Magtubo ngadto sa Ginoo

Ni Kathleen H. Hughes

Nagserbisyo isip unang magtatambag sa kinatibuk-ang kapangulohan sa Relief Society gikan sa 2002 hangtud sa 2007

Gikan sa usa ka pakigpulong sa debosyonal nga gihatag didto sa Brigham Young University–Idaho sa miaging Abril 29, 2008. Alang sa kinatibuk-ang teksto sa Iningles nga pamulong, bisitaha ang http://web.byui.edu/DevotionalsandSpeeches.

Samtang nagbasa sa makausa pa sa Basahon ni Mormon, nabasahan nako ang kapitulo sa Helaman diin una namong nasayran ang anak nga mga lalaki ni Helaman: “Ug nahinabo nga siya adunay duha ka anak nga mga lalaki. Siya mihatag ngadto sa kamagulangan sa ngalan nga Nephi, ug ngadto sa kamanghuran, sa ngalan nga Lehi. Ug sila misugod sa pagtubo ngadto sa Ginoo” (Helaman 3:21; empasis gidugang).

Kining mga bataa wala lamang motubo ngadto sa pagkahingkod nga adunay kahibalo, mahigugmaon, ug maalagaron sa Ginoo, apan nagpabilin sila nianang sama nga agianan sa tibuok nilang mga kinabuhi. Tungod niini nga ideya—niining pagpabilin nga matinuoron ug malahutayon—nga gusto kong mohalad sa akong mga pulong.

Bisan og kamo ang unang hernerasyon sa inyong pamilya nga midawat sa ebanghelyo, akong nahunahuna nga kamo mitubo nga may pagbati sa espirituhanong mga pangandoy. Kitang tanan, sa madugay o sa madali, motubo ug mobiya sa mga dapit nga miamuma ug miatiman kanato. Mipuyo ako sa amo, samtang nag-eskwela pa sa kolehiyo, ug sa dihang ako nagsugod pa lamang niini sa pagtudlo sa eskwelahan ug mibalhin ang akong mga ginikanan nga ako nagsugod sa pagkahingkod ug nagkinaugalingon.

Kining panahon sa kausaban sa kanunay mao ang usa ka piho nga kasinatian sa atong pasalig sa ebanghelyo. Ang kalibutan nagtanyag og dayag ug malinglahong mga pagdani. Kinahanglan nga kanunay kitang mangutana kon unsay atong gibuhat sa atong espiritu. Ang kabalaan nga ania kanato giamuma ba, o ang ato bang mga binuhatan nagpugong sa Espiritu nga mao ang modumala nga pwersa sa atong kinabuhi?

Ang pagpuyo og dili matarung nga kinabuhi wala magkinahanglan og paningkamot o panahon, sigun sa atong nasayran nga nahitabo sa mga tawo diha sa Basahon ni Mormon. Sa unang mga kapitulo sa 3 Nephi, atong makita nga ang mga Nephite, sa kadaghanang hitabo, mga dautan; ang mga Lamanite, kinsa nahimong mas matarung nga pundok, nagkadautan usab. Si Mormon misulat:

“Sila may daghan nga mga bata kinsa mitubo ug mianam og kalig-on sa mga katuigan, nga sila nahimo alang na sa ilang mga kaugalingon, ug nadala. …

“Ug sa ingon niini ang mga Lamanite nasakit usab, ug misugod sa pagkunhod ingon ngadto sa ilang hugot nga pagtuo ug pagkamatarung, tungod sa pagkadautan sa nagtubo nga kaliwatan” (3 Nephi 1:29–30; empasis gidugang).

Kita kinahanglan gayud nga magmabinantayon aron kita dili “mahimo alang na sa atong mga kaugalingon.” Kana usa ka makaikag nga hugpong sa mga pulong. Kini nasabtan nako nga sila naniguro una sa ilang mga kaugalingon ug nagtagbaw sa ilang mga kaibog nga gipahimangno sa mga propeta nga ilang likayan. Minunot sila sa mga pangdani ug mga panghaylo ni Satanas. Sa pipila ka punto sa atong mga kinabuhi, ang matag usa kanato kinahanglan gayud nga mohimo og kapilian sa pagsagup sa atong tinuohan o “mokunhod tungod sa pagkawalay pagtuo” o “motuyo sa pagsukol batok sa ebanghelyo ni Kristo” (4 Nephi 1:38).

