI heʻeku lotu he pō ko iá, ne u tangi mo fakamālō ai ki he ʻOtuá koeʻuhí ko e ʻilo ko iá.”
Naʻe lau ʻe Tilisa ʻa e 1 Kolinitō 3:16: “ Ikai ʻoku mou ʻilo ko e fale tapu ʻo e ʻOtuá ʻa kimoutolu, pea ʻoku nofoʻia ʻa kimoutolu ʻe he Laumālie ʻo e ʻOtua?” ʻOkú ne pehē, “Kapau ko ha temipale foki au, ta ʻoku fie maʻu ke u maʻa mo fakaʻofoʻofa ʻo hangē ko e temipalé. Ko ha tāpuaki fakaofo moʻoni ia ke kau atu ki he Siasí ni pea hoko ko ha finemui angamaʻa!”
ʻOkú ne pehē ko ʻene fakaʻamu taupotu tahá ia ke toe nofo fakataha mo ʻene Tamai Hēvaní ʻi ha ʻaho. ʻOkú ne pehē, ʻʻOku ou fakafetaʻi kuó Ne tuku mai ʻa e temipalé kiate kitautolu he ʻahó ni ke tau lava ʻo fai ai ʻa e meʻa kotoa pē te tau lavá ke tau toe foki ai kiate Ia. Ko e founga lelei taha ke tau fakamālōʻiaʻi ai Iá, ko haʻatau moʻui ʻi he founga kuó Ne kole maí.”
ʻOku pehē ʻe Tilisa, “ ʻOku finangalo ʻa e ʻEikí ke tau hū ki Hono falé, ako ʻo kau kiate Ia pea mo e ngāue ke tau aʻu ai ki he taʻengatá ʻo nofo fakataha mo Ia.” ʻOkú ne pehē ʻokú ne fiefia ke kau atu ki he papitaiso maʻá e pekiá he “ko ha founga ia ke tokoni ai kiate kinautolu ʻoku tatali mai ʻi he tafaʻaki ʻe taha ʻo e veilí pea fakahoko ai maʻanautolu ha meʻa ʻoku ʻikai ke nau lava ʻo fai maʻanautolu pē.”
Ngaahi Tukupā ʻa Kelisiá
ʻOku tui pehē pē mo Kelisia, “ʻOku fie maʻu ʻe heʻetau ngaahi kuí ke tau fai ʻa e ngāué, pea ʻoku ou ʻiloʻi te nau fakamālō loto houngaʻia mai kiate kitautolu. Kae tautautefito pē ki heʻeku kuifefiné, ʻa ʻeku ʻamanaki fiefia atu ke feʻiloaki mo iá, he naʻe ʻikai ke ma feʻilongaki ʻi he moʻuí ni. Te mau fakapapauʻi ʻoku fakahoko kakato ʻa e ngaahi ngāue fakatemipalé maʻana.”
ʻOku hoko ʻa e talanoa fekauʻaki mo e temipalé ko ha meʻa fakatupu loto māfana kia Kelisia. ʻOkú ne pehē, ʻʻOku ou tukupā ke fai ʻa e ngaahi fili kotoa pē te ne faitokonia au ke u sila mo hoku fāmilí. Kuo pau ke mau fakaʻapaʻapa ki he ongoongoleleí mo tauhi ʻa e ngaahi fekaú al pie de la letra [ʻo talangofua matematē ki he fonó]. ʻOku mau fai ia koeʻuhí ko ʻemau ʻofa ki heʻetau Tamai Hēvaní pea ko ʻemau talangofuá ko hono fakahaaʻi ia kiate Ia ʻa ʻemau houngaʻiá.”
