Ang Bag-ong Sinina ni Maria
“Mosimba sa Dios, sa bisan diin nga dapit kamo anaa sa espiritu ug sa kamatuoran” (Alma 34:38).
Si Maria mituyok-tuyok sul-ob ang maanindot nga bag-ong pang Dominggo nga sinina nga gitahi sa iyang lola alang kaniya. Pink kini nga may puti nga mga laso. Kinanindutan kini nga sinina nga sukad naangkon ni Maria, ug mibati siya nga hilabihan ka matahum tungod niini. Gipahiyuman niya ang iyang kaugalingon atubangan sa salamin ug mituyok-tuyok pag-usab aron mubokad ang palda. Mahinamon si Maria nga mosimba inigka Dominggo aron ipakita sa iyang mga higala ang iyang bag-ong sinina.
Sa simbahan si Maria ganahan nga makadungog sa tanan niyang mga higala nga modayeg sa iyang sinina. Sa Primary magdula siya sa mga laso sa iyang sinina imbis nga maminaw sa leksyon ni Sister Sánchez.
Si Maria wala usab maminaw sa mga pagpamatuod nga gihatag sa mga tawo diha sa miting sa sakrament. Nagkalingaw siya sa pagbalik-balik og pagbadbad ug sa paghigot sa matag bugkos sa iyang sinina.
Sa dihang nahuman ang miting, iyang namatikdan nga ang pipila ka mga tawo adunay mga luha sa ilang mga mata sa pagbiya nila sa simbahan.
“Nganong naghilak kadtong mga tawo, Mama?” Nangutana si Maria.
“Ilang gibati ang Espiritu karon,” miingon si Mama samtang siya nagpahid sa iyang kaugalingong luha. “Ug usahay molugmaw ang mga luha sa atong mga mata. Ang mga pagpamatuod maanindot, dili ba?”
Si Maria wala motubag. Siya walay nahinumduman bisan unsa sa mga gipangsulti sa tanan.
Nianang gabii sa pagpahimutang ni Mama kang Maria sa higdaanan, si Maria nangutana, “Nganong wala ko mobati sa Espiritu didto sa simbahan karon, Mama?”
“Ang Espiritu mosulti sa ligdong, hinay nga tingog,” miingon si Mama. “Kinahanglan gayud nga maminaw kita aron makamatikod niini. Kon mosimba kita, kinahanglan nga kita mopukos ngadto sa Langitnong Amahan ug ni Jesukristo—dayon atong bation ang Espiritu.”
Si Maria mihunahuna kon unsa ang iyang gipunting sa simbahan nianang adlawa. Siya naghunahuna sa iyang bag-ong sinina, dili kabahin sa Langitnong Amahan ug ni Jesukristo.
Pagka sunod semana si Maria misul-ob na usab sa iyang nindot nga pink nga sinina didto sa simbahan. Apan naminaw na siya ni Sister Sánchez sa Primary. Sa miting sa sakrament siya naningkamot sa paghunahuna kabahin sa Langitnong Amahan ug ni Jesukristo. Si Maria mibiya sa simbahan nga mibati sa Espiritu diha sa iyang kasingkasing. Nalipay siya nga misimba nga dili lamang sa pagpaibug sa iyang bag-ong sinina.
Paghulagway pinaagi ni Natalie Malan