Elder John A. Widtsoe

Si John Andreas Widtsoe natawo niadtong Enero 31, 1872, sa hilit, nahapay sa hangin nga isla sa Norwegian nga Frøya. Si John unom ka tuig sa dihang ang iyang amahan namatay, ug ang inahan ni John, nga si Anna, midala kaniya ug sa iyang manghud nga lalaki aron adto mopuyo sa Trondheim.

Didto si Anna nakahibalo sa gipahiuli nga ebanghelyo pinaagi sa usa ka tigbuhat og sapatos kinsa mibilin og mga pamphlet sa Santos sa Ulahing mga Adlaw diha sa mga sapatos nga iyang giayo alang sa batan-ong biyuda. Kadto usa ka maisugong buhat sa usa ka hanas nga tigbuhat og sapatos, kinsa gihunahuna nga anaa sa ubos og kahimtang itandi sa biyuda sa usa ka maestro. Apan naukyab ang pagkakuryuso ni Anna, ug siya mitubag sa mensahe sa ebanghelyo.

Niadtong 1883 ang pamilyang Widtsoe milalin ngadto sa Logan, Utah, diin ang batan-on nga si John sa wala madugay mienrol sa Brigham Young College. Usa ka kugihan ug makinaadmanon nga estudyante, siya migradwar niadtong 1891, mituon og chemistry sa Unibersidad sa Harvard, ug migradwar nga nakadawat sa labing taas nga pasidungog niadtong 1894. Samtang didto sa Harvard, iyang nahimamat si Leah Eudora Dunford. Sila naminyo sa Templo sa Salt Lake niadtong 1898 ug nahimong mga ginikanan sa pito ka mga bata, tulo lamang nila ang nabuhi ngadto sa pagdako.

Si John misugod sa iyang propesyonal nga kabuhian isip usa ka professor sa chemistry ug isip usa ka chemist sa estasyon sa eksperimento sa Utah Agricultural College (karon Utah State University) sa Logan. Sa wala madugay siya mituon og physiological chemistry (biochemistry) sa Göttingen, Germany, midawat og Ph.D., ug nahimong internasyonal nga eksperto sa agricultural chemistry alang sa lisud nga mga klima. Siya usab usa nga nailhang eksperto sa irigasyon ug sa uga nga pagpanguma [dry farming].

Si John A. Widtsoe mialagad isip presidente sa Utah Agricultural College gikan 1907 hangtud 1916, sa dihang siya gitawag nga presidente sa Unibersidad sa Utah. Siya mialagad kutob sa iyang mahimo hangtud 1921, sa dihang siya gitawag ngadto sa Korum sa Napulog Duha ka mga Apostoles.

Si Elder Widtsoe ang associate editor sa Improvement Era (ang gisundan sa Ensign nga magasin) gikan 1935 hangtud 1952. Siya usab misulat og pipila ka mga libro nga gigamit sa tibuok Simbahan, lakip na ang Priesthood and Church Government. Siya ang presidente sa European Mission gikan 1926 hangtud 1932, niining higayona siya mipahinungod sa Czechoslovakia alang sa pagsangyaw sa ebanghelyo.

Si Elder Widtsoe namatay sa Siyudad sa Salt Lake, Utah, sa edad nga 80, niadtong Nobyembre 29, 1952.

Si Elder Widtsoe mialagad isip usa ka miyembro sa Korum sa Napulog Duha ka mga Apostoles gikan 1921 hangtud sa iyang kamatayon niadtong 1952.

Si Elder Widtsoe ang associate editor sa Improvement Era nga magasin gikan 1935 hangtud 1952. Ubos: Si Elder Widtsoe nagtuon sa mga kasulatan uban sa mga sakop sa iyang pamilya.