2009
ʻOku Mau Tui ko e Fāmilí ko e Tuʻutuʻuni ia ʻa e ʻOtuá
ʻOkatopa 2009

Taimi Feʻinasiʻakí

ʻOku Mau Tui ko e Fāmilí ko e Tuʻutuʻuni ia ʻa e ʻOtuá

“Ko e fāmilí ko e uho ia ʻo e palani ʻa e Fakamoʻuí ki he ikuʻanga taʻengata ʻo ʻEne fānaú” (“Ko e Fāmilí: Ko ha Fanongonongo Ki Māmani”).

Ko ha tangata kovi ʻa ʻAmalekaia. Naʻá ne palōmesi ki he kau Nīfaí ha ngaahi meʻa lahi ʻo kapau te nau ʻai ia ke tuʻi. Ne tui ha kakai tokolahi kiate ia pea nau tafoki mei he angamāʻoniʻoní.

Ko Molonai naʻe ʻeikitau ʻi he kau sōtia ʻa e kau Nīfaí. Naʻá ne angamāʻoniʻoni pea tui kia Sīsū Kalaisi. ʻI he fanongo ko ia ʻa Molonai ne tokolahi e kakai ne tohoakiʻi atu ʻe ʻAmalekaiá, naʻá ne ʻita ai. Naʻá ne ʻiloʻi ʻoku tuʻu ʻa e kakaí ʻi ha tuʻunga fakatuʻutāmaki ke mole ai ʻenau tauʻatāiná.

Ne haeʻi ʻe Molonai ha konga ʻo hono kofú peá ne tohi ai, “Ko e fakamanatu ki hotau ʻOtuá, mo ʻetau lotú, mo e tauʻatāiná, mo ʻetau melinó, ko hotau ngaahi uaifí, mo ʻetau fānaú” (ʻAlamā 46:12). Naʻá ne fakamaʻu ʻa e tupenú ki ha muiʻi vaʻakau pea ui ia ko e fuka ʻo e tauʻatāiná. Naʻá ne lotu leva maʻá e kakaí peá ne ʻaʻahi kiate kinautolu, ʻo taʻataʻalo ʻa e fuka ʻo e tauʻatāiná mo ui ki he kau Nīfaí ke nau kau fakataha mo ia ʻi hono maluʻi ʻa ʻenau tauʻatāiná. (Vakai, ʻAlamā 46:1–21.)

ʻOkú ke moʻui ʻi ha kuonga ʻoku ʻi ai ha kakai hangē ko ʻAmalekaiá ʻoku nau fie taki atu kitautolu ke ʻoua naʻa tau muimui ki he palani ʻa e Tamai Hēvaní. Ko e taha ʻo e ngaahi konga mahuʻinga taha ʻo e palani ko iá ko e fāmilí.

ʻOku fie maʻu ʻe he Tamai Hēvaní ke mahino ki he kāingalotu ʻo e Siasí ʻa ʻEne palani maʻá e ngaahi fāmilí. Naʻe tohi ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e “Ko e Fāmilí: Ko ha Fanongonongo ki Māmani” ke fakahaaʻi ʻa e meʻa ʻoku tau tui ki ai fekauʻaki mo e ngaahi fāmilí. ʻE lava ke fakalotolahiʻi kitautolu ʻe he fanongonongó ʻo hangē pē ko e fuka ʻo e tauʻatāiná ke tau manatuʻi pea fakamatalaʻi ʻa e meʻa ʻoku tau tui ki aí.

ʻEkitivitií

Toʻo ʻa e peesi K4, ʻo fakapipiki ia ʻi ha pepa matolu. Tautau ʻa e fanongonongó ʻi ha feituʻu ʻe lava ho fāmilí ʻo sio ki ai pea manatuʻi ʻa e mahuʻinga ʻo e fefakamālohiaʻakí.

