Mahuʻinga ʻa e Tatali aí
ʻI heʻeku hū atu ki he Temipale Puenosi ʻAealesi ʻĀsenitiná mo e toʻu tupu hoku uōtí ke papitaiso maʻá e pekiá, ne mau tatali ʻi ha ngaahi miniti siʻi ʻi he loki talitalí. Naʻe kole mai ʻe he kau ngāue temipalé ke mau toe ō ki ha holo naʻe ʻi ai ha ʻū sea ʻo hoko atu ai ʻemau tatalí.
Naʻe tokolahi ʻa e kakai ne omi ki he temipalé mei he ngaahi feituʻu kehekehe ʻo ʻĀsenitina, koeʻuhí pē he ko e ʻaho Tokonaki. Ne mau tatali ai ʻi ha houa ʻe ua mo e konga, ʻo tangutu fakalongolongo pē. Naʻe kamata ke hū mai ki hoku ʻatamaí ha ngaahi fakakaukau naʻe ʻikai ke sai: “Anga fēfē ʻenau ʻai ke mau tatali fuoloa peheni? ʻOku ou ongosia pea naʻe sai ange kapau naʻe ʻikai ke u haʻu au, mo e mole noa hoku taimí.”
Ne u tuʻu hake ʻo kamata ke u luelue atu he holó. Ne hū mai ha taha ʻo e kau ngāué ʻo pehē mai: “Toʻu tupu, kātaki pē muʻa ʻo ʻoua te mou fiu he talí. ʻOku mahino kiate au kuo fuoloa fau hoʻomou talí ka ʻoku mou ʻiloʻi koā ha meʻa? ʻOku ʻi he maama tataliʻanga ʻo e ngaahi laumālié ha kakai ʻe laui miliona kuo laui senituli ʻenau tatali ai ki he momeniti ko ʻení, pea ʻoku ou fakapapauʻi atu ʻoku nau tatali loto vēkeveke mai ke fai mo nau aʻusia ia. ʻOku lolotonga fai papitaiso mo hilifakinima ʻa e houʻeiki tangatá, pea ko e meʻa pē ia te nau lava ʻo fai he taimi ní.”
Ne u ongoʻi mā he taimi naʻá ne leaʻaki ai e ngaahi leá ni. Naʻá ku fakatokangaʻi hake ʻoku ou siokita he naʻe ʻikai ke u fie foaki ha houa lahi ki he kakai ko ia kuo laui taʻu ʻenau tatalí, ʻa ia naʻe ʻikai ke nau maʻu ʻa e faingamālie kuó u maʻú ke fanongo ki he Siasi moʻoní peá u papitaiso ʻi he māmaní.
Naʻe toe hū mai ʻa e tokotaha ngāué pea kamata ke ne ui ha ngaahi hingoa mei homau uōtí. Naʻe ʻomi ʻe ha fefine ha teunga hina ke mau tui. Hili ʻemau teuteú, naʻá ne takaiʻi homau ʻulú ʻo haʻihaʻi ʻaki ha loufau hinehina.
Naʻa mau lue laʻi vaʻe leva ki he ʻū sea ʻi he loki faiʻanga papitaisó. Naʻe molū mo māʻolunga ʻa e kāpetí ʻo hangē ia haʻamau lue pē he ʻeá.
ʻI he hoko mai ki hoku taimí, ne u ongoʻi tailiili tatau pē mo e ʻaho ko ia ne papitaiso ai aú. Ka naʻe angalelei ʻa e kau ngāué pea ne nau kātakiʻi kimautolu pea ko ha ongo makehe ia.
ʻI heʻeku kaka hake mei he vai papí, naʻe tatali mai ha fefine kiate au mo ha fuʻu tauveli hinehina pea naʻá ne fofonga malimali. Ne u fetongi hoku valá peá u hū atu ki ha loki ke hilifakinima au. Naʻá ma ō mo e fefine tatau pē naʻá ne ʻomi kiate au e tauvelí pea naʻá ne fakamālō mai heʻeku loto vēkeveke ke fai e ngāue ʻa e ʻEikí.
ʻI heʻeku mavahe mei he temipalé, ne u ʻiloʻi ai ko e taha ia ʻo e ngaahi meʻa lelei taha kuó u aʻusia heʻeku moʻuí. Ko e temipalé ko ha feituʻu māʻoniʻoni ia ʻoku nofoʻia ʻe he Laumālie ʻo e ʻEikí ʻo tataki ʻEne ngāue maʻongoʻongá. ʻOku mahuʻinga ke faʻa tatali ki ai.
Tā fakatātaaʻi ʻe John Zamudio