Naʻe kau ʻa hono fāmilí ki he Siasí ʻi Tīsema ʻo e 2006, hili ia ha taʻu ʻe ono mei he hiki ʻa ʻene ongomātuʻá mei Haiti ki he Lepupelika Tominikení. “ʻOku ou fakafetaʻi lahi koeʻuhí ko e kau faifekau naʻe tukituki homau matapaá. Ko ha meʻa fakaʻofoʻofa ia ke ongoʻi ʻa e Laumālié pea mo ʻilo lahi ange ki he palani ʻa e Tamai Hēvaní maʻatautolú. Talu ʻemau maʻu ʻa e ongoongoleleí ʻi heʻemau moʻuí, mo e toe vāofi ange ʻa homau fāmilí. ʻOku ou fakafetaʻi ko ʻEne foaki mai ha fāmili ʻoku uouangataha, ʻo aʻu ai pē ki he ngaahi taimi faingataʻá. Ko e fakakaukau atu ko ia ʻe lava ke mau maʻu ha faingamālie ke silaʻi fakataha ai kimautolu ki he taʻengatá, ʻoku kau ia he ngaahi tāpuaki maʻongoʻonga taha ʻi he ngaahi tāpuakí kotoa.”
ʻOku lolotonga kau atu ʻa ʻene ongomātuʻá he taimí ni ki ha kalasi teuteu-ki he-temipalé, pea ʻoku fakamanatu ai kiate ia ke ne teuteu atu ki he ʻaho te ne mali ai ʻi he temipalé. “Ko ʻeku taumuʻa maʻongoʻonga tahá ia, ke u moʻui taau mo hoku husepāniti he kahaʻú ke ma mali mo hoko ko ha fāmili taʻengata.”
Vahevahe ʻo e Ongoʻi Nongá
Naʻe fakalaka atu ʻa e ongo kaungāmeʻá ni he fuʻu pou ʻoku vilingia mei ai ʻa e fuka ʻo hona puleʻangá ʻi ha kiʻi havilivili ne tō mai. Naʻe pehē ʻe Tilisa, “ʻOku aʻu ki he fuka ʻi he temipalé, ʻa ʻene fakamanatu mai ke ma tui faivelenga. ʻOku mahulu hake pē ia ʻi hono fakalanulanú. ʻOku ʻi ai ʻa e motó Dios, patria, libertad [ʻOtuá, fonua, tauʻatāiná] pea hā ai mo ha kolosi faka-Kalisitiane pea mo e Fekau ʻe Hongofulú. ʻOkú ne fakamanatu mai naʻe fokotuʻu mo ʻiloʻi homau fonuá ʻe ha kakai naʻe tui ʻOtua pea ʻoku kei mahuʻinga heni ʻa e ʻOtuá.”
Naʻá na lue fakalaka atu he hūʻanga ki he temipalé, ʻa ia ʻoku tongitongi ʻi ʻolunga ai ʻa e kupuʻi lea Santidad al Señor, la Casa del Señor (Māʻoniʻoni ʻi he ʻEikí, ko e Fale ʻo e ʻEikí), ʻo hangē ko ia ʻoku hā ʻi he temipale kotoa pē.
Naʻe pehē ʻe Tilisa, “Ko e taimi kotoa pē ʻoku ou lau ai e kupuʻi lea ko iá, ʻoku ou ongoʻi ai ha fakamoʻoni mālohi ki hono moʻoní. ʻOku ou manatuʻi ʻeku haʻu ki heni ʻi ha efiafi ʻe taha mo ʻemau kau Mutualé, ke ʻaʻahi mai pē ki he kelekele ʻo e temipalé. ʻI he ʻosi ʻemau ʻaʻahí, naʻe fehuʻi mai ʻe he pīsopé pe ko e hā ʻa e ongo ne mau maʻu hení. Ne mau talanoa ki ai pea mau maʻu e tali tatau pē ʻi ha foʻi lea ʻe taha: nonga.”
ʻOku mavahe atu leva ʻa Kelisia mo Tilisa kuó na ongoʻi ʻa e tali he foʻi lea haohaoa ko iá … ʻo haohaoa he ko e temipalé ko e feituʻu ia ʻo e nonga.
ʻŪ taá naʻe fai ʻe Richard M. Romney