Ko Hono Fai ʻo e Fakamoʻoní

Maria Kaneva, Palekovaʻati, Pulukālia

ʻOku pehē ʻe ʻIlinika he ʻUluaki Sāpate ʻo e Māhina kotoa pē, “Te u fuofua ʻalu au.” Naʻá ne piki maʻu ki he seá pea fonu ʻi he loto vēkeveke, peá ne feinga ke maʻu ha loto toʻa. ʻOku kei taʻu 9 pē ʻa ʻIlinika ka ʻoku hangē ko e tokotaha loto toʻa taha ia ʻi he fāmili ko ʻeni ʻe toko valu ʻa ia ʻoku nau haʻu maʻu pē ki he lotú ʻi he kiʻi kolo ʻo e Siasí ʻi Pulukāliá.

Kimuʻa peá ne tuʻu haké, ʻoku faʻa tatali ʻa ʻIlinika ke sio pe ʻoku ʻi ai ha taha ʻe fie fakamoʻoni kimuʻa pea toki fai ʻene fakamoʻoní. ʻOku fakahilehila atu ʻa e tokotaha kotoa pea tatali ke ne ʻalu ki muʻa. ʻOku faifai pē peá ne malimali mo lue atu ki he tuʻunga malangá. ʻOku fokotuʻu ʻe he palesiteni fakakoló ha kiʻi tuʻunga ke tuʻu ai kae lava ke ne sio ki he kāingalotú. ʻOku sio atu pē ʻa ʻIlinika ʻa ia ko e tokotaha pē ia ʻi he Palaimelí ki he kiʻi haʻofanga tokosiʻí pea kamata leva ʻene leá.

ʻOku hangē ʻoku ʻikai ke ne manavasiʻí ʻi hono siofi ia ʻe he tokotaha kotoa. ʻOku fakafanongo ʻa e kāingalotú ki hono kiʻi leʻo ongo mālié. ʻI heʻene lea kau kia Kalaisí, folofolá mo e moʻoni ʻo e Siasí, ʻokú ne takiekina ʻa e fakamoʻoni ʻa e tokotaha kotoa pē.

ʻI heʻene tangutu ki laló, ʻoku lōngonoa pea hangē kuo ueʻi ʻe he Laumālié honau lotó. ʻOku tuʻu hake leva ha taha ʻo e kāingalotú ʻo fakamoʻoni pea nau tuʻu tahataha hake ai pē …