Walay Paglubad nga mga Istorya sa Ebanghelyo
Ang Sambingay sa Sudlanan sa Bahandi
Unsay bili sa kalag? Bililhon kini ug kinahanglan gayud nga tipigan.
Tali sa mga gihisgutan sa lab-as nga mga balita mao ang report sa usa ka panglungkab, pipila ka mga panghitabo diin dili kasagaran sa gihisgutan nga krimen. Ang kaha-de-yero sa usa ka tindahan nga namaligya og mga alahas ug mga diamante mao ang tuyo sa paglungkab. Tungod sa pag-amping ug kahanas nga gihan-ay sa duha ka kawatan sa ilang mga plano, dayag kaayo nga sila eksperto sa ilang dautan nga buhat.
Giplanohan nila sa pagtago sa ilang mga kaugalingon sulod sa building ug nasirad-an sa dihang ang lig-on kaayo nga mga pultahan gisira sa pagkagabii. Sila nasayud nga ang dakong kaha-de-yero ug semento maayo kaayong pagkatukod ug gigarantiyahan nga dili malungkab, nasayud usab sila nga gisudlan kini og bililhon kaayong mga bahandi; ug gisalig ang ilang kalampusan sa pagpailub, pagkamakanunayon, ug kahanas, nga napalambo pinaagi sa daghang nahimo, bisan tuod og mas minus pa og nahimo nga pagpanglungkab nga maayo ang pagkaplano. Ang ilang kagamitan kompleto, naglakip og mga barina, mga gabas, ug ubang mga himan, gisubhan aron modulot sa bisan gahi kaayong puthaw sa baga kaayong pultahan, nga mao lamang ang agianan pasulod sa kaha-de-yero. Ang armado nga mga gwardiya nagbantay diha sa mga pasilyo sa tindahan sa alahas, ug ang mga agianan ngadto sa lig-on nga lawak gibantayan og maayo.
Sa tibuok gabii ang mga kawatan naghago, nagbarina ug naggabas palibut sa kandado, kansang lisud nga mikanismo dili gayud maabli bisan pa sa usa ka tawo nga pamilyar sa kombinasyon, sa dili pa moabut ang oras nga gitakda diha sa time control. Ilang gibana-bana nga pinaagi sa pagpadayon og trabaho sa tibuok gabii may panahon pa sila sa pag-abli sa kaha-de-yero ug mokuha sa mga bahandi kutob sa ilang madala; dayon sila mosalig sa swerte, maisugon, o mogamit og kusog sa ilang pag-eskapo. Dili sila managana sa pagpatay kon sila babagan. Bisan tuod ang mga kalisud sa paghimo labaw pa kay sa gipaabut, ang hanas nga mga kriminal milampos gamit ang mga himan ug mga pabuto aron maabut ang sulod sa kandado; dayon ilang giukal ang mga trangka ug gipugos sa pag-abli ang bug-at kaayong mga pultahan.
Unsa may ilang nakita sa sulod? Mga tukador nga puno sa mga mahalong bato, bandeha sa mga diyamante, mga mutya, ug mga perlas, unsa pay mahunahuna ninyo? Sa ingon ug labaw pa sila ka masaligon nga nagdahum sa pagkaplag ug sa pagsiguro; apan misangko hinoon sila sa kinahiladman nga kaha-de-yero, nga may pultahan nga mas baga ug mas lig-on pa kay sa nahauna, gipahauman og mekanikal nga kandado nga labaw pa kakuti nga pagkatukod kay sa ilang gihagoan og maayo. Ang metal sa ikaduhang pultahan mao ang superyor nga kalidad nga mibuak sa ilang maayong pagkasubo nga mga himan; bisag giunsa nilag sulay wala gani sila makagaras niini. Ang ilang walay kapuslanan nga kahago nausik; pakyas ang ilang tanan nga salawayong mga plano.
Sama sa reputasyon sa usa ka tawo mao ang pultahan sa gawas sa sudlanan sa bahandi; sama sa iyang kinaiya mao ang pultahan sa kinahiladman. Ang usa ka maayong ngalan mao ang lig-on nga panalipod, apan kon kini giataki ug bisan gani naguba o nahugno, ang kalag nga gibantayan niini luwas sa peligro, gawas lamang kon ang kinahiladman nga kinaiya dili madutlan.
Paghulaway pinaagi ni Daniel Lewis