Ang Akong Tinguha sa Football
Gusto ko nga modula uban sa usa ka hawud nga team, apan basin grabe ra unya kaayo ang pagbansay.
Ganahan ko nga modula og football. Karon 14 anyos na ako ug sige na ko og dula og football sukad nag-edad pa ako og 5. Ang pagdula sa mga sport nakatudlo kanako sa pagbaton og taas nga mga sumbanan ug mga mithi nga akong gihan-ay sa akong kaugalingon, bisan og ang mga desisyon malisud usahay. Usa sa lisud nga mga desisyon mao ang pagdula o ang dili pagdula og football ma-Dominggo.
Sa siyam pa ang akong edad, ako ganahan kaayo ug mitahud sa akong coach, nga si Coach Hashem. Bisan pa niana, gusto ako nga modula sa mao nga team isip usa ka higala sa eskwelahan, maong mi-try-out ako sa laing team. Kini nga team tinuod gyud nga hawud, ug nasayud nga kon ako makaapil niini, ako gilauman nga mohalad gayud sa akong kaugalingon ug modula sa tinud-anay. Daghang mga batang lalaki ang gustong masakop niini nga team, apan swerte ako nga nasulod human sa pipila ka iliminasyon nga dula.
Ang adlaw sa katapusang try out miabut. Midula ako sa tinud-anay, ug maayo ang akong gibati niini. Pagkahuman, ang coach miduol ni mama ug kanako ug miingon nga ganahan gayud siya nga ako masakop sa team. Nalipay ako. Apan dayon siya nangutana, “Makadula ka ba og ma-Dominggo? Kinahanglan nga aduna akoy team alang sa mga sangka, ug nagpasabut kana nga usahay adunay dula sa Dominggo.”
Gipasagdan ako ni mama nga motubag sa pangutana.
“Dili, sir, dili ko modula og Dominggo.” Nasayud ko nga mao kana ang hustong tubag, apan tingali nagpasabut kini nga dili na ako maapil sa team.
Nianang gabhiona, ang tawag nga magpahibalo kanako nga napili ako para sa team wala gayud moabut. Nawad-an kaayo ko sa kadasig.
Inay mobati sa ingon, miapil ako sa kasilinganan nga team uban sa daghang higala. Nalingaw kaayo kami sa unang tuig ug nagmalampuson, apan sa ikaduhang tuig ang team naglisud ug usahay mawala ang pokus sa dula. Nasagmuyo ako. Naninguha ako og maayo sa kada dula, apan kadaghanan lupig kami.
Human sa usa ka bati kaayo nga dula, si Coach Hashem, kinsang team maayong modula, miduol nako diha sa dulaanan sa football. Iya akong gipangutana kon kumusta ko. Miingon ako nga, “Dili kaayo maayo.” Giingnan nako siya nga gimingaw ko sa una nakong mga kauban sa team. Si Hashem hanas kaayo nga motudlo ug kanunay modaug ang iyang mga magdudula.
“Unsa kaha kon moapil ka sa among team kon makigsangka na kami sa sunod nga dula?” Miingon si Hashem.
“Ganahan kaayo ko niana!” Madasigon akong mitubag.
“Maayo hinoon!” Miingon si Hashem, nga nagpahiyum. “May usa lang ko ka pangutana nimo. Makadula ka ba og ma-Dominggo?” Wala ko kasabut sa akong gibati. Kalit nga mibati akog kaluya. Akong nahinumduman ang nahitabo sa miagi sa dihang gipangutana akog sama niini.
Akong gitan-aw si mama. Akong gitan-aw si papa. Sila usab naghulat sa akong tubag. Akong gitan-aw si Hashem.
“Dili, gikasubo ko. Di man ko modulag ma-Dominggo,” miingon ako. “Duna bay kalainan niana?”
Si Hashem nahilum og kadiyut. Nakita niya nga ang panagway sa paglaum sa akong nawong daling nahanaw samtang mitubag sa iyang pangutana.
“Sige, Ok ra na,” mitubag si Hashem. “Dili tingali ta makadula sa mga sangka sa Dominggo. Ganahan kaming modula ka uban kanamo.”
Sa wala madugay misugod ako sa pagpraktis uban sa team ni Hashem. Ang team pas-pas kaayo nga modula, ug ilang gihangup ang akong pagbalik. Ganahan akong magdula uban kanila.
Wala kami modaug sa tanan namong mga dula sa sangka, apan kami naningkamot og maayo, ug nalingaw kaayo kami. Sa wala madugay nahimo akong permanente nga sakop sa team ni Hashem. Bisan tuod nasayud sila nga dili ako modula og ma-Dominggo, mapasalamaton gihapon sila tungod kay ako nadugang sa team diha sa ubang mga adlaw nga dula.
Karon ako usa na ka teacher sa Aaronic Priesthood. Nagdula gihapon ako og sangka sa football ug sa gihapon mipili nga dili modula ma-Dominggo. Dili kini problema alang kanako o sa mga team nga akong gidulaan. Nagtuo ko sa pagtahud sa Igpapahulay nga adlaw ug sa paghupot niini nga balaan. Alang kanako nagpasabut kini nga dili magdula sa Dominggo.
Paghulagway pinaagi ni Greg Stapley