O Le Meaalofa Sili

Lois N. Pope, Iuta, ISA

I se tasi taeao ina ua maea lo’u faitauina ma manatunatu loloto i le Tusi a Mamona, na ou iloaina ai o le a ou toe uma foi ona ou faitauina i le faaiuga o le tausaga. O lenei malamalamaaga na ou toe manatua ai lo’u uso, lea sa ou tausia i lo’u fale i ona vaiaso mulimuli ao ma’i i le kanesa e le mafai ona togafitia i le 2005.

Sa naunau Oliva e faataunuu se folafolaga mo ia lava ia mulimuli i fautuaga a Peresitene Gordon B. Hinckley (1910–2008) ma faitau ia uma le Tusi a Mamona i le faaiuga o le tausaga.1 Peitai e oo atu i le tautoulu, na tele pea lava itulau a Oliva [e lei faitauina]. Mulimuli ane na matua vaivai lava ma lē mafai ona ia toe faitau mo ia lava.

I le naunautaiga e tausia lana tautinoga, na aioi mai Oliva ia te au pe mafai ona ou faitauina atu le Tusi a Mamona ia te ia. Sa fai sina mamao i luma o la’u foi faitau, ae ua ou fiafia e toe amata mai i le mea sa gata ai o ia.

O le faitau atu ia Oliva i aso taitasi, sa mafai ai ona ou fesoasoani ia te ia ia taunuu lana sini e faauma le [faitauina o le] tusi i le faaiuga o le tausaga, na o ni nai aso a o lei maliu o ia. I lena taimi sa tau le mafai ona tautala o ia ma le manino, ae sa manino ma malamalama lona mafaufau. I le tele o taumafaiga, sa ia faailoa soo mai lona loto faafetai ia te au mo le meaalofa sa ou avatu ia te ia, i le faapea mai ua mafai nei ona oti filemu o ia aua ua faataunuuina lana folafolaga.

Sa ou faitauina soo le Tusi a Mamona muamua, ae ou te le’i lagonaina le malosi o le agaga po o le malamalama manino i ona aoaoga e pei ona ou mauaina i na masina o le mou ese atu o le ola o si o’u uso. E moni lava, sa aumai e Oliva se meaalofa sili mo au.