Ko Hono Papitaiso ʻEku Kuifefiné

Marilena Kretly Pretel Busto, Sao Paulo, Palāsila

ʻI he ʻaho 30 ʻo Sune 2001, ne u lolotonga ngaohi ha foʻi keke ki he ʻaho fāʻeleʻi ʻa hoku ʻofefiné mo e tatangi ʻa e telefoní. Ko hoku tokoua mei Palāsilá ko ʻene tā ange ke fakahoko mai kuo mālōlō ʻa ʻemau kuifefiné.

Naʻe fakaloloma ʻa e ongoongó ka naʻe ʻikai ke u loto mamahi. Ko e ʻuhingá he naʻe moʻui ʻa siʻeku kuifefiné ʻi ha meimei taʻu ʻe 102. Naʻá ku fiefia kuo fakatauʻatāinaʻi ia mei heʻene motuʻá, mei hono sino fakamatelié pea kuó ne ʻalu atu ki he maama tataliʻanga ʻo e ngaahi laumālié.

Naʻe kamata ke u fakakaukau ki he hoko ʻi he ʻaho tatau ʻa ʻene maté mo e ʻaho fāʻeleʻi ʻo hoku ʻofefiné, naʻá ku fakakaukau pe naʻe ʻi ai koā ha mahuʻinga ʻo e taimi ne hoko aí. ʻI he ʻalu ʻa e ʻahó, ne u toki ʻilo ai ʻa hono ʻuhingá: ʻe faingofua kiate au ke u manatuʻi ke u papitaiso maʻa ʻeku kuifefiné hili ha taʻu ʻe taha ʻo ʻene mālōloó. Naʻá ku toʻo kiate au ʻa e fatongia ko ʻení, ʻo u ʻilo kuo pau ke u tali ki he ʻaho fāʻeleʻi hono hoko ʻo hoku ʻofefiné.

Ne vave ʻa e ʻalu ʻa e taʻú. Naʻe ʻikai ke u maʻu ʻa e faingamālie ke ʻalu ki he temipalé ʻi he hoko totonu ʻa e taʻu ʻe taha ʻo e mālōlō ʻa ʻeku kuifefiné, he naʻá ku nofo ʻi Potukali peá u ʻalu ki he Temipale Matuliti Sipeiní. Ka naʻe ʻikai ke meimei hala ha ʻaho ne u fakakaukau ai ki hoku fatongia ke papitaiso maʻa ʻeku Kuifefine ko Sosefiná.

Ne mau toki lava ʻo ʻalu ki he temipalé ʻi ʻOkatopa ʻo e taʻu 2002. Ne u ʻalu fakataha mo hoku husepānití mo homa foha ko Mātiú, ʻa ia ne teu ke maʻu hono ʻenitaumení ke teuteu ke ʻalu ʻo ngāue fakafaifekau. Naʻá ku fiefia ke ʻalu ki he temipalé pea ne u fakakaukau te u ongoʻi ha ongo makehe ʻi hono papitaiso au maʻa ʻeku kuifefiné.

Ne fakahoko ʻe hoku husepānití ʻa e papitaisó ka naʻe ʻikai ke u ongoʻi ʻe au ha meʻa. Ne fakahoko ʻe hoku fohá ʻa e hilifakinimá ka naʻe ʻikai pē ke u ongoʻi ʻe au ha meʻa. Ne ʻosi atu ʻa ʻeku hohaʻa ʻi he ʻikai ke u ongoʻi ha meʻá pea naʻá ku fiefia pē ʻi hono fakahoko ko ia ʻo e ngaahi ouaú maʻa ʻeku kuifefiné.

Hili e ʻenitaumení, ne mau ʻalu ki he loki silá ke silaʻi ʻeku Kuifefiné ki heʻene ongo mātuʻá. ʻI heʻemau tūʻulutui ʻi he ʻōlitá ke fakahoko ʻa e ouaú ne kamata ke lea ʻa e fai silá, naʻá ku ʻohovale heʻeku ongoʻi hangē ʻoku sokiʻi hoku sinó ʻo kamata mei hoku ʻulú ʻo ʻalu hifo ʻi hoku sinó. ʻOku faingataʻa ke fakamatalaʻi ka ʻi he foʻi momeniti māfana ko iá, ne u ʻiloʻi pau ne fiefia ʻa ʻeku Kuifefine ko Sosefiná ʻi hono silaʻi ia ki heʻene ongo mātuʻá.