Ngaahi Fakakaukau ki he Taimi Feʻinasiʻakí

  1. “Ko e Fāmilí: Ko ha Fanongonongo Ki Māmaní” ko ha fakahā fakaonopooni ia. ʻAi ke fanongo ʻa e fānaú pe ko e hā hono tuʻo lahi hono fakaʻaongaʻi ʻa e ongo foʻi lea ko e “fakahā” pe “ne fakahā” ʻi heʻenau toutou lau fakataha ko ia ʻa e ngaahi tefito ʻo e tui hono hivá. Akoʻi ange ʻoku kei hokohoko fakahā mai pē ʻe he ʻOtuá ʻa Hono finangalo ki Heʻene fānaú. ʻOku ui ʻa e fetuʻutaki ko ʻeni mei he ʻOtuá ko e fakahā. ʻOange ha tatau ʻo e “Ko e Fāmilí: Ko Ha Fanongonongo Ki Māmani” ki he fānaú pea fakamatalaʻi ange ko e fanongonongó ko ha fakahā ia ne ʻomi ʻi hotau kuongá ʻo fakafou mai ʻi he kau tamaioʻeiki fili ʻa e ʻOtuá. ʻOange ki he kalasí takitaha ha sētesi pe kupuʻi lea mei he fanongonongó kae toʻo ha ngaahi foʻi lea mei ai. ʻAi ke nau ngāue fakataha ke fakafonu ʻa e ngaahi lea ʻoku puliá. Hangē ko ʻení: “Ko e ko e ʻa e Fakamoʻuí ki he ʻikuʻanga taʻengata ʻo ʻEne fānaú.” Fakaafeʻi ʻa e kalasi takitaha ke nau tuʻu pea lau ʻa ʻenau kupuʻilea pe sētesi kuo ʻosi fakakakató. Hivaʻi ʻa e veesi ʻuluaki ʻo e “ ʻOku ʻa e ʻOtuá ʻa e Fāmilí” (Liahona, ʻOkatopa 2008, K12–K13). Fakamamafaʻi ange ko e fanongonongo ki he fāmilí ko ha fakahā ia mei he ʻOtuá pea ʻoku fie maʻu ke mahino ia kiate kitautolu pea tau moʻui ʻaki hono ngaahi akonakí. Tānaki ʻa e ngaahi tatau ʻo e fanongonongó; te ke toe fakaʻaongaʻi ia ʻi he uike hono tolú.

  2. ʻOku akoʻi mai ʻe he “Ko e Fāmilí: Ko Ha Fanongonongo Ki Māmani” ʻa e mahuʻinga ko ia ʻo e malí. Fakaafeʻi ha niʻihi ʻo e kāingalotu ʻo e uōtí pe koló ʻa ia kuo fakangofua ʻe he pīsopé pe palesiteni fakakoló ke nau kau ki ha pēnolo ʻo aleaʻi ʻa e mahuʻinga ko ia ʻo e malí (vakai, “Ngaahi Fealēleaʻaki ʻi he Pēnoló,” ʻOku ʻIkai Ha Ui ʻe Mahuʻinga Ange ʻi he Faiakó [2000], 215). Tomuʻa ʻoange kiate kinautolu ʻa e ngaahi fehuʻi te ke ʻeké. Ngaahi sīpingá: Ko e hā ha ngaahi founga kuo faitāpuekina ai koe mo ho hoá ʻe he Tamai Hēvaní? ʻE lava nai ke ke vahevahe ha talanoa fekauʻaki mo ha akonaki ʻo e ongoongoleleí ne tokoni atu ke ke hoko ko ha uaifi lelei (pe husepāniti)? Ko e hā e meʻa ʻe lava ke fai ʻe he fānaú ke nau teuteu ai ki haʻanau mali ʻi ha ʻaho? Mahalo te ke fie fokotuʻu ke toe vakaiʻi ʻe he niʻihi ʻe kau atú ʻa e “Ko e Fāmilí: Ko Hā Fanongonongo Ki Māmani.” Tuku ke taufetongi ʻa e fānaú ʻi hono fili mo lau ha fehuʻi. ʻAi ke tauʻatāina pē ʻa e niʻihi ʻe kau atú ʻi hono ʻoatu ʻenau talí. Fakamoʻoni ki he mahuʻinga ko ia ʻo e malí ʻi he palani ʻa e Tamai Hēvaní.

Faitā ʻa Matthew Reier