Kaumeʻa ki he Kaumeʻa
Ko e Ngaahi Temipalé Ko ha Meʻaʻofa Mei he Tamai Hēvaní
Mei ha lea ʻi he konifelenisi lahi ʻo ʻEpeleli 2000.
“Ko e fānau iiki kotoa pē kuo nau pekia, ka ʻoku teʻeki ai ke nau taʻu motuʻa feʻunga ke ʻekeʻi meiate kinautolu ʻa ʻenau ngaahi ngāué, ʻoku fakamoʻui mo kinautolu ʻi he puleʻanga fakasilesitiale ʻo e langí” (T&F 137:10).
ʻI ha ngaahi taʻu siʻi he kuo hilí, ne vahe mai ke u fakahoko ha konifelenisi fakasiteiki ʻi Kalefōnia. ʻI heʻeku puna mai ki ʻIutaá, ne ʻi ai ha fefine fakaʻofoʻofa ne taʻu 70 tupu ne tangutu ʻi hoku tafaʻakí. Ko hono hingoá ko Peti pea naʻá ne manako he faʻa talanoá.
Ne fakamatala mai ʻa Peti fekauʻaki mo hono fāmilí—fekauʻaki mo hono husepāniti mo hono foha ne mālōloó. Ne hoko atu ʻema talanoá ʻo aʻu ki he meimei tō e vakapuná. Naʻá ku pehē ange, “ ʻE Peti, kuo lahi ange pē hoʻo talatalanoa he lolotonga e folaú. Kimuʻa pea tau tō ki Sōleki Sití, ʻoku ou fie fai atu ha fanga kiʻi fehuʻi.”
Naʻá ku fehuʻi fakamātoato ange ki ai, “ ʻE Peti, ʻokú ke ʻiloʻi nai te ke lava ʻo toe mamata ki ho husepāniti kuo pekiá?”
Naʻá ne pehē mai, “He ʻoku malava ke hoko ia?”
Naʻá ku fehuʻi ange leva, “ ʻOkú ke ʻiloʻi nai ʻe lava ke ke toe mamata ki ho foha ko Mātiu ne mate kei pēpeé?”
Ne kamata ke fakapetepetetangi pea tetetete hono leʻó. Ne ongo kiate ia e Laumālie ʻo e ʻEikí. Naʻá ne ʻofa lahi kiate kinaua.
Ne u fehuʻi ange leva ʻi he faʻa lotu, “ ʻE Peti, ʻokú ke ʻiloʻi nai ʻoku ʻi ai haʻo Tamai Hēvani ʻofa mo angalelei ʻokú Ne ʻofa lahi ʻiate koe?”
Naʻá ne pehē, “He ʻoku ʻi ai?”
Ne u fehuʻi ange, “ ʻE Peti, ʻokú ke ʻiloʻi nai ʻoku ʻi ai ha palani makehe ʻa hoʻo Tamai Hēvaní maʻau pea ʻe lava ke fakataha ho fāmilí ʻo taʻengata?”
Naʻá ne tali mai, “Te mau lava nai ʻo pehē?”
Naʻá ku fehuʻi ange, “Kuó ke ʻosi fanongo nai ʻi ha taimi kimuʻa ange ki he palaní?”
Naʻá ne pehē mai, “ ʻIkai.”
Ne u pehē ange ʻi he loto fakamātoato moʻoni, “ ʻOkú ke fie ʻilo nai ki ai?”
Naʻá ne tali mai, “ ʻIo, ʻoku ou loto ki ai.”
Ne ongo moʻoni ki ai ʻa e Laumālie ʻo e ʻEikí.
Naʻe akoʻi ʻe he kau faifekaú ʻa Peti. Ne hili mei ai ha uike ʻe tolu, lolotonga pē ia ʻene nofo ʻi ʻIutaá, ne telefoni ange ʻa Peti: “ ʻE Misa Kikusi, ko au Peti. ʻE papitaiso au. ʻE lava ke ke haʻu ki hoku papitaisó?”
Naʻá ku ʻalu mo hoku uaifí ki hono papitaisó. Ne fakafeohi ki ai ha kāingalotu tokolahi. ʻIo, pea he ʻikai ngalo ʻiate au ʻa e fiefia ne hā mei hono fofongá ʻi heʻene ʻalu hake mei he vaí!
He ʻikai ngalo ʻiate au ʻa e ngaahi loʻimata ʻo e fiefia ʻi he ʻōlita toputapu ʻo e Temipale Sōlekí ʻi ha taʻu ʻe taha mei ai. ʻOku ou manatuʻi ʻa ʻene nonga mo e malama fakasilesitiale meiate ia ʻi he taimi ne silaʻi ai ia ki hono husepāniti kuo pekiá mo hono fohá pea mo hono ʻofefine ne kei moʻuí ʻa ia ne ʻosi kau ki he Siasí.
Ne ʻilo ʻe hoku kaungāmeʻa ko Petí ʻa e ʻEiki ko Sīsū Kalaisí. ʻOkú ne ʻiloʻi koeʻuhí ko e sila ko ia ʻi he temipalé, ʻe lava ke taʻengata hono fāmilí ʻi he ʻEikí.
Tā fakatātaaʻi ʻe Dilleen Marsh; fakaʻaongaʻi ʻa e ngaahi taá ʻi he angalelei ʻa e fāmili Kikusi, tukukehe ʻo ka toki fakahā atu; faitaaʻi ʻo e kālotí © Getty Images; mei muí: faitaaʻi ʻe Welden C. Andersen
Ko e tui ʻe ʻEletā Kikusi ha kimono ki he tā ko ʻení ʻi he hoko hono taʻu uá. ʻE lava nai ke ke sio ki he meʻavaʻinga ʻokú ne toʻó?
ʻEletā Kikusi (ʻi muʻa he toʻohemá) ʻi hono taʻu 13 mo hono ngaahi kaungāmeʻá mo e kau faiako ʻi he ako lotolotó.