Ang Saad sa Templo
Natawo ako ug nagdako sa Simbahan apan mipili nga dili na mosimba sa pag-edad nako og mga 20. Naminyo ako sa usa ka buotan nga tawo kinsa dili sab aktibo sa iyang kaugalingon nga relihiyon. Samtang si John ug ako nagsugod sa among pamilya, sa wala madugay naglangkob og lima ka mga bata, ang akong kasingkasing misugod sa pagpangandoy sa mga pagtulun-an sa akong pagkabatan-on. Ako wala mamugos kang John, apan siya misugot nga mosimba uban kanako ug sa among duha ka anak nga mga lalaki, nga sila si John Rowe ug Joseph. Kami nagsugod sa pagsimba sa among ward matag Dominggo. Ang mga misyonaryo mitudlo kang John, kinsa midawat sa ebanghelyo ug human sa tulo ka bulan siya gibunyagan.
Kami nahimong aktibo nga mga miyembro sa among ward, nagbuhat sa among mga calling sa lain-laing mga auxilliary. Nadugangan pa og tulo ka mga bata—sila si Hayley, Tessa, ug Jenna—miabut sa among pamilya, ug ang tanang lima ka mga bata milambo sa Primary, Activity Days, ug Scouting. Sulod sa napulo ka tuig, si John ug ako mitambong sa mga klase sa pagpangandam sa templo tulo ka beses sa lain-laing higayon, apan kini wala gayud moresulta sa pag-adto namo sa templo. Kami gusto nga ang among pamilya mabugkos, apan kami wala pa mobati nga andam sa pagsunod sa tanang mga sugo. Kami kanunay nga nagsimba ug nagsunod sa kadaghanan sa mga sugo—kana maayo na, di ba? Gawas ana, ang among mga anak wala gayud silay nailhan nga kalainan.
Sa wala madugay kami nakaamgo nga kini dili gayud mao ang problema. Samtang amo siyang ipahimutang sa higdaanan matag gabii, ang among kinamagulangan nga anak nga lalaki misugod sa pagpangutana kon kanus-a ang among pamilya moadto sa templo. Kana mitandog sa among mga balatian.
Sa samang panahon ang among bishop midapit sa akong bana ug kanako ngadto sa iyang opisina. Gusto siyang masayud nganong kami wala pa mipasalig nga himoong tinuod ang mga panalangin sa templo alang sa among pamilya. Kami mipasabut nga kami dili pa andam sa pagsunod sa tanang mga sugo nga gikinahanglan alang sa pagdawat og rekomend sa templo ug kami mibati nga amo nang gibuhat ang kutob sa among mahimo.
Sama sa gibuhat sa mga bishop sa una, si Bishop Riding mitambag kanamo kabahin sa kaimportante niining mga ordinansa ug sa mahangturong mga panalangin nga giandam alang sa among pamilya. Apan dayon usa ka panghitabo nga dili gayud nako makalimtan. Si Bishop Riding hilum nga naglingkod sa pipila ka mga segundo sa wala pa siya mosulti og hinay, “Ako nadasig sa pagsulti kaninyo sa pag-adto sa templo karon. Ang bintana sa oportunidad hapit na masirado alang sa inyong pamilya.”
Kami wala masayud sa tanang gipasabut sa gipangsulti ni bishop, apan kami diha-diha dayon mibati sa Espiritu nga nagpamatuod sa katinuod niini. Kami nakaamgo nga ang templo dili lamang mopanalangin kanamo hangtud sa kahangturan apan ang among pagkabugkos makatabang sa among mga anak samtang sila magtubo ug magsugod sa paghimo og importanting mga desisyon alang sa ilang mga kinabuhi.
Si John ug ako mibiya sa opisina ni bishop nianang gabhiona nga may bag-ong pagbati nga buhaton sa walay paglangan. Kami mihan-ay og piho nga mga tumong ug petsa alang sa among endowment ug pagbugkos sa templo. Sukad niadto kami naningkamot sa tibuok namong kasingkasing sa pagsunod sa tanang mga sugo—dili lamang niadtong among ganahan nga sundon. Dugang niana, kami mihimo og makanunayong paningkamot sa pag-ampo ug pagtuon sa kasulatan ug mialagad nga mas mainiton sa among mga calling. Samtang among gibuhat kining mga sakripisyo, among nakita ang daghang panalangin nga miabut sa among kinabuhi.
Sa dihang kami nanlimbasug, gidasig namo ang usag usa. Nakahinumdom ako og usa ka piho nga gabii sa dihang ang akong bana nakamatikud nga ako mibati nga may gamay nga kabalaka. Siya mibasa og usa ka linya gikan sa booklet ni Presidente Boyd K. Packer nga Ang Balaan nga Templo,1 nga gitun-an namong duha. Ang mga pulong nga iyang gipakigbahin mipalapad sa akong panglantaw ug mipakalma sa akong mga kahadlok.