Unta ako makasulti kaninyo nga adunay usa lang ka higayon nga pagtul-id aron sa pagsiguro nga dili kita malit-ag niining mga pagtintal, apan wala. Bisan pa niana, adunay usa ka sumbanan nga, kon sundon, makasiguro nga kon atong napili ang plano sa Amahan, magpabilin kita nga luwas; magpabilin kita nga matinuoron.

Sa 4 Nephi nakat-on kita mahitungod niadtong kinsa mipabilin nga matinuoron ug kinsang pagpamatuod mitubo. Sila “mipadayon sa pagpuasa ug pag-ampo, ug nagtigum kanunay sa pag-ampo ug pagpamati sa pulong sa Ginoo” (4 Nephi 1:12). Busa ang pag-ampo ug pagpuasa mao ang nag-unang bahin niini nga sumbanan. Alang kanako, ang usa sa makahupay ug masaligan nga mga bahin sa ebanghelyo ni Jesukristo mao ang kahigayunan ug panalangin sa pag-ampo. Sa kasagaran, wala kita sa dapit diin atong mapagawas ang tingog sa atong mga pag-ampo, apan sigun sa pagtudlo ni Amulek sa Alma 34:27, mapahimo nato ang atong mga kasingkasing nga “magpadayon sa pag-ampo … sa kanunay.”

Inubanan sa gamhanan nga pag-ampo, ang pagpuasa adunay gahum sa pagpalihok sa langit sa direkta ug mahinungdanon nga mga paagi. Usahay ang pagpuasa makadala og pagkabag-o sa kahimsog ug kalig-on sa mga lawas nga naluya sa sakit; usahay mopadasig kini sa mga hunahuna ug sa mga kasingkasing sa paghatag og tabang sa mga indibidwal kinsa nanginahanglan; usahay mapugngan niini ang mga huwaw ug mga kagutom. Ug sa kanunay ang pagpuasa modala kanato og kalinaw—ang kalinaw sa pagkasayud nga ang Ginoo nakaila kanato ug nakasabut sa atong mga panginahanglan ug mga kasingkasing.

Ang sunod nga bahin sa sumbanan mao nga sila nagtigum kanunay “sa pag-ampo ug sa pagpamati sa pulong sa Ginoo.” Sa daghang mga dapit gani ang pagsimba malisud kaayo ug nagkinahanglan og dakong sakripisyo sa panahon ug sa mga kapanguhaan. Ug bisan pa niana sa tibuok kalibutan, minilyon sa matinud-anong mga Santos naghimo niini sa matag Igpapahulay.

Gusto ko nga modugang og laing butang kabahin niini nga sumbanan—usa ka butang nga akong gituohan nga makahimog dako aron kita magpabilin sa ebanghelyo. Ang gusto nakong isulti mao ang templo. Sama sa atong pag-ambit sa sakrament matag semana aron pagbag-o sa atong mga pakigsaad sa pagbunyag uban sa Ginoo, ang pag-apil sa mga ordinansa sa templo nagpahinumdom kanato sa kaimportante sa atong mga pakigsaad ug paglig-on kanato diha sa atong gahum sa pagbuntog sa mga kadautan niining kalibutan.

Ang pag-ampo ug pagpuasa, kanunay nga panagtigum aron mag-ampo ug pagpaminaw sa pulong sa Dios, pagtambong sa templo, ug (naglaum ako nga buhaton kini sa walay pagpahinumdom) pagtuon sa mga kasulatan—mao kini ang sumbanan nga atong mahimo ug kinahanglang sundon kon magpabilin kita nga matinuoron ug makanunayon ug motubo ngadto sa Ginoo.