Si Bishop Riding mipadayon sa pag-awhag kanamo, hasta ang mga miyembro sa ward. Usa ka higala mihatag kanamo og kopya sa booklet sa Temples, diin among gibalik-balik og basa. Ang magtutudlo sa among klase sa pagpangandam sa templo mitubag sa among mga pangutana ug mitabang kanamo nga may pagkamabination ug sa pagpakigdait, ug daghang mga miyembro sa ward mihatag og maayong mga ehemplo sa katakus alang sa templo.
Matag gabii samtang among ipahimutang ang among mga anak sa higdaanan, kami mapasaligong mosulti kanila oo, ang atong pamilya moadto sa templo. Samtang nagkaduol ang adlaw, kami nakahimo sa paghatag kanila og piho nga petsa.
Niadtong Abril 17, 1998, mga unom ka bulan human niadtong adlaw nga nakapausab sa kinabuhi didto sa opisina sa among bishop, si John ug ako miluhod sa altar sa Templo sa Dallas Texas uban sa among lima ka mga anak. Daghang mga higala gikan sa among ward mitambong, ug pinaagi sa ilang suporta ako nakaamgo kon unsa ka dako ang ilang tinguha nga among matagamtam ang mga panalangin nga ilang nasayran diha sa ilang kaugalingon nga mga pamilya. Dili ikapangutana, ang among pagbugkos ang nag-inusarang labing importante nga panghitabo sa among kinabuhi.
Alang sa akong bana ug nako, ang mga epekto sa among pagbugkos daw klaro gyud kaayo. Sama pananglit, kami nakamatikud og kausaban sa pagbati sa among panimalay, ilabi na sa among mga anak. Ingon og sila mas masulundon, ug samtang sila dili pa hingpit, sila makanunayon nga naningkamot sa paghimo og maayo nga mga pagpili ug pagsunod sa mga sugo. Kami usab nakasinati sa dugang nga pagkahiusa sa among pamilya.
Ingon sa kadaghan niadtong mga panalangin, ang katinuod sa mga panalangin sa templo nahimong labihan ka makatandog niadtong 2007. Sa buntag sa Oktubre 21, ang among kaluha, mga 17 og edad, naaksidente sa sakyanan. Si Tessa nakaangkon og gagmayng mga samad, apan ang kahimtang ni Jenna mao ang grabe kaayo. Siya gidala ngadto sa ospital sa lugar, diin siya na-coma. Dihang among nahibaloan nga siya dili na tingali mabuhi, ang among tulo ka mas magulang nga mga anak miuli gikan sa kolehiyo. Samtang among gigahin ang sunod nga mga adlaw nga nag-uban sa lawak ni Jenna sa ospital, ang among pamilya nahupay kaayo tungod sa mga ordinansa nga makapahimo kanamo nga mag-uban human sa kamatayon. Kami migahin og panahon sa pag-istorya kabahin sa mahangturong kinaiyahan sa mga pamilya—sa among pamilya. Usa ka semana human sa aksidente, si Jenna namatay.
Ang among mga pakigsaad sa templo nahimong mas importante ngari kanamo sukad sa iyang kamatayon. Hilabihan ang among kamingaw ni Jenna ug nagpaabut sa adlaw nga kami magkauban pag-usab, apan ang among hugot nga pagtuo sa plano sa kaluwasan ug ang among pagpamatuod sa mahangturong pamilya padayon nga nag-abag kanamo. Kami nagbutang sa among balay og usa ka litrato sa among pamilya nga didto sa templo, nga nagpahinumdom kanamo sa among kasinatian ug mga saad nga among nasayran nga mahimo namong angkunon.
Kami mapasalamaton sa matinud-anong mga lider sa priesthood kinsa nagtambag kanamo, ilabi na sa usa ka maayo nga bishop kinsa misunod sa usa ka pag-aghat nga miresulta sa mahangturong mga panalangin sa among pamilya. Kami mapasalamaton sa among mga higala ug sa mga miyembro sa ward kinsa nag-awhag kanamo ug nagpakita og maayong ehemplo ngari kanamo nga among sundon. Labaw sa tanan, kami mapasalamaton sa usa ka mahigugmaong Langitnong Amahan, kinsa mihimong posible nga ang “mga relasyon sa banay magpadayon human sa kamatayon” pinaagi sa gasa sa Iyang Anak ug pinaagi sa mga ordinansa sa templo.2
Mga litrato sa pamilya sa maayong kabubut-on sa pamilyang Sigety.
Ang pamilyang Sigety pagka 2006. Atubangang laray, gikan sa wala: sila si Joseph, Tessa, John Rowe, ug Jenna. Sa luyong laray, gikan sa wala: sila si Hayley, John, ug Ellen.
Kami nagbutang sa among balay og usa ka litrato sa among pamilya nga didto sa templo nga nagpahinumdom kanamo sa among kasinatian ug sa gisaad nga mga panalangin.
Litrato ni Presidente Benson pinaagi sa Busath Photography; litrato ni anghel Moroni pinaagi ni David Andersen; litrato sa Templo sa Dallas Texas pinaagi ni Jed